Un ano dando vida ao Soho Orzán
Todas as cidades teñen lugares especiais. Na Coruña un deles é, sen dúbida, o Soho Orzán. Abonda con dar unha pequena volta para descubrir ese encanto que só pode aportar o comercio local. Aquel no que te reciben co teu nome. No que atopas produtos únicos. No que te podes fiar do negocio do lado para que te recolla un paquete. E no que pola rúa sempre hai xente saudando cun sorriso.
Hai un ano que Mónica Borrás decidiu darlle un impulso ao barrio no que ten o seu negocio, a galería e tenda ‘Ese Sitio’. Así, despois de reunir a un grupo de locais de comercio, hostalaría e servizos da zona, e con ela como presidenta, reactivou a Asociación de Comerciantes que levaba un tempo sen facer nada. De seguido puxéronse mans á obra e en novembro do 2022 organizaron a primeira Feirarrúa, grazas a un convenio co Concello e a Federación Unión Comercio Coruña.
Exposicións de arte, música, obradoiros e outro tipo de actividades lúdicas forman parte da programación dos Feirarrúa, que se celebran desde entón o primeiro sábado de cada mes. “Temos moitas peticións para participar. Sempre queda algunha fóra. Eu intento equilibrar, que haxa un pouco de todo: artesanía, alimentación...”, explica Mónica. E proximamente están a traballar nunha dedicada á arte urbana. “Ábrese a convocatoria unha vez que remata a anterior. Informamos de todo a través da nosa conta en instagram
@feirarrua.soho.orzan”, sinala.
Ademais, desde a Asociación de Comerciantes Soho Orzán tamén traballan por conseguir melloras para a zona. Unha das súas principais reclamacións é concienciar á veciñanza e turistas de que estamos nun espazo peonil. “Só hai un garaxe con sete coches na mesma rúa. Teríase que controlar máis o tráfico”, apunta Mónica. Por iso cre que debería establecerse sinalética de zona peculiar.
Tamén lles preocupa rebaixar o desnivel que hai coa beirarrúa “porque da pé a caídas dos nosos clientes” e poñer máis contedores de reciclaxe e subterráneos. “A media tarde xa están coas tapas abertas co lixo e dá moi mala imaxe”, lamenta a presidenta. Así mesmo, opina que faltan elementos decorativos e arranxar a instalación de cables da rúa.
Por outra banda, lanza ao Concello a idea de “fomentar en publicacións turísticas a propia identidade de moitos barrios”. Porque efectivamente, como dicía ao principio, o Soho Orzán é un lugar diferente. A continuación, imos coñecer a algunhas das súas xentes.
