Nano Unzueta, de Unzueta Cerámica: “Gústame investigar moito nos esmaltes”
![Nano Unzueta, de Unzueta Cerámica Nano Unzueta, de Unzueta Cerámica](https://revistapincha.gal/wp-content/uploads/2023/07/6d5a0eebdde7256d0cb1c11fc13315e45d7daf44.jpg)
Por Silvia Castiñeiras
O seu apelido delata a súa procedencia, pero este guipuzcoano é xa todo un galego con máis de 40 anos como veciño e artesán da nosa terra. Nano Unzueta chegou a Galicia nos 80 co obxectivo de pasar uns meses aprendendo a tornear o barro, para o que se desprazou a Buño. A súa historia dende entón continuou ata chegar a Brión, onde ten o seu obradoiro.
Como chegaches a crear o teu propio obradoiro?
Tras pasar tres meses en Buño hai xa 43 anos, marchei para Carnota a seguir experimentando e foi alí onde creei o meu primeiro obradoiro no ano 81. Despois montei o taller en Corcubión, logo volvín a Carnota, ata instalarme en Brión, onde xa levo 22 anos traballando no que máis me gusta. Deixei o meu emprego nunha fábrica para virme a Galicia, formarme nisto por uns meses e aquí sigo.
Que é o máis característico das túas pezas?
Fago pezas de uso cotián, o que se chama cerámica utilitaria, cuncas, ensaladeiras … O que me gusta é investigar moito nos esmaltes. O máis característico do meu produto, e polo que se recoñece, son precisamente os acabados. As miñas creacións identifícanse porque uso moitas cores, non son nada monocromático, iso non vai comigo, aínda que comercialmente é mellor. Uso como doce cores e combino, gústame que haxa variedade.
Cal é a túa relación coa restauración?
Os artesáns nisto temos unha vantaxe sobre a industria porque os cociñeiros, sobre todo os que ofrecen menús degustación, buscan algo específico e non unha produción en cantidade. Isto é como os bonsais, nos que o testo e a árbore teñen que ser un conxunto. Os cociñeiros piden o mesmo, que a comida e o prato na que se serve funcionen nun conxunto, e aí intervimos nós. Traballei moito con O Pazo en Padrón e con O’ fragón en Fisterra.
Que significa para ti estar baixo o paraugas de Artesanía de Galicia?
Cando vas fóra é cando máis te das conta da importancia deste selo. A xente doutras partes pregúntannos como facemos en Galicia os artesáns para estar tan ben coidados e para que todo funcione tan ben. Sorpréndense do bo traballo que se fai aquí. Ademais, teño que dicir que somos moitos e hai moi bo nivel en moi distintos eidos: cerámica, coiro, xoiería…
Fotos cortesía da Fundación Pública Artesanía de Galicia.
![UNZUETA_03](https://revistapincha.gal/wp-content/uploads/2023/07/UNZUETA_03-300x200.jpg)
![UNZUETA_04](https://revistapincha.gal/wp-content/uploads/2023/07/UNZUETA_04-300x200.jpg)
![UNZUETA_AMACETA_01](https://revistapincha.gal/wp-content/uploads/2023/07/UNZUETA_AMACETA_01-scaled.jpg)
Onde podemos mercar as túas pezas?
Vendo no meu taller de Brión (Rúa Gondar, 8, Lamiño), onde me gusta recibir visitas. Tamén estou na tenda Boles, en Santiago,
e na Real Fábrica Española, en Madrid.