A Coruña será unha das sedes, xunto a Málaga, Barcelona, Madrid e Bilbao, da conmemoración do 50 aniversario do falecemento de Pablo Ruiz Picasso.

Picasso viviu na Coruña entre 1891 e 1895, dos 9 aos 13 anos. Esta foi unha estadía clave na súa formación como artista, xa que desta época datan as súas primeiras pinturas e as súas primeiras exposicións. Os actos procuran non só reivindicar a cidade como eixo da influencia na arte de Picasso, senón poñer o foco na importancia da educación nas artes a temperá idade.

A ‘Celebración Picasso 1973-2023’ contará con máis de 30 actividades ao longo do ano na Coruña. A programación está formada por exposicións, conferencias, congresos e actividades para todas as idades, que se desenvolverán de febreiro a decembro na cidade. Un dos actos principais será a exposición ‘Picasso branco no recordo azul’, que se poderá visitar no Museo de Belas Artes de marzo a xuño e que promoven o Concello e a Xunta de Galicia. O Quiosco Alfonso tamén será unha das sedes desta homenaxe coa mostra ‘En pretérito seguinte’, na que os artistas contemporáneos da cidade amosarán a súa inspiración na paisaxe e na vida na Coruña de hoxe.

Outro dos escenarios centrais será a Casa Museo Picasso, na que o Concello executará este ano traballos de reforma dun dos andares. Alí haberá tres actividades repartidas ao longo do ano. Por unha banda, a exposición ‘Abrindo a nosa colección’, que se dividirá en tres etapas (de decembro a xaneiro, de febreiro a abril e de agosto a outubro) e amosará documentos e obras que forman parte da colección e arquivo municipal e fondos da biblioteca da Asociación Pablo Picasso relativos á súa etapa coruñesa.

A partir do 28 de abril e no contexto da programación do Encontro Mundial de Humoristas 2023, levarase a cabo a mostra ‘O Guernika, unha viñeta universal – Humor na escuridade’.

Por último, a exposición ‘A miña casa’ estará dispoñible de outubro a decembro e amosará o traballo de ilustradores de Coruña Gráfica en homenaxe a Pablo Picasso.

Por outra banda, a Fundación Luís Seoane realizará dúas importantes actividades do programa. En abril, o terceiro Congreso Internacional de Arte e Educación centrará a súa edición deste ano no artista. Entre outras cuestións, analizaranse os eixos temáticos que o vinculan á arte española e as ferramentas da súa creación que son útiles para a educación artística. Haberá tamén na Luís Seoane o ciclo de conferencias ‘Protagonistas’, no que se falará de musas, amantes, modelos e investigadoras arredor do universo de Picasso. Será unha sesión ao mes de febreiro a outubro e o seu obxectivo será amosar o papel fundamental da muller na obra do artista.

Outra exposición en homenaxe a Picasso será ‘Pablo Ruiz en mi’, de abril a maio en Palexco, do artista cubano Nelson Villalobo.

A programación complétase con actividades didácticas para todas as idades, o impulso e a visibilidade da creación contemporánea na cidade a través dun Festival Internacional de Muralismo ou unha curtametraxe sobre a ‘Torre de Caramelo’, denominación que empregaba Picasso para describir a Torre de Hércules.

As artistas urbanas Eloise Gillow, Amaia Arrazola, Julieta XLF e Doa Oa serán as encargadas de realizar os catro novos murais do festival feminista de arte urbana e contextual que, nesta edición especial, contará con obradoiros para familias, roteiros, coloquios e proxeccións, entre outras actividades. Nos meses de xuño e xullo, o Delas Fest concentrará a súa actividade en Compostela, cunha xuntanza entre as artistas convidadas e a veciñanza, un roteiro feminista de arte urbana e celebración do FAMILIA DELAS FEST!

O primeiro festival de arte urbana con perspectiva de xénero de Europa, o Delas Fest, volve por quinto ano consecutivo a encher de cores e historia os muros da comarca de Compostela. Co seu espírito intacto a pesar dos anos, o festival renova a súa aposta pola visibilización e dignificación do traballo das artistas urbanas, imprescindibles para rachar cos estereotipos de xénero que aínda perviven no espazo público. O Delas Fest foi presentado no Pazo de Raxoi pola concelleira de Acción Cultural, Mercedes Rosón, acompañada das concelleiras de Cultura e Igualdade de Teo, María López; e de Patrimonio e Turismo de Brión, Yolanda Bouzas; e Clara R. Cordeiro, socia de 7H Cooperativa Cultural.

