Que é a luz de recheo e como fai que as túas imaxes luzan máis?
Por Antonio Sanjurjo
Se hai un aspecto fundamental do que debemos ser conscientes en fotografía, é a luz. As fotógrafas e fotógrafos profesionais debemos - polas propias condicións do noso traballo - dominar este aspecto fundamental, para conseguir que as imaxes teñan o volume, a dureza, os tonos e a expresividade necesarias para transmitir a mensaxe que os nosos clientes - ou nós - queremos facer chegar a través das nosas imaxes.
Facendo unha rápida distinción entre os tipos de luces, temos dúas grandes divisións:
- Luz de recheo. Luz que suaviza as sombras xeradas pola luz principal e aporta detalle nas zonas máis escuras da imaxe.
- Luz principal. Luz que ilumina e ambienta a escea, define a dirección das sombras e aporta a maior información respecto do resto de luces.
As luces, tanto principais coma de recheo, poden ser moi variadas; de moitos tipos e temperaturas de cor, que se empregan de formas distintas en función do que pretendamos contar.
Neste caso, voume centrar nas luces de recheo e en coma con materiais de papelería moi simples, podemos ter un control maior sobre a luminosidade da escea gastronómica. Para comezar debemos establecer o noso suxeito; eu vou empregar dous pratos diferentes do restaurante coruñés La Teresa para que se vexan ben as diferenzas: fror de alcachofa carbonara e tiradito de robaliza salvaxe soasada á bilbaína.
Coma luz principal podes empregar calquera luz, eu recoméndoche que empregues a luz dunha ventá grande que teñas no teu restaurante ou na túa casa, pero tamén podes empregar calquera tipo de led ou lámpara que teñas a man.
Unha vez tés definidos o teu suxeito, a túa escea e a túa luz principal, é o momento de decidir como queres que se vexan as sombras da túa imaxe; e para xogar con elas, basta que te achegues a unha papelería cercana e merques unha cartulina negra, unha branca e unha prateada. Tamén valen cartón pluma; materiais plásticos ou poliestirenos de obra; pero soen ser materiais lixeiramente máis caros; máis difíciles de almacenar ou cunha gama de cores máis limitada - e rara vez atoparemos o prata-. A estes elementos chamarémoslles reflectores, xa que a súa función é reflectir os raios que chegan da fonte principal para proxectar certo grao de luz - ou sombra - no suxeito.
Nas imaxes que vas ver a continuación, a fonte de luz principal sempre é a mesma e os reflectores están no mesmo punto, de tódolos xeitos, tés un pequeno diagrama de iluminación onde podes ver a colocación da cámara; do suxeito, o xarrón - que representa o prato -; a fonte de luz principal, a ventá; e os reflectores, que son os óvalos que hai á esquerda do suxeito.
![](https://revistapincha.gal/wp-content/uploads/2023/06/IMG_4812_B_web.jpg)
![](https://revistapincha.gal/wp-content/uploads/2023/06/IMG_4824_B_web.jpg)
Reflector branco
Este tipo de reflectores devolven aproximadamente entre un 40% e un 60% da cantidade de luz que reciben, e fan parecer que hai unha iluminación moi envolvente, xa que case todo o suxeito está iluminado, pero con sombras e matices.
Se observas a imaxe, verás que aínda que o prato de alcachofas (esquerda) está moi iluminado, aínda ten sombras proxectadas dende o lado dereito da imaxe, onde está a fonte de iluminación principal. Tamén se observan sombras debaixo do prato ou nos volumes, tanto das alcachofas coma da robaliza.
![](https://revistapincha.gal/wp-content/uploads/2023/06/IMG_4813_P_web.jpg)
![](https://revistapincha.gal/wp-content/uploads/2023/06/IMG_4825_P_web.jpg)
Reflector prata
Son reflectores moi potentes, devolven aproximadamente máis dun 80% da luz que reciben, e poden actuar coma unha segunda luz. A luz que dan estes reflectores é dura, xera moito contraste e dependendo do tipo de material, pode xerar moitos «puntos quentes», que son temas que xa veremos máis adiante.
Nestas imaxes, podemos comprobar que a luz é máis palpable no que antes eran sombras, as alcachofas e o touciño teñen moita máis luz e textura nas súas superficies, tamén observamos unha liña de luz na salsa. Pola parte da robaliza, vemos un efecto moito máis parecido a disparar un flash dende o lado contrario á luz principal. Tamén vemos unha iluminación moito máis presente nos platos e na mesa.
![](https://revistapincha.gal/wp-content/uploads/2023/06/IMG_4811_N_web.jpg)
![](https://revistapincha.gal/wp-content/uploads/2023/06/IMG_4823_N_web.jpg)
Reflector negro
Tamén se chaman reflectores negativos, isto é porque en contra dos anteriores, non reflicten a luz, senón que a absorben, ampliando a densidade das sombras.
Nas imaxes podes ver que as sombras son moito máis palpables na parte esquerda das imaxes, debaixo dos pratos, nos volumes das alcachofas, no aceite da robaliza e nas frores. Por outra banda, os pratos reciben menos luz e polo tanto as cerámicas brillan menos. É importante destacar que non hai unha fórmula correcta, depende do tipo de imaxe que queiras construir para o motivo específico, pero o recomendable é ir probando ata que atopes unha estética de iluminación que te convenza.
// Restaurante
La Teresa
- Fror de alcachofa carbonara
- Tiradito de robaliza salvaxe soasada á bilbaína
Rúa Capitán Troncoso, 12, 15001 A Coruña