fbpx

Axenda

Xul
22
Ven
Planazos MEGA
Xul 22 2022 – Xan 5 2023 all-day

MEGA Museo Estrela Galicia anuncia novos Planazos culturais e de lecer a partir do mes de xullo, que inclúen maridaxes, catas e concertos. Así, o segundo semestre de 2022 chega cargado de cultura cervexeira e novos plans a MEGA, un espazo museístico único en España, experiencial e divulgativo, deseñado para ver, cheirar, tocar e probar a cervexa, a súa historia e o seu estilo máis xenuíno.

Dentro desta nova programación de MEGA Museo Estrela Galicia destacan eventos singulares que aúnan cultura, música e gastronomía como unha Maridaxe Peregrina o venres 22 de xullo, ás 21.30h, onde a nosa orixe galega será o verdadeiro protagonista. A experiencia gastrocervecera correrá a cargo dun dos recoñecidos chefs de Coruña Cociña, onde non faltarán o acompañamento musical e algunhas das mellores variedades de Estrela Galicia: as cervexas do Camiño.

Do 5 ao 7 agosto chegaralle a súa quenda ao #BeerWeekend: unha fin de semana chea de sorpresas cervexeiras en MEGA para celebrar o Día Internacional da Cervexa. Así mesmo, xa en setembro, o público poderá descubrir no Museo de Estrela Galicia todos os segredos dun dos ingredientes basee da cervexa: o lúpulo, con novas vivencias exclusivas e interactivas ao redor da súa colleita.

Xa en outubro, o museo vestirase de longo para celebrar Sanmaín cunha experiencia que inclúe cervexas ancestrais e tapas festivas. En novembro regresarán os concertos en vivo, para gozar dun directo singular de música e cervexa ao máis puro estilo MEGA, como xa sucedeu este ano con bandas tan queridas como Fetén, Fetén ou Marlango. Finalmente, unha #NavidadNivelMEGA poñeralle a guinda á programación anual do Museo de Estrela Galicia do 17 de decembro ao 5 de xaneiro, con plans familiares do máis apetecibles en MEGA.

Ago
1
Lun
Festival C
Ago 1 – Ago 31 all-day

A concelleira de Acción Cultural, Mercedes Rosón, e o director-xerente do Auditorio de Galicia, Xaquín López, presentaron na Casa do Concello o Festival C, xunto ao deputado de Cultura da Deputación da Coruña, Xurxo Couto. O Festival C é o evento que vén celebrando nos últimos anos Compostela Cultura, a través do Auditorio de Galicia, para ofrecer unha programación variada e para todos os públicos ao longo do mes de agosto na cidade, maioritariamente na rúa. Todas as actividades serán de balde e van desde as artes escénicas e visuais ata a música, pasando polas letras con contos e poesía.

Luns de danza, martes de música e contos e mércores de circo e poesía
Os luns haberá danza no Cemiterio de Bonaval, sempre ás 20 h. O día 1 será o turno de ‘Emerxe’ de Galicia Danza Contemporánea que previamente, pola mañá, ofrecerán tres obradoiros dirixidos a distintos públicos, para continuar o día 8 con ‘Meeting Point’ de Ertza, dentro do ciclo Danza a Escena. O luns 22 chega Elvi Balboa co seu ‘Nasenda’ e pecharase a programación de danza o día 29 con Vacaburra e a Ukestra do Medio que presentan ‘Extravíos’.

Os martes haberá música: o día 2 ás 20 h co ‘Tierra y LIbertad’ de Wilson Saliwonczyk na Alameda e o día 30, tres eventos (unha conferencia, un concerto e unha sesión DJ) arredor da clausura de Cardinais, a Academia de Vertixe Sonora 2022, ao longo da tarde e en diferentes espazos da cidade.

E os martes tamén serán os días dos Contos no Parque, unha proposta do departamento de Lingua do Concello de Santiago dirixida aos e ás máis pequenas da casa. A cita será cada semana ás 18 h na zona dos arcos do parque de Bonaval e alí poderemos gozar o día 2 con Teatro Ghazafelhos e ‘A caixa sen Pandora’, o 9 coa ‘Roupa tendida’ de Xarope Tulú, o 16 con ‘Coser e cantar’ de Marta Ortiz, o 23 con A xanela do Maxín e o seu ‘Lúa quere viaxar a Marte’ para pechar o ciclo o día 30 con ‘Terra’ de Xogos Miudiño e ‘Orella pendella’ de Bea Campos.

Dentro das artes escénicas, ademais da danza, haberá unha ampla proposta de circo que terá lugar os mércores. Todos os eventos serán ás 20.00 h e na praza da Quintana agás o primeiro, ‘Pelat’ de Joan Catalá que será en Bonaval, xunto ao CGAC, o día 4. Os outros serán o 11 ‘Poi’ da Compañía d’es Tro, o 18 ‘MLM (Mentir lo Mínimo)’ de Alta Gama e o 25 ‘Kaldi’ de Al Grano. Ademais, haberá como xa é habitual ‘Circo no parque’, os obradoiros de circo para nenos e nenas de 3 a 14 anos con Circonove. Serán no Centro Xove da Almáciga, tamén os mércores pero de 11.30 a 13.30 h e haberá que inscribirse previamente en circonoveoficina@gmail.com.

