fbpx

Axenda

Nov
2
Mér
Festival 23 aniversario Sala Mardi Gras
Nov 2 – Dec 6 all-day

A Sala Mardi Gras cumple 23 anos e van a celebralo por todo o alto. 23 actuacións para conmemorar o seu 23 aniversario ao longo dos meses de novembro e decembro.

Bandas e artistas desde Estados Unidos como Jive Mother Mary, Bart Davenport ou o bluesman JC Smith, do Reino Unido como Quireboys ou Booze & Glory (con varios polacos nas súas filas), desde Australia chegan The Meanies, teloneiros na última xira de Foo Fighters polo seu país, e de Nirvana nos 90 (levan máis de 30 anos de carreira) ou os fantásticos canadenses The Commoners, moi na onda Black Crowes.

Haberá tempo para eventos benéficos como os días 2 e 3 de decembro, o primeiro no ciclo ACCIÓN POR TODOS que coordina Edu Albo no que actuarán Rockers Go To Hell e Los Mecánicos. O sábado 3 a recadación será íntegra para CASCO, o comité Antisida da Cidade.

Tamén vivirán concertos do ciclo Kilómetro C de Estrella Galicia con La Paloma, banda madrileña que está a chamar a atención da crítica nacional.

Presentarán disco os fantásticos The Soul Jacket nun concerto organizado pola República Musical Mardi Gras. E veremos a The Exploding Boys, considerados o mellor tributo a The Cure en España e que nesta xira incorporan temas de Depeche Mode, Joy Division e New Order.

Máis información sobre cada un dos concertos en: salamardigras.com

Outono Códax 2022
Nov 2 – Nov 30 all-day

A procura de excitantes descubertas sonoras, achegar artistas e grupos de contrastada calidade que rara vez ou nunca actuaron en Galicia nin en España e enriquecelo todo cunha programación paralela de actividades en torno a cultura da música e do viño, son algúns dos sinais de identidade que veñen singularizando ao festival Outono Códax dende a súa primeira edición. E xa van unha ducia.

Un ano máis, e baixo o patrocinio de Bodegas Martín Códax, o festival impulsado por Raiña Pro e A Reixa representa fielmente ese espírito, cunha ecléctica combinación de propostas musicais que representan o variado abano e as múltiples vertentes da música negra. Doce concertos nos que terán cabida a elegancia do soul contemporáneo, o desparrame festivo do rock garaxeiro, a xenuína autenticidade das raíces de Nova Orleans, o R&B hipervitaminado, o soul de nova escola e mesmo o intimismo poético vencellado ao pop barroco doutras épocas. 

A de Big Chief Monk Boudreaux é unha das figuras estelares desta edición do Outono Códax. Non en van, é a primeira vez que o xefe indio de Mardi Gras, o «Ancián dos Anciáns», pisa territorio galego. Monk Boudreaux foi nomeado este ano ao premio Grammy na categoría Raíces Rexionais.

Tamén é sobresaínte a presenza de Carlton Jumel Smith, que chega acompañado por The Harrycane Orchestra. O elegante soulman norteamericano, que interpretou ao seu ídolo musical, James Brown, na película de Barry Levinson Liberty Heights, é o autor do aclamado disco 1634 Lexington Avenue. O soul contemporáneo, con influencias do rock dos 60 e 70, tamén estará representado na figura de Jesper Lindell Band.

Da vertente máis frenética do festival encárganse MFC Chicken, un dos grupos cun directo máis excitante da escena do garaxe-rock do Reino Unido. Nesa mesma órbita, pero neste caso influenciada polo espírito das raíces do blues, sitúase tamén a banda de Brooklyn Daddy Long Less, que será a encargada de abrir esta edición do festival.

A participación galega nos concertos do Outono Códax concrétase nas figuras de Nastasia Zürcher, que esta mesma semana ven de ser proclamada Artista do Ano nos Premios Martín Códax da Música, nos que tamén obtivo o premio ao mellor proxecto na categoría de Blues, Funk e Soul polo seu disco But life is beauty full, e por Moura, banda que mestura a neopsicodelia, o rock progresivo e o kraut-rock coa tradición musical galega.

O cartel do Outono Códax 2022 complétase con nomes como o do cantautor Bart Davenport, o representante da cultura festiva de Nova Orleans John “Papa” Gros, o blues de vella escola de JC Smith Band, o excitante trío da rockabilly gaditana La Perra Blanco ou a banda asturiana de rockabilly e blues primitivo Honky Tonk Heels.