Esta quinta edición do festival, que marca un fito na historia do proxecto, está deseñada desde o desexo de celebrar e destacar a importancia e o valor de que as mulleres ocupen artísticamente, durante todo o ano, o espazo público. Para iso, a súa programación, condensada habitualmente nunhas poucas semanas, esténdese desde o simbólico mes de marzo -cando se lanzou unha nova convocatoria de Muros en Man Común- e amplíase con distintas actividades ata o mes de setembro, momento no que se realizarán as catro novas intervencións murais de gran formato.

O proxecto, organizado por 7H Cooperativa Cultural desde o ano 2019, celebra na comarca de Compostela unha nova edición coa reivindicación da igualdade, a democratización da expresión artística no espazo público e o apego ao territorio, como sinais de identidade. Cita de referencia de arte urbana no circuíto estatal, este ano o programa é posible grazas aos concellos de Santiago, Ames, Teo e Brión, á liña de subvencións da Deputación da Coruña e ao patrocinio de Montana Colors, Ibersa-El Mundo del Pintor e Gadis, así como á colaboración de Cafés Candelas, Daveiga e LoxamHune.

Na rolda de prensa, Mercedes Rosón salientou a importancia deste proxecto xa que “integra a perspectiva de xénero, tan necesaria neste momento, e tamén nos achega disciplinas artísticas en auxe pero aínda moi descoñecidas, máis cando as creadoras son mulleres”. A edila congratulouse da excelente colaboración que se veu desenvolvendo nos últimos anos entre o Concello de Santiago e os de Ames, Brión e Teo, que fixo do Delas Fest, un proxecto colectivo “cun magnífico resultado de anteriores edicións” e que contribúe a “converter o noso territorio nun referente da arte urbana feminista e contextual a nivel internacional”.

Programa V aniversario

O cartel desta edición, novamente integrado únicamente por mulleres que desenvolven o seu traballo na rúa desde unha perspectiva feminista, incorpora no seu deseño á ilustradora María Montes (Pontevedra, 1987) quen, co seu característico e minucioso traballo, amosa unha persoal reinterpretación do espírito do festival, continuando a labor iniciada co cartel da edición anterior pola tamén ilustradora Maru Astray.

Este ano, as encargadas de realizar as obras de gran formato son a muralista e ilustradora vasca Amaia Arrazola (Gasteiz, 1984), quen pintará no Concello de Brión; a artista visual e muralista galega Doa Oa (Sober, 1986), quen creará no Concello de Teo, a muralista e artista visual británica Eloise Gillow (Oxford, 1993), quen levará a arte urbana ao Concello de Santiago; e a ilustradora e muralista valenciana Julieta Silla (Valencia, 1982), conocida artísticamente como Julieta XLF, quen creará a súa peza no Concello de Ames.

Para definir as temáticas e enfoques das súas obras, as convidadas contarán desde o mes de abril coa colaboración da comunidade, que volverá ter un rol destacado nos procesos creativos. A través da convocatoria Anfitriónate!, a veciñanza ten a oportunidade de coñecer ás artistas e de trasladarlles información, coñecementos e vivencias que inspiren as súas intervencións, converténdoas en reflexo da identidade e a idiosincrasia do territorio que as acolle.

De forma paralela a todo este traballo, o festival complétase cunha ampla variedade de actividades que arrancan o vindeiro martes 25 de abril ás 16.30h coa proxección, no Auditorio da Casa da Cultura do Milladoiro, do documental Museo a Ceo Aberto e o posterior coloquio coa súa directora, Marián Fernández, da cooperativa O Cable Inglés.

Nos próximos meses, tamén se celebrarán dous roteiros de descuberta da arte urbana feminista, un no Concello de Brión o sábado 6 de maio e outro no Concello de Santiago durante o mes de xuño. Tamén en Compostela, realizarase un coloquio en torno ao libro Cando elas toman os muros. Feminismo e arte urbana en Galicia, estudo pioneiro que constrúe unha primeira xenealoxía feminista da arte urbana. E nos meses de verán, tanto Ames como Compostela acollerán o I Familia Delas Fest, unha nova proposta de obradoiros participativos especialmente deseñados para a cativada e as súas familias.