Os mércores non só serán o día do circo, senón tamén da poesía coa proposta ‘Os fíos, as sementes’ que ofrecerá diversas voces ás 20.00 h no parque da Alameda, xunto á estatua de Lorca. O día 10 Alicia Fernández e Berta Dávila presentan ‘Poemas novos e vellos para un día de verán’, o 17 estará Jesús Castro Yáñez con ‘Seguir un rastro’, o 24 Isaac Xubín con ‘Non todo será silencio’ e rematará o 31 con Cinta Adhesiva.

Xogos e exposicións completan a proposta
As actividades do Festival C complétanse co Territorio Xogantín para a rapazada de 6 a 10 anos que ten unha cita para divertirse coa lingua galega como fío condutor todos os días do 1 de agosto ao 2 de setembro na praza 8 de marzo de 11.30 a 13.30 h. Trátase dun tempo de socialización a través do xogo e o patrimonio lingüístico vinculado a el, no que a cativada interaccione nun ambiente en que o galego é a lingua de referencia e se apropie do espazo público. Acolleranse participantes por orde de chegada ata completar o máximo de 20 e en caso de choiva será no CSC da Caramoniña.

En agosto tamén se poderán seguir visitando as dúas intervencións de Artes Visuais que ten abertas neste momento Compostela Cultura. No Auditorio de Galicia, ‘Sons improbábeis’, comisariada por Iñaki Martínez Antelo e na que podemos ver a proposta de 15 artistas que traballan co musical como tema dende disciplinas máis tradicionais da práctica artística como a pintura ou a escultura explorando as diferentes dimensións do son dentro das artes visuais. Do 15 ao 28 de agosto e as tardes dos domingos, o Auditorio estará pechado. O resto de días pode visitarse de 10 a 14 e de 16 a 20 h.

Na Zona C está ‘El jarrón infinito’, intervención que Mar Ramón Soriano (Valencia, 1993) contextualiza na investigación procesual e teórica que vén desenvolvendo ao situar a materialidade das cousas no seu centro de interese. Estará aberta de martes a sábado de 11 h a 14 (agás festivos).

PROGRAMA COMPLETO

Ago
19
Ven
Venres Troyanos
Ago 19 @ 7:00 p.m.

O Museo Casa de la Troya continúa coa súa actividade dos Venres Troyanos, que se poñía en marcha hai cinco anos con grande éxito entre o público de todas as idades. O primeiro destes roteiros terá lugar o 17 de xuño, e terá continuación ao longo de todo o verán. No mes de xullo celebraranse os días 1 e 22, e en agosto o 5 e 19.

Benigno Amor é o presidente da Asociación de Antiguos Tunos Compostelanos, entidade que xestiona o Museo. Explica que “estes roteiros culturais teatralizados por diferentes rúas e prazas do casco antigo de Compostela buscan achegar ao participantes, de maneira amena e divertida, os feitos históricos relativos ao tempo no que transcorre a novela de Pérez Lugín La Casa de la Troya”. Durante o percorrido explícase como era a cidade entón, os usos sociais hoxe desaparecidos e tamén se afonda nas personaxes e anécdotas da época.

Estes roteiros dramatizados pola cidade histórica compostelá partirán da praza de Mazarelos, ao pé da estatua de Montero Ríos, ás 19:00 h, e rematarán cunha visita ao Museo Casa de la Troya aproximadamente unha hora e media máis tarde, sobre 20:30 h. O número máximo de participantes por cada visita será de 15. Pódese realizar reserva previa enviando un correo electrónico a visitas@lacasadelatroya.gal ou chamando aos teléfonos do Museo (981 585 159 / 695 211 266). Teñen un custo de 5 € e de 2 € para os menores de 16 anos.

Estas visitas guiadas ofrecen a posibilidade de viaxar no tempo ata a Compostela de finais do século XIX da man de Casimiro Barcala, o estudante recreado por Pérez Lugín na súa novela; interpretado por Suso Martínez, historiador, guía turístico, divulgador e actor especializado na historia de Galicia, que leva máis dunha década realizando visitas guiadas dramatizadas. Nesta actividade búscase combinar a información cultural e histórica co humor. O guía vencellará os lugares que se visiten coa trama do libro.

Horarios do Museo Casa de la Troya

A vella pensión de estudantes poderá visitarse ata finais de setembro, en horario de 11:00 a 14:00 e de 16:00 a 20:00 h. Ata mediados de xullo abrirá de xoves e sábado e logo todos os días agás domingos e luns. Todas as visitas son conducidas polas guías do museo e teñen unha duración duns 25 minutos, en grupos de dez persoas máximo.