A programación do Outono Códax 2021 completarase con dúas presentacións de libros a cargo de Xavier Valiño e Fernando Navarro, un ciclo de proxeccións adicado á música no cinema, unha noite de monólogos a cargo de Marta Doviro, Ledicia Sola e Carmen Méndez, sesións de Dj’s, catas de viño con maridaxe e ceas musicais con maridaxe de Martín Códax.

O festival dará comezo o mércores 2 de novembro e prolongarase ata o día 30 dese mesmo mes. Os concertos terán lugar na sala Capitol e no Riquela Club. Os abonos e as entradas estarán a venda a partir do sábado 8 de outubro en A Reixa-Matrioska (Compostela); Bonus Track (Ourense); Rock Box (A Coruña); Elepé e Honky Tonk (Vigo) y Carnaby (Pontevedra), así como a través de ataquilla.com.

Nov
26
Sáb
Concerto de ‘Monoulious DOP’
Nov 26 @ 9:15 p.m.

“Sábado” é o primeiro sinxelo do “Disco Disko”, o terceiro álbum de Monoulious DOP que sairá publicado no mes de novembro. O novo traballo discográfico coincide coa celebración do décimo aniversario da banda.

A canción que estrean en formato videoclip é un dos doce temas dun disco que navega por todos os xéneros musicais, desde o funkipop á electrónica, pasando pola bachata-disco ao rock. Fiel á súa identidade transgresora, o novo de Monoulious DOP é un convite á festa, con letras autocompostas cargadas de retranca e ritmos que prometen poñer a mover os pés!

A presentación oficial do disco será o vindeiro 26 de novembro na Capitol, en Santiago, nunha sala que prometen volver encher, como xa fixeran en febreiro de 2020 coa estrea do anterior traballo, o “Black Album”.

As entradas xa están á venda a través da plataforma Entradium.

Nov
27
Dom
‘Matinais Musicais’
Nov 27 @ 12:00 p.m.

A Xunta programa na Cidade da Cultura tres novos concertos do ciclo Matinais Musicais para este outono que achegan ao público as últimas creacións musicais de vangarda, o jazz e impulsan o diálogo entre Xapón e Galicia a través da música. Serán tres actuacións nas mañás dos domingos o 25 setembro, o 23 de outubro e o 27 de novembro e as entradas pódense adquirir xa a través de Ataquilla. 

As Matinais Musicais arrincan con Aruku – Camiñar e a cantante Ryoko Aoki, figura internacional do teatro Noh, unha das manifestacións máis antigas do drama musical xaponés. A súa presenza en Galicia ten ademais un carácter especial, xa que dará orixe a unha nova creación musical contemporánea que celebra o irmandamento das rutas de peregrinación do Camiño de Santiago e o Shikoku Henro. A artista nipoa estará acompañada polo dúo de pianistas Haruna Takebe e David Durán, de Vertixe Sonora.

O programa reunirá tamén a unha compositora orixinaria de Shikoku, Noriko Kawakami, co galego Xacobe Gaspar, nunha residencia artística no Gaiás que compartirán cos intérpretes, e que culminará no concerto de estrea o domingo 25 de setembro ás 12,00 horas no Museo Centro Gaiás.

Impulsado pola asociación Kyodo co apoio do programa O teu Xacobeo da Xunta de Galicia, a Fundación Japón e Yamaha, Aruku – Camiñar afonda no intercambio cultural, filosófico e creativo que os gobernos galego e xaponés veñen promovendo desde eidos como a cultura, o turismo e a educación.

Jazz e vangarda

No mes de outubro, será Lucía Martínez a encargada de poñer banda sonora ás mañás de domingo no Gaiás. A compositora e multi-instrumentista viguesa, unha das principais percusionistas de jazz de España, estará nas Matinais Musicais presentando o seu último traballo na compaña de tres músicos e amigos cos que forma o Lucía Martínez Cuarteto, un proxecto nacido na escola de Jazz no Porto hai máis de 12 anos. Será no auditorio do Edificio Fontán o domingo 23 de outubro ás 12,00 horas.

Calma e algo máis é o título do repertorio orixinal, un concerto de jazz contemporáneo que bebe de músicas moi diversas, as mesmas que Lucía Martínez explora na súa traxectoria: folk, clásica, flamenco e world-music, entre outras moitas.