MÁIS INFO

A Coruña acollerá a sexta edición do ciclo ‘Elas Son Artistas’, o ciclo de artes e música que ten como obxectivo poñer en valor o papel da muller na arte. O festival desenvolverase entre os meses de abril e novembro, con actividades nos diferentes municipios da área metropolitana.

A concelleira de Comercio, Consumo, Mercados e Barrios, Diana Sobral, informou sobre a nova edición do ciclo. “Unha nova cita xa obrigada na Coruña, que se suma á importante programación cultural posta en marcha por este Concello” sinalou. Nesta sexta edición, o ciclo contará con actuacións como María de la Flor, que abrirá a sexta edición este sábado día 15, ou concertos de artistas como Eva Mcbel, Hermana Furia, Carolina Rubirosa ou Aüdra.

A Coruña ten xa 10 actividades confirmadas entre as que destacan os concertos de The Dirty Denims ou Hermana Furia, na sala Mardi Gras; María Toro, no Garufa Club ou a a banda de Nova York, Jane Lee Hooker, Cris Regueiro & The Neo Band no Jazz Filloa.

Programaranse tamén outras actividades, como o espectáculo de Su Garrido Pombo mentras pinta Xoana Almar, da Cooperativa Cestola na Cachola, que terá lugar na praza de Azcárraga así como unha exposición na Casa Museo Casares Quiroga, que terá lugar durante todo o mes de setembro.

O ciclo rematará o 24 de novembro ás 21.00 h, coa actuación de Alice Wonder no Teatro Colón para o que xa están á venta as entradas en www.ataquilla.com.

Primeiros eventos confirmados na sexta edición de Elas Son Artistas:

● 15 de abril – María de la Flor – Auditorio do Centro Cultural A Fábrica, Concello de Oleiros (20.30 horas)

● 21 de abril – Eva McBel – Cívico Cultural, Concello de Arteixo (20.30 horas)

● 13 de maio – Hermana Furia – Sala Mardi Gras, Concello da Coruña

● 31 de maio – María Toro – Garufa Club, Concello da Coruña

● 30 de xuño – Jane Lee Hooker – Sala Mardi Gras, Concello da Coruña

● 12 de xullo – Su Garrido Pombo + Xoana Almar, da Cooperativa Cestola na Cachola – Praza de Azcárraga, Concello da Coruña

● 19 de xullo – Cris Regueiro & The Neo Band – Jazz Filloa, Concello da Coruña

● 15 de setembro – Carolina Rubirosa e Aüdra – Sala Xulio Cuns, Concello de Betanzos

● 22 de setembro – Reinas Malas – Auditorio do Edificio usos múltiples do Burgo, Concello de Culleredo

● 4 de outubro – The Dirty Denims – Sala Mardi Gras, Concello da Coruña

● 21 de outubro – The Niftys – Sala Mardi Gras, Concello da Coruña

● 24 de novembro – Alice Wonder – Teatro Colón, Concello da Coruña

Proximamente darase a coñecer o resto da programación.

O mundo onírico, idealizado e soñador de Urbano Lugrís protagoniza a imaxe do XIV (S8) Mostra Internacional de Cinema Periférico. O festival, que presentou o groso da súa programación, homenaxea así no cincuenta aniversario da súa morte ao “artista do mar”, máximo expoñente do surrealismo no noso país e coruñés de nacemento, que inspirou gran parte da súa obra na cidade da Torre de Hércules. Un pintor que, en palabras do representante da Asociación Cultural O Mural, Rodrigo Osorio, “encaixa moi ben no (S8) porque é un artista periférico: no xeográfico, porque desenvolveu boa parte da súa traxectoria en Galicia, con importantes incursións tamén a nivel estatal; e no ideolóxico, porque foi un gran nacionalista galego”.

Como cada ano, nesta décimo cuarta edición, o (S8) inclúe un programa temático acorde coa súa imaxe, que estará dedicado a esas películas que buscan retomar a visión da infancia: “Paisaxes encantadas” como aquelas que pintaba Lugrís. Abrirá a sesión a estrea internacional de And so it came about, de Charlotte Pryce, e poderán verse filmes de destacadas cineastas contemporáneas como Gaëlle Rouard, Ute Aurand ou Jennifer Reeves, así como do mítico creador checo Jan Svankmajer.

