Estrea de ‘O auto do Castromil’
O Teatro Principal de Santiago acolle esta fin de semana a estrea de ‘O auto do Castromil’. Con este proxecto, a compañía Excéntricas gaña o III concurso de proxectos que convoca a fundación Manuel Maria e que recibe o apoio de mais de corenta concellos e institucións de Galiza.
Á presentación da súa estrea en Compostela asistiu a concelleira de Capital Cultural, Míriam Louzao; o director Quico Cadaval; Rocío González, Víctor Mosqueira, Marcos Orsi e Patricia Vázquez (elenco); Fran Núñez, polo Centro Dramático Galego; e Alberte Ansede, secretario da Fundación Manuel María de Estudos Galegos.
A obra acontece nunha viaxe onírica abordo dun coche de liña. Os viaxeiros dormen e talvez o conductor. As maletas e demais bagaxes amotínanse, cobran vida e repasan unha curiosa historia de Galiza, combaten a nosa amnesia conxénita usando autos populares e farsas do autor chairego. Nelas aparece a historia alucinada dun pobo que loita, é derrotado, volve levantar a cabeza e rebelarse de novo. Unha rebelión na que, ás veces, non temos mais armas que o humor e o espirito antroidesco. O auto do Castromil é unha viaxe en transporte público pola Galiza inconsciente.
As entradas serán de balde (2 convites por persoa) e poderán adquirirse en www.compostelacultura.gal ou na Sala C en horario de martes a sábado, de 11h a 14h e de 16h a 19h.
PRIMEIRAS DATAS CONFIRMADAS DA XIRA
• 7, 8 e 9 de xullo en Santiago de Compostela (Teatro Principal)
• 23 de xullo na Mostra Internacional de Ribadavia
• 15 de agosto na Mostra de Teatro de Cariño
• 10 de setembro en Sarria
• 16 de setembro en Narón
• 23 de setembro en Monterroso
• 24 de setembro na Pobra do Boullón
• 06 de outubro en Ames
• 07 de outubro en Cedeira
• 21 de outubro en Vilalba
• 26 de outubro en Foz
• 03 de novembro en Ribeira
• 04 de novembro en Noia
• 10 de novembro en Arteixo
• 18 de novembro en Outes
• 25 de novembro en Ortigueira
• 02 de decembro no Carballiño