Tamén no Edificio Fontán será o concerto co que ARXIS Ensemble pechará o 27 de novembro este ciclo das Matinais Musicais. A formación de música contemporánea propón un percorrido xeográfico e sonoro en cinco etapas para achegar ao público as composicións dos últimos 50 anos da música de vangarda. 

Obras de Hosokawa (Xapón), Scelsi (Italia), Saunders (Reino Unido-Alemaña), Posadas (España) e do galego Miguel Matamoro conforman Sobre a noite, un programa no que o son dos instrumentos semella facerse visible e tanxible, confundindo o ollo co oído.

‘Matinais Musicais’ infantís

Nesta ocasión, as Matinais Musicais da Cidade da Cultura contan tamén cunha actividade complementaria, de carácter gratuíto, pensada para favorecer a conciliación das nais e pais que asisten aos concertos no Gaiás. 

A través de xogos e obradoiros creativos, as nenas e nenos de 5 a 10 anos poderán coñecer diferentes aspectos relacionados co programa do ciclo. Desta maneira, procúrase que coñezan outras músicas e desenvolvan intereses culturais comúns coas súas familias. A reserva de prazas pode facerse a través de Ataquilla.

As Matinais Musicais Infantís forman parte do Plan Corresponsables posto en marcha pola Xunta para ofrecer alternativas de conciliación nas bibliotecas, arquivos e museos de xestión autonómica, a través do convenio asinado entre a Consellería de Cultura, Educación, FP e Universidades e a Consellería de Promoción do Emprego e Igualdade, co financiamento do Ministerio de Igualdade.

Dec
2
Ven
Butaca de jazz
Dec 2 @ 8:30 p.m.

Afundación presenta a terceira edición de «Butaca de jazz» na súa Sede da Coruña. Enmarcado no programa solidario da Obra Social de ABANCA, «Cultura por alimentos», este ciclo musical presenta o mellor jazz galego con poxección internacional para o público que, reconvertendo a súa entrada tradicional polo equivalente en alimentos non perecedoiros acuda aos tres recitais previstos ata o mes de decembro. A reserva de entradas pode realizarse xa en Ataquilla.com.

Esta nova edición está encadrada no programa de «Cultura por alimentos», mediante o cal Afundación muda a entrada ordinaria aos eventos culturais por unha entrega solidaria de alimentos non perecedoiros que se poderán depositar nos colectores habilitados ao efecto e que logo serán distribuídos polos bancos de alimentos locais. 

Esta terceira edición de «Butaca de jazz» segue mantendo o foco no jazz galego máis internacional, combinándoo con outras propostas de fóra de Galicia. Un ciclo de propostas persoais, no que o número tres devén no protagonista absoluto. Nesta terceira edición, preséntanse tres concertos de tres tríos de piano, contrabaixo e batería, poñendo de relevo as inmensas posibilidades alén da coincidencia instrumental. Tres proxectos con tres sons completamente diferenciados. 

Nesta ocasión «Butaca de jazz» presentará os recitais de Paco Charlín (venres 18 de novembro, 20.30 h), Lucia Fumero (venres 25 de novembro, 20.30 h) e Nani García (venres 2 de decembro, 20.30 h), e da pianista Lucia Fumero (venres 25 de novembro, 20.30 h).

Concerto de Rozalén
Dec 2 @ 8:30 p.m.

Para conmemorar dez anos na música, a artista rexistrou con mestría un conxunto de temas producidos por Ismael Guijarro onde rende homenaxe ao folclore e á música tradicional do noso país. O que propón é unha viaxe xeográfica -e tamén emocional- por toda a península a través de pezas que forman parte da nosa memoria colectiva e identidade; así como novas composicións inspiradas no cancionero popular. Para presentar este ambicioso traballo, Rozalén embárcase nunha xira de concertos nos que debullará estas composicións arroupada pola súa banda habitual. Desde maiores a pequenos poderán gozar dun espectáculo que fala de nós a través da música; abrazando a nosa historia con cancións fundamentais. Pasean, vexan… pero, sobre todo, escoiten e gocen deste emocionante proxecto.

Dec
3
Sáb
“Onde a Música Habita”
Dec 3 @ 12:00 p.m.

O Concello de Santiago; e a delegación de Santiago do Colexio de Arquitectos de Galicia (COAG Santiago) organizan un ciclo de catro concertos baixo a denominación “Onde a Música Habita”, que terán como escenario catro emprazamentos arquitectonicamente relevantes da cidade. Presentárono hoxe en rolda de prensa a concelleira de Acción Cultural, Mercedes Rosón, e o presidente do COAG Santiago, Ángel Cid.