Será só unha parte da programación dun (S8) que, segundo adiantou Ángel Rueda, director do festival, proxectará máis de 180 pezas procedentes dunha ducia de países (Estados Unidos, Reino Unido, Canadá, Italia, Arxentina, Francia, Chile, Alemaña, República Checa, Corea do Sur, Portugal e España). Boa proba, segundo Rueda, de que o analóxico “non é un formato antigo ou vello, como ás veces queren facernos crer” e de que “se pode facer cinema experimental de vangarda comprometido cun pensamento libre”.

Segundo apuntou Elena Duque, programadora e responsable do departamento editorial do (S8) Mostra Internacional de Cinema Periférico, un ano máis, o (S8) reunirá na Coruña figuras claves do cinema de vangarda e experimental de moi diferentes xeracións. Entre elas, o británico residente en Nova York Anthony McCall,mundialmente coñecido polos seus traballos de “luz sólida”, unha serie que iniciou nos 70 co seu célebre Line Describing a Cone, no que unha forma volumétrica composta de luz proxectada evoluciona lentamente nun espazo tridimensional. As súas obras foron exhibidas en multitude de museos e galerías de arte internacionais, entre os que destacan o MoMA de Nova York ou a Tate Modern de Londres. Nesta ocasión, McCall estará no (S8) na Coruña visitando por primeira vez o noso país no contexto dun festival de cinema. A Mostra vaille dedicar un foco no que proxectará as súas películas colectivas Argument e Sigmund Freud’s Dora. O cineasta será tamén o protagonista da clausura do festival cunha posta en escena simultánea dos seus traballos lumínicos en formato analóxico. Ademais, Anthony McCall impartirá unha master class, destinada a profesionais e público en xeral, donde profundizará na súa idea do cine e na evolución das súas accións performativas.

A artista canadense Barbara Sternberg será outra das invitadas internacionais da décimo cuarta edición dun festival que reivindica o traballo de mulleres cineastas cuxa obra non tivo a merecida difusión no noso país. Sternberg empezou a realizar películas nos 70. Os seus filmes, que abordan o persoal, o político e os ciclos da vida e morte, proxectáronse a nivel internacional no Centro Pompidou de París, o Kino Arsenal en Berlín, ou o MoMA en Nova York. En 2011 recibiu o máximo galardón no mundo das artes visuais en Canadá. O seu traballo destaca por resaltar as propiedades do cine fotoquímico, explorando todas as posibilidades da cor, a mecánica, a química e a óptica do cine. A obra de Sternberg pode equipararse en riqueza e importancia á de artistas como Barbara Hammer ou Carolee Schneemann. O foco que o (S8) lle dedicará desenvolverase en dous programas que supoñen a estrea en España de gran parte da súa filmografía, mostrada no seu formato orixinal de 16 mm. As proxeccións serán tamén unha ocasión única para que o público se encontre con esta cineasta referente do cinema de vangarda.

Desbordamientos: film performance con John Price e Hangjun Lee

A sección Desbordamientos, dedicada por completo á film performance, trae dous dos pratos fortes do festival: as propostas do canadense John Price e o artista surcoreano Hangjun Lee.

Catalogado como un dos “novos impresionistas” do cine, John Price produciu películas experimentais, danza e diarios filmados desde 1986. A súa paixón pola fotografía levouno ao mundo da experimentación, traballando con cámaras tradicionais e emulsións caducadas, para revelar a realidade por e con outros medios. Investigación e desfrute visual mestúranse nos seus traballos, como poderá comprobarse en There is Light at the Top of the Tower!, a performance inspirada na Torre de Hércules que deseñou en exclusiva para o (S8). Unha proposta ao redor do mar e os faros, cuxo mecanismo Price equipara ao da cámara de cine. Unha experiencia única que contará ademais cunha intervención sonora en vivo do artista sonoro galego TORSO. Ademais, o cine de Price, que aborda temas como a natureza, o tempo e a condición humana, terá tamén espazo no festival, ao longo de dous programas nos que tamén estreará tres novas pezas, entre elas, a última da súa Sea Series, un conxunto de películas que se acercan ao concepto pictórico das mariñas.

