Santi Molezún: Un xenio do punk electrónico

Por César Varela de Historia do Rock Compostelán

Cada día que pasa creo máis no dito de que ‘Os vellos punks nunca morren’. Ou eran os vellos rockeiros? Para o caso é o mesmo, e se non existía, pois acabo de inventarmo, que non todo vai ser descubrir a pólvora. Recopilando datos para o libro que levo tempo elaborando, aí atrás empecei a falar con Santi Molezún, quizais para moitos descoñecido pola súa faceta musical e máis coñecido polo que é o seu oficio desde hai 40 anos: a videncia. Si, é certo! Santi leva toda a vida traballando como vidente, e durante anos puidestes velo en diferentes canles de Tv presentando diversos programas ou quizais moitos de vós asististes á súa consulta presencial ou telefónica. Pero Santi nos 80’s xa tiña a súa banda de Punk na cidade de Santiago de Compostela. Agora está moi de moda o Pan da Moa, pero daquela levábase máis o Punk The Broa. Ese era o nome da formación da que formaba parte o noso personaxe de hoxe, na que tocaba o baixo, aquel baixo negro que era case máis grande ca el e que ensaiaba nos Salesianos. Nunca chegaron a ser moi coñecidos, a verdade, pero a esencia punk daquela época mantense viva. Máis tarde, xa nos 90’s – 2000 chegaron as Queenpostelas, un dos primeiros grupos da escena Glam de Galicia, de dragformistas (Drag Queen) no que el se convertía en Elvira La Galáctica. Estas si chegaron a ter máis éxito, xa que desfilaron por diferentes programas de Tv, chegaron a petar a Praza da Quintana e ata tiñan gardacostas.

Despois de toda a loucura televisiva vivida durante tantos anos por Santi Molezún, que hoxe en día é unha marca rexistrada, decide abandonar os platós e hai un par de anos empezou a compoñer música de novo. O certo é que nunca antes o fixera, xa que como ben sabedes, o Punk é o Punk e punkto e aparte.

Un día levantouse da cama, e sen ter nin idea de compoñer, empezou a experimentar cun coñecido programa que se utiliza para crear música. El sempre desfrutou desta arte e agora mesmo dálle vida. En menos dun ano xa tiña unha chea de cancións compostas e pouco a pouco foinas editando en forma de EP´s, Maxis e apostas longas. Todas elas están dispoñibles nas máis coñecidas plataformas musicais (Spotify, iTunes, SoundCloud, Bandcamp…). De momento non se van poder palpar en estado sólido, pero todo chegará, ou non. A verdade é que é todo un logro, para como ben vos digo, non ter nin idea de compoñer, xa que os seus temas están estupendamente elaborados e a súa creatividade e coñecemento musical é tan amplo que nas súas cancións podes escoitar desde música clásica, flamenco, tangos, ritmos tribais, arábicos, rap e ata incluso rock and roll, todo entaboado baixo unha base de música electrónica. Pero non podería clasificar a súa música como tal, aínda que así sexa, xa que, se te atreves a escoitalo, que deberías!, levarate de paseo por tantos e diferentes terreos, que nun momento da viaxe non vas saber onde te atopas realmente. Así é a súa música, un tanto indescritible, pero desde logo, se te deixas levar por ela, estou seguro que a desfrutarás tanto ou máis como sei que o fai el á hora de compoñela. Realmente el tampouco se atreve a etiquetala e eu tamén fuxo moito de etiquetas. Compón música que se identifica con estados de ánimo, experiencias vividas, sentimentos e un tanto de loucura mental. Todos os temas teñen un sentido para el e trátase de que tamén o teñan para ti, se sabes captala.

Nestes momentos atópase tamén traballando por primeira vez como produtor, cun novo descubrimento que moi pronto dará moito que falar: Álvaro Snake.

Ademais, está en fase de elaboración do que será o seu novo traballo, que levará por título ‘Intimity Is Dead, secuencias íntimas e segundos íntimos’, que verá a luz nun EP que se publicará o vindeiro ano 2019 e no que Santi comporá tódolos temas utilizando as súas mans e afastándose dos Loops. Evidentemente, eu non adiviño o futuro, pero estou seguro de que nos sorprenderá…