Segundo manifestaron, o obxecto do ciclo de concertos é pór en valor a arquitectura notable da cidade como marco destas accións culturais. Trátase dun ciclo de concertos itinerantes que nace para achegar a música a espazos arquitectónicos referentes na cidade, espazos dos que moita cidadanía descoñece a súa relevancia arquitectónica, a pesares de ser edificios coñecidos e utilizados. Cada concerto será introducido polo actor Quico Cadaval, que contará aos asistentes a historia de cada localización. Tamén sinalaron, que en cada concerto a música porase ao servizo da arquitectura, adaptando cada proposta musical ás características do espazo.

O ciclo celebrarase os días 26 de marzo, co concerto de Guadi Galego no Colexio Raíña Fabiola; o 18 de xuño, co concerto de Laura Lamontagne & Picoamperio, Xardín das Pedras na Biblioteca de Fonseca; o 17 de setembro co concerto de Abraham Cupeiro no Museo de Historia Natural no Parque de Vista Alegre; e o 3 de decembro co concerto de Xan Campos Trío na Praza de Aurelio Aguirre en Conxo.

“Onde a música hábita”, “un título sinxelo pero cun contido moi potente” en palabras de Mercedes Rosón, que “resume a esencia do que serán estas catro propostas musicais. Resume a simbióse entre espazo e son, entre harmonía e arquitectura”. Para a concelleira, servirá para visibilizar e unir “ese inmenso patrimonio que ten Compostela coa cultura”. Uns espazos urbanos, engadiu, que agora se poñen en valor”, nunha primeira experiencia que “estamos seguros vai ser un éxito”. Ángel Cid amosou o seu desexo de que esta iniciativa “se convirta nun ciclo estable dentro da programación cultural da cidade, ademáis de ser un proxecto exportable a outras cidades”. Un ciclo, engadiu, que recolle ” a nosa fe na forza da música e da arquitectura para transformar o mundo”.

Guadi Galego no colexio no Raíña Fabiola

A iniciativa comezará este sábado, 26 de marzo, co concerto de Guadi Galego ás 12:00 h no Colexio Raíña Fabiola, obra do arquitecto italiano Giorgio Grassi, onde Quico Cadaval dará as claves desta construción.

Guadi Galego é unha das artistas máis relevantes da escena galega actual, froito dunha andaina musical que comezou sendo moi nova. En 1997 entra en Berrogüetto como vocalista, pianista e gaiteira e desde ese momento daría paso a unha carreira que a levou por un camiño cheo de éxitos musicais como Espido (xunto a Guillerme Fernández, Xosé Lois Romero e Xabier Díaz) ata o seu actual proxecto persoal, banda coa que está a traballar nun novo proxecto.

A faceta de teórico da arquitectura impregna toda a obra do italiano Giorgio Grassi. A súa idea de que os principios da arquitectura son únicos e inmutables reflíctese en toda a súa obra e, claro está, tamén no seu conceptual proxecto para un colexio público compostelán como o Raíña Fabiola. Construído nunha horta-xardín, nunha beira da cidade histórica, o severo edificio amosa na súa simetría e regularidade os valores de intemporalidade que lle permiten aparecer no centro do terreo como un volume sólido, sereno, sen formas sorprendentes.

As entradas para os concertos, que son gratuitos, pódense reservar na web de reservas.gal, no apartado “Onde a música habita”.

‘Hija de la Luna’ por Robin Torres
Dec 3 @ 10:00 p.m.

«Hija de la Luna – El mejor homenaje a Mecano del mundo» protagonizada por Robin Torres, volve despois de 6 anos de xira e con máis de 250 concertos por España e Latinoamérica, cun novo espectáculo baseado na xira máis importante da carreira de Mecano, DESCANSO DOMINICAL, que non só foi o seu disco máis vendido, senón que os catapultou á fama e consolidounos como a lenda que son hoxe para tantas xeracións.

Agora, en Santiago de Compostela poderase gozar dunha montaxe onde o vestiario e as coreografías están completamente renovadas, xunto a unha brillante escenografía e posta en escena espectacular, que farán que o público se reencontre coa verdadeira esencia de Mecano, e trasladaralles grazas a esta homenaxe, cualificado pola crítica como o mellor que existe ata a data!

Directo de ‘Los Jinetes del Trópico’
Dec 3 @ 10:00 p.m.