Inéditas no noso país son tamén as performances que o surcoreano Hangjun Lee traerá ao (S8). Figura dinamizadora da escena do cine experimental no seu país, ademais de cineasta é investigador e foi responsable de programación do festival EXIS, cita destacada da vangarda en Corea. Hangjun Lee realizará unha posta en escena que combina a proxección en 16 mm das súas obras Film Walk e Phantom Schoolgirl Army, co uso do proxector de cine como un instrumento de creación sonora. Manipulando a película polos mecanismos do proxector, é quen de xerar un son cadrafónico e crear así un espectáculo visual e sonoro único que seguro sorprenderá ás persoas asistentes ao festival.

A Mostra, porto de entrada do cinema de vangarda latinoamericano

O (S8) continúa traballando na liña de tender pontes co cinema experimental desenvolvido ao outro lado do Atlántico. Con ese fin, este ano trae a un dos creadores actuais máis estimulantes de Arxentina: Benjamín Ellenberger. O festival fará un percorrido amplo pola súa obra, incluíndo a estrea mundial da última peza da súa serie Reflejo Nocturno, un conxunto de filmes que crean un rexistro do espazo de Bos Aires. Neles, Ellenberger utiliza diversas técnicas para levar un paso máis alá a sensibilidade da película e captar a noite, que rara vez foi captada en formato fotoquímico con fidelidade sen o uso de iluminación. Ademais, a retrospectiva contará tamén co traballo performativo de Ellenberger.

O (S8) convoca a sétima edición de BAICC, as Residencias artísticas internacionais de Creación Cinematográfica

O (S8) Mostra Internacional de Cinema Periférico, o LIFT-Liaison of Independent Filmmakers of Toronto e Acción Cultural Española (AC/E) convocan a sétima edición das Residencias Artísticas Internacionais de Creación Cinematográfica – BAICC. Ata o 10 de xuño está aberta a recepción de obras para formar parte desta residencia que impulsa a produción dunha obra audiovisual rodada en formato analóxico en Toronto (Canadá).

Apoios do XIV (S8)

A décimo cuarta edición do (S8) Mostra de Cinema Periférico, que terá lugar do 26 de maio ao 4 de xuño na Coruña, está organizada pola Asociación Cultural eSe8 e conta co apoio do Concello da Coruña, o Consorcio de Turismo e Congresos, a Deputación da Coruña, a Axencia Galega das Industrias Culturais da Xunta de Galicia e o Instituto da Cinematografía e das Artes Audiovisuais (ICAA), Acción Cultural Española (AC/E) e a Fundación Luis Seoane. Ademais conta coa colaboración de Afundación Obra Social ABANCA.

Ademais, a invitación para a participación de Barbara Sternberg, Hangjun Lee, Enrico Camporesi, Jessica Sarah Rinland, Helena Gouvenia e Scott Hamen nesta edición do (S8) foi posible grazas ao Programa de Acción Cultural Española (AC/E) para a Internacionalización da Cultura Española (PICE),  na súa modalidade de visitantes, que facilita que as entidades e institucións culturais españolas conten nas súas actividades e programas coa presenza en España de profesionais prescritores culturais internacionais, a fin de coñecer de maneira directa e persoal a oferta creativo-cultural española.

BAICC é un proxecto de eSe8_LAB financiado pola Unión Europea – NextGenerationEU como parte do Plan de Recuperación, Transformación e Resiliencia do Instituto da Cinematografía e das Artes Audiovisuais, grazas ás axudas a Laboratorios e Incubadoras de Creación e Desenvolvemento de Proxectos Audiovisuais. Conta co apoio de Acción Cultural Española (AC/E) e o LIFT-Liaison of Independent Filmmakers of Toronto.

As imaxes de Urbano Lugrís pertencen á Colección de Arte ABANCA e o seu uso foi posible tamén grazas á colaboración da familia do artista e da Asociación Cultural O Mural. 

Dez propostas achegarán de novo a música dos séculos XX e XXI a Compostela, nunha nova edición que terá lugar do 1 ao 27 de xuño en varios espazos da cidade, con entradas de balde. As XMC están organizadas polo Auditorio de Galicia, a USC (Vicerreitoría de estudantes e cultura) e o Centro Galego de Arte Contemporánea, e contan co apoio económico da Deputación da Coruña.

A concelleira de Acción Cultural en funcións, Mercedes Rosón; o deputado provincial en funcións, Xurxo Couto; a vicerreitora de estudantes e cultura da USC, Pilar Murias; o director do Centro Galego de Arte Contemporánea (CGAC), Santiago Olmo xunto ao director -xerente do Auditorio de Galicia Xaquín López, presentaron esta mañá na sala de prensa do concello, unha nova edición das Xornadas de Música Contemporánea baixo o título ‘A voz a escena’.

