Sardiñada popular parque de Santa Margarida
O Concello da Coruña promove este sábado a celebración da sardiñada popular do parque de Santa Margarida, unha actividade aberta á cidadanía coa que o Goberno de Inés Rey reforza a programación festiva previa á edición do San Xoán deste ano.
A sardiñada popular comezará ás 19.00 horas e está previsto que remate arredor das 23.00 horas. Repartiranse 500 quilos de sardiña fresca, o equivalente a unhas 3.500 racións. Cada ración terá un prezo de 1 euro, e inclúe sardiñas, pan e bebida. Ademais, e desde primeira hora, gaiteiros pertencentes á Asociación Cultural Xacarandaina amenizarán o evento. Xa posteriormente, está prevista a actuación dun DJ como peche do evento.
Os festexos do sábado estenderanse tamén ao anfiteatro do parque, onde ás 18.00 horas comezará unha foliada infantil con Xacarandaina, Son D’Aquí e San Pedro de Nós. Xa ás 21.30 horas, o grupo Lagharteiras actuará en concerto. A foliada continuará a partir das 22.30 horas con diversos grupos das asociacións Xacarandaina, Donaire, Santaia de Santa Cruz, Abaladeiras de Muxía, Santiaguiños de Boimorto, Cantigas e Agarimos de Santiago, Arume de Caión, Alxibeira de Narón e Carcaxía de Malpica.
As celebracións continuarán este domingo 18 pola mañá
Este domingo, e a modo de clausura, terá lugar a Romaría do Lecer, un festexo que comezará no parque ás 12.00 horas, e no que a Asociación Cultural Xacarandaina, co apoio do Concello, protagonizará diversas actividades de baile e música, ideadas para todos os públicos e con asistencia de balde.