‘Los Jinetes del Trópico’ chegan a Santiago de Compostela!

Cumbia, reggaeton antimachista e merengue en forma de verbena tropical.

Dec
5
Lun
Octava edición de Fanzine Fest
Dec 5 – Dec 10 all-day

Fanzine Fest, o festival de música electrónica de vangarda de referencia no noroeste peninsular, regresará o próximo mes de decembro aos escenarios coruñeses para situar á cidade como a capital dunha experiencia sonora e visual única. A Coruña celebrará seis xornadas repletas de música electrónica de vangarda coa oitava edición do festival que, un ano máis, reunirá a figuras destacadas da música electrónica e artes visuais a nivel galego, nacional e internacional. Os tickets para os shows con entrada de pago xa están á venda na través da páxina web oficial www.fanzinefest.com.

Fanzine Fest desenvolverase en 5 localizacións da cidade da Coruña, con outros tantos escenarios. O da xornada inaugural será, como é habitual nas últimas edicións, o Planetario da Casa das Ciencias, que este ano se converterá no escenario Planetario x WE. A plataforma de sustentabilidade ambiental WE Sustainability exemplifica así o seu compromiso co festival, que desde 2019 aposta precisamente pola inclusión de actividades de coidado e respecto da contorna da man do proxecto galego. En Planetario X WE, o luns 5 de decembro, o público asistente volverá gozar de shows A/V e proxeccións inmersivas en formato full dome. O encargado de abrir a oitava edición do festival será o produtor galego afincado en Barcelona, Andrés Satué, co seu proxecto de electrónica experimental Huma. En Fanzine Fest presentará un directo exclusivo con visuais do berlinés Urok.

Outra das sedes do VIII Fanzine Fest será a Domus. Por unha banda, o martes 6 acollerá a xornada FPS-BPM, a sección dedicada especificamente á creación audiovisual e que conta con Juan Lesta e María Nuñez á fronte. O ciclo, que este ano celebra a súa terceira edición, contará con videoclips, videoarte e coloquios do audiovisual galego e nacional coa intención de xerar unha visión 360º da escena da videocreación. A entrada será libre ata completar aforo.

Ao día seguinte, o mércores 7, o auditorio do museo científico tamén será sede da terceira xornada do festival, na que o público gozará de dous live A/V: Frecuencias Ancestrales, de Beyond & Pedro Maia, no que ambos os artistas traballan co compositor mexicano Óscar Carrillo para revisar a música tradicional mexicana e comparala coa música avanzada do século XXI; e Ed is Dead (Edu Ostos), artista poliédrico que presentará na Domus un live co seu quinto e último traballo: Global Sickness.

O xoves 8 de decembro o festival vivirá unha xornada singular: Fanzine Fest sairá, por primeira vez na súa historia, á rúa. A praza de Azcárraga será o epicentro do escenario Cidade Vella, unha proposta de programación ao aire libre na que haberá unha sesión continuada de música con artistas da escena local, como Isaac Peces, Edgar Carl, Dj Elektrógena, Pablo Ruizgalán e Liños ou a madrileña afincada en Lugo Annie Hall; ademais de actividades e talleres para público de todas as idades. E, sen saír do barrio, o venres 9 pola tarde regresará outra das iniciativas clásicas do festival: Fundación Luís Seoane x SON EG. O centro de arte contemporánea acollerá, un ano máis, o escenario SON Estrela Galicia, con seis horas non-stop de vangarda electrónica asinadas polo estadounidense Detroit in Effect e os galegos Occy, Sergio Amaro e Roi. Ambas as citas na Cidade Vella serán de acceso libre.

Finalmente o sábado 10 Fanzine Fest poñerá o broche de ouro co seu mítico maratón na Sala O Túnel. Un peche ao grande, con 9 horas de música ininterrompidas na que se darán cita figuras imprescindibles da escena galega, nacional e internacional para que o público despida esta oitava edición como se merece: bailando. Polo escenario de O Túnel pasarán figuras como Reka, toda unha referencia dentro da escena internacional, ou Truncate, artista crave no desenvolvemento do xénero techno en EEUU. Tamén estarán Acoustic Trauma ou Komatssu, que presenta o seu live na Coruña tras dúas décadas de traxectoria; Death Whistle, que presentará un proxecto específico para a ocasión; Lefrenk & The Panic Room, que estrearán live AV; ou nomes como VJ Caskbel, Bombyx Blow & Baldo y Gnomalab.