10 actividades con 4 estreas absolutas e 2 estreas en España

As xornadas celebraranse do 1 ao 27 de xuño e será a musicóloga Rosa María Fernández a que as inaugure cunha charla sobre ‘As dramaturxias vocais fóra da ópera’ que se completará cunha segunda conferencia o día 14 ‘As dramaturxias vocais na ópera’, ambas terán lugar na Sala Mozart do Auditorio de Galicia.

A voz será o fío condutor dunhas xornadas que no musical serán iniciadas pola Banda de Música Municipal de Santiago, cun concerto ‘Ópera na rúa’ que será na Praza das Pratarías, conta co apoio da Asociación de Amigos da Ópera de Santiago. Lúa Mosquetera e Javier Otero presentarán no cemiterio de Bonaval ‘O poder das palabras’ un proxecto artístico que mestura poesía e música, será o 2 de xuño.

En caso de choiva ambos concertos pasarán a celebrarse no Auditorio de Galicia.

Unha ‘Ópera de peto’ escrita por Francisco Rodríguez, para voz lírica e formación instrumental e interpretada pola BilbaoSinfonietta, entrelazará diferentes historias tradicionais recollidas na antoloxía Euskal Baladak de Jabier Kalzakorta.

Pola súa parte o Trío Preseli, baixo o nome ‘Do mar e a noite’ estrea en España dúas obras do compositor galés Anthony Randal, Three Poems, sobre versos de Geraint Jones e Do Not Go Gentle Into That Good Night o poema de Dylan Thomas, unha obra maestra da lingua inglesa, e presentarán en estrea absoluta ‘Nao de sangue’ unha obra que o Trío lle ten encargado ao compositor galego Fernando Buíde. Os concertos da BilbaoSinfonietta e o Trío Preseli serán na Sala Mozart do Auditorio de Galicia o 9 e 13 de xuño respectivamente.

Tamén no Auditorio de Galicia, no escenario da sala Ángel Brage, Pulso Ensemble presentará ‘Patio de xogos’. Unha gramática do coidado’, estrea absoluta de nova instrumentación e de texto en galego; unha peza participativa de teatro musical para 30 persoas que terá dúas funcións o 16 de xuño ás 17.30 e 19.00 h.

O Centro Galego de Arte Contemporánea (CGAC) acollerá o día 20 o concerto de Ensemble Liberdade que nos achegará ao son da música galega de vangarda no século XXI.

Remataremos as xornadas con dous concertos no Teatro Principal o 22 e 27 de xuño: ‘Papagena’ unha ópera electrónica contemporánea do compositor galego Iago Hermo e ‘Insomnia’, estrea absoluta de Vertixe Sonora,cun espectáculo musical, unha ópera contemporánea arredor da nosa actual condición de estar sometidos aos algoritmos (en colaboración con ChatGPT e outras intelixencias artificiais).

As Xornadas de Música Contemporánea están organizadas polo Auditorio de Galicia-Compostela Cultura, Concello de Santiago, o Centro Galego de Arte Contemporánea (CGAC), a Universidade de Santiago de Compostela e contan co apoio económico da Deputación da Coruña.

Todas as actividades son de balde ata completar a capacidade dos espazos

A concelleira de Acción Cultural, Mercedes Rosón, os directores do Festival, Mónica Maneiro, Iñaki Antelo e David Barro e o artista Antón Reixa, presentaron a cuarta edición de Plataforma, o Festival de artes performativas de Santiago que terá lugar entre o 7 e o 15 de xuño, cunha proposta multidisciplinar que aposta pola igualdade, o desenvolvemento sustentable e a posta en valor dos espazos da cidade.

Organizado pola Cooperativa Performa co apoio do Concello de Santiago, o Festival Plataforma convértese un ano máis nunha cita anual ineludible para os amantes da cultura e as artes. Achegando diversos públicos coa súa proposta interdisciplinar, o festival dinamizará as rúas e prazas da cidade, como o Cruceiro de San Pedro, as prazas do Obradoiro e a Quintana e os parques de Bonaval e de Belvís, ademáis dos espazos de Fundación DIDAC, a sede de SGAE Sociedad General de Autores e Editores, a Fundación Eugenio Granell, a sala Riquela ou o CGAC, con performances, música, danza, propostas escénicas, encontros, talleres, conferencias performativas e arte contemporánea.

