fbpx
CompostelaNovas

O festival de artes performativas Plataforma bota a andar en Compostela

Entre o 10 e o 18 de setembro de 2020 terá lugar en Compostela a primeira edición do festival de artes performativas Plataforma, un proxecto que baixo o fío da performatividade quere tender pontes entre as artes visuais e as artes vivas, a música, a arquitectura e o deseño. A terraza do Pazo de Raxoi acolleu a presentación do evento por parte da concelleira de Acción Cultural, Mercedes Rosó; o director xeral de Políticas Culturais, Anxo Lorenzo; o director do CGAC, Santiago Olmo; e os tres directores do festival, Mónica Maneiro, David Barro e Iñaki Martínez Antelo.

Dirixido por Performa S. Coop. Galega, Plataforma nace coa intención de traballar en rede e complicidade co maior número de axentes, institucións e espazos posibles dunha cidade referente cultural como Santiago de Compostela. Este é un festival de cidade, transversal, comprometido co urbanismo e a riqueza patrimonial material e inmaterial de Compostela, coa súa diversidade, coa igualdade, coa tradición e coa innovación cultural, preocupado pola sustentabilidade e por proxectar o talento local.

Para os directores do festival -David Barro, Mónica Maneiro e Iñaki Martínez Antelo- Plataforma é “un festival ideal para este momento de reactivación cultural pola súa transversalidade e a descentralización das súas localizacións, pola súa escala, pola súa programación pensada para espazos singulares e pola posibilidade de seguir con facilidade os debidos protocolos de sustentabilidade e de seguranza para a saúde nas súas accións e propostas”.

Mercedes Rosón amosou a súa satisfacción polo feito de que Santiago sexa a súa sede “estamos moi orgullos de que escollerades Santiago para a estrea de Plataforma, para esta primeira edición, unha cidade consolidada xa, desde hai moitos anos, como un referente cultural a nivel nacional. Porque este é un festival de cidade, que como ben se dixo na anterior presentación, caracterízase por ser transversal, comprometido co urbanismo e comprometido coa riqueza patrimonial material e inmaterial de Compostela”.

Nesa liña, unha das singularidades do festival é a programación de catro exposicións que expanden a súa temporalidade máis alá das datas do festival, contribuíndo á programación dos espazos que as acollen: La Ribot no CGAC; Christian García Bello na Fundación DIDAC; Manuel Eirís na Fundación Eugenio Granell e Mirar o son. Notación gráfica na música contemporánea no Auditorio de Galicia. Tamén que algunhas das súas actuacións soamente serían posibles nun contexto de festival, porque habitualmente non teñen espazo nas programacións museísticas ou nas programacións estables de ámbito cultural. Por outra banda, Plataforma fomenta a colaboración entre artistas de diferentes disciplinas, o que favorece o cruce de públicos diversos e singulares conexións creativas.

Plataforma é ademais un festival responsable, seguro, comprometido coa igualdade, coa diversidade cultural e coa sustentabilidade. Cunha importante representación feminina e cunha decidida aposta polo talento galego, Plataforma reúne performances, concertos, danza, poesía, deseño e arte contemporánea en exposicións, accións e conversas capaces de ligar a protagonistas galegos con valores de grande recoñecemento internacional como La Ribot, Premio Nacional de Danza e recentemente galardoada co León de Ouro da Bienal de Danza de Venecia, que pechará o festival cunha conversa, cunha performance e cunha exposición no CGAC.

No festival haberá estreas absolutas de pezas de artistas como Paula Quintas -coa dirección de Rut Balbís-; performances creadas especificamente para o festival, como é o caso das de María Roja, Alejandra Pombo e Berio Molina e Juan López; accións poético-musicais inéditas de Olalla Cociña e Menina Arroutada; estreas en España como a peza de Pablo Fidalgo e a estrea de pezas en Galicia, en galego e coa colaboración de artistas galegos, de artistas doutros ámbitos estatais como Marta Fernández Calvo -que traballará con Su Garrido Pombo, Paulo Pascual ou Faia Díaz- ou Cabello/Carceller -que o farán con Menina Arroutada, García MC, Rendi Nue e Dj Mill-.

Pódese consultar aquí todo o programa.

Orquestra Galega de Liberación 

No ámbito da música destaca a estrea e presentación do proxecto da Orquestra Galega de Liberación, conformada por dezaseis coñecidos músicos galegos que farán o seu primeiro concerto no Teatro Principal. Dezaseis músicos cun percorrido vital e unha traxectoria internacional que en poucas ocasións atopamos agromando un proxecto tan contemporáneo e tan ancorado no noso hábitat musical de vangarda. Son Xacobe Martínez Antelo (contrabaixo e dirección), Max Gómez (batería), LAR Legido (batería), Javier Pereiro (trompeta), Olivier Cano (saxo alto), Xosé Miguélez (saxo tenor), Diego Alonso (saxo tenor), Rosolino Marinello (clarinete baixo), Rubén Fernández (voz), Sheila Patricia (voz), Antonio Bravo (guitarra), Manuel Cebrián (guitarra), Elena Vázquez (violín), María José Pámpano (viola), Macarena Montesinos (violoncello), Saúl Puga (contrabaixo), Xurxo Pinheiro (son), Fidel Vázquez (iluminación) e Inés Portela (produción).

A Orquestra Galega de Liberación parte de material composto e arranxado para a ocasión, ao cal se lle suman as técnicas de improvisación dirixida, tales  como o Soundpainting, unha linguaxe de signos aplicada á composición multidisciplinar en tempo real. É unha técnica creada nos anos setenta en Nova York, e que Xacobe Martínez Antelo aprendeu e perfeccionou directamente da man do seu creador Walter Thompson.