A concelleira Mercedes Rosón salientou “a simbiose entre cidade e arte” como “unha das claves do éxito do festival”, xa que tamén é unha cita “comprometida co urbanismo e a riqueza patrimonial material e inmaterial”, así como coa “diversidade, a igualdade, cunha gran tradición á que se suma a innovación cultural”. Rosón convidou “a todas as veciñas e veciños a ser partícipes desta gran aposta performativa, na que Santiago será, unha vez máis un gran escenario cultural”.

Antón Reixa e a BMS

O popular artista Antón Reixa será o encargado de abrir esta edición do festival en colaboración coa Banda Municipal de Música de Santiago de Compostela dirixida nesta ocasión por Casiano Mouriño, na tarde do xoves 8 de xuño coa súa performance Un só familiar por paciente (e non viceversa), realizada ex profeso para Plataforma.

Un día antes, o mércores 7, comezarán as actividades na Fundación DIDAC con un taller de performance a cargo da artista Ana Gesto, que se suma a outras propostas educativas como o taller para os máis pequenos dirixido por Alba Cacheda ou o Foro de economía circular en colaboración con Signus Ecovalor e a EASD Mestre Mateo, no Parque de Belvís.

O festival organizado por Cooperativa Performa caracterízase pola deslocalización de espazos, polo que disfrutaremos da súa ampla oferta en múltiples escenarios: no Parque de Bonaval, Olga Cameselle e Alfredo Rodríguez presentarán Cando marche non vou pechala porta, un espectáculo de danza; e na sede de SGAE, a bailarina e coreógrafa Olga Mesa ofrecerános Una mesa propia (Danza de manos), unha performance audiovisual. Estos son só algúns exemplos da variada oferta cultural que presenta Plataforma, e que se complementará coa exposición de Françoise Vanneraud no espazo da Fundación DIDAC. O festival clausuraráse este ano CGAC coas actuacións de Marc Vives e Cristina Balboa.

Grazas a súa natureza transversal, o Festival Plataforma intégrase á perfección coa programación cultural compostelá, así coma na rede galega de institucións públicas e privadas: o CGAC, a Fundación Eugenio Granell e a EASD Mestre Mateo son algunhas das entidades que colaboran nesta cuarta edición. Plataforma aposta polo talento local e as mulleres artistas, facendo da cultura o eixe integrador do patrimonio compostelá coa inclusión, a accesibilidade e a sustentabilidade como desafíos para esta edición.

PROGRAMA COMPLETO

A praza da Quintana acollerá do 9 ao 18 de xuño a programación da SELIC, un festival organizado polo Concello de Santiago que ten a lectura como protagonista. A Semana do Libro de Compostela amplía ademais este ano o seu espazo, que acollerá 26 postos de librarías e editoras. Tamén a programación medra cunha media de seis actividades por xornada, entre as que se inclúe un paseo diario.

A SELIC mantense fiel ao seu concepto: levar o protagonismo do papel ao directo. Autoras e autores galegos xúntanse con nomes internacionais de recoñecido prestixio, como Cristina Morales (Lectura fácil), ou o supervendas italiano Bernardo Zannoni.

SELIC Criminal

Pero a gran novidade desta VII edición é, sen dúbida, a estrea da SELIC Criminal, unha sección coordinada polo profesor e escritor Xaquín Núñez Sabarís, que nace con vontade de ser cita de referencia do xénero en Galicia. Este apartado dedicado ao xénero negro, en toda a súa diversidade, reunirá o máis destacado do panorama ibérico. A autoras e autores galegos como Diego Ameixeiras, Pedro Feijoo ou Patricia A. Janeiro, súmanse nomes como Arantza Portabales ou Lorenzo Silva, así como dous dos principais autores portugueses do xénero, Francisco J. Viegas e Francisco Moita Flores. Procurando ofrecer unha perspectiva heteroxénea, non só a literatura terá presenza, senón que tamén haberá oco para o audiovisual, con convidados como o guionista Pepe Coira.

Máis alá do libro

A SELIC continúa cunha programación que conxuga a lectura con outras disciplinas, principalmente a música, o teatro e o audiovisual. Así, por exemplo, este ano poderemos achegarnos á obra publicada de Chévere a través dunha performance que contará con Xesús Ron, Patricia de Lorenzo e Miguel de Lira, ou a O lume de David Rubín a través da dramatización de Xosé Barato.

Mención á parte merece a relación de literatura e música, xa moi presente en anteriores edicións. Este ano salientan figuras como a cantautora madrileña Cristina Rosenvinge ou o mozambicano João Afonso. Ademais, un concerto-recital xuntará a Olga Novo e Su Garrido Pombo, nunha actividade desenvolvida a proposta da SELIC.

Sumaranse a todo isto, alén das habituais seccións de diversos xéneros e os cursos, as programacións de librarías e editoras, nas que salientan as múltiplas sinaturas de libros que poñerán en contacto aos autores e autoras co público.

Colaboracións

A SELIC contará nesta edición coa colaboración da Fundación Antonio Pereira e da Fundación Carlos Casares, así como do Festival Internacional de Narración Oral Atlántida, da Biblioteca Ánxel Casal e de Agareso. Igualmente, mantense con forza a liña de traballo a nivel escolar, con visitas de alumnado de cinco centros de ensino (non só de Compostela, senón tamén de Brión ou Fisterra), que gozará de programación específica.

A Festa do Comercio local Prima 23, que se celebrou o 4, 5 e 6 de maio, estivo acompañada pola chuvia, o que obrigou a suspender algunhas das actividades previstas. O Concello recupéraas agora para o venres 2 e os sábado 3 e 17 de xuño. Ademais, debido ao gran éxito que tivo, repetirase a ruleta con agasallos que, nesta ocasión, estará na praza do Toural.

O venres 2 as rúas de Fontiñas e San Pedro acollerán a partir das 18.00 horas un pasarrúas a cargo de Cé Orquestra Pantasma. Baixo este nome agóchase o vigués César Freiría, músico autodidacta e apaixonado dos instrumentos musicais que leva pecorrendo toda a xeografía galega a un ritmo de máis de 150 concertos ao ano. Un proxecto musical, unipersoal e versátil, grazas ao seu amplo e variado repertorio, no que se conxuga á perfección toda unha vida musical.

O sábado 3 será o turno para outros dous pasarrúas: Os Bregadiers, que partirá ás 12.00 h de Cervantes e pasará pola zona da praza de Abastos, Mazarelos e Orfas para acabar no Toural; e The Turre’s Band, que fará o seguinte percorrido: Carreira do Conde – Xeneral Pardiñas – República Arxentina – San Pedro de Mezonzo – Casas de Ramírez – Praza Roxa. A saída será tamén ás 12.00 h.

Os Bregadiers, a banda de rúa que leva en marcha por todo o país dende o ano 2016, renóvase para ofrecer unha festa soul-funk coa que non poderemos deixar de movernos. Sonidos Motown, deep-soul e funk revisitados instrumentalmente que deixan lugar á improvisación pero sempre orientados a liberar a mente para que o corpo non poida parar.

Tanto se é enriba dun escenario como en formato pasarrúas a Turre`s band son a alegría da festa. Formación de vento e percusión cun repertorio que bebe do blues, do ska, da verbena, da música balcánica…Máis de 20 anos dando festa e facéndonos vibrar en cada actuación.

Ruleta con agasallos

Unhas das novidades desta edición da Festa do Comercio local foi a ruleta de agasallos que, debido ao éxito acadado en maio, se repetirá de novo esta fin de semana. Se o mes pasado estivo na praza Roxa, nesta ocasión situarase na praza do Toural o sábado 3 de 17.00 h a 20.00 h e acompañarase da actuación do Mago Noel.

Poderán participar todas as persoas maiores de 16 anos que presenten un tícket de compra do comercio de Santiago de importe igual ou superior a 5 euros, realizadas entre o 29 de maio e o 3 de xuño.

Exhibición de ourivería

O programa inicial de Prima 23 recollía tamén a xa tradicional exhibición de ourivería e talla de acibeche por mestres ourives de Compostela. A actividade recupérase tamén pero neste caso celebrarase o sábado 17 de xuño na praza de Cervantes.

A Festa do Comercio local, que neste 2023 celebra a cuarta edición, busca reforzar a aposta do Concello de Santiago polo comercio local e de proximidade, así como dinamizar o consumo á vez que se lle dá unha nota de cor e alegría á cidade coas distintas actuacións e actividades programadas.