Desliza á dereita, pero queda comigo

Chega o verán e con el as ganas de terraciña, vermú, concertos, novas experiencias con amigos, e xa estamos preparándonos para unha etapa de moito traballo pero... na Coruña hai tantas opcións cada semana que... como vou facer que me atopen e escollan o meu negocio entre tanta opción?

É un feito, estamos sobresaturados de estímulos e a información flúe tan rápido que o que hoxe é a máxima tendencia, mañá xa está esquecido. Por iso, hoxe en día máis que nunca, labrar unha reputación de marca sólida é quizais a parte máis importante da comunicación. Isto non só afecta a percepción do público sobre o teu negocio nun momento particular, tamén inflúe directamente no seu éxito a longo prazo, e por iso debemos coidar cada detalle.

Como no noso estudo nos gusta materializar as cousas e facérvolo sinxelo, dámosvos uns puntos para ter en conta, que aínda que parezan obvios, a miúdo se pasan por alto nos momentos máis frenéticos da tempada.

A túa comunicación sempre debe ser efectiva
Imaxina un restaurante que adoita ter unha atención fantástica, en pleno sábado noite e con toda a sala completa, pero... os pratos empezan a saír moi tarde, erroneamente ou esgótase o seu producto estrela. A forma na que o persoal manexe estas situacións pode resultar nunha mellor consideración do negocio, ou nunha mala reseña en internet, que resultará moi difícil de remontar. Que o persoal estea atento ao que está a pasar, dea alternativas, ou se desculpe xenuinamente cando as cousas non están a saír tan ben como deberían aporta máis valor á túa marca.

Ten un plan para xestionar as crises en tempo real
Cando xorde un imprevisto ou unha emerxencia, dar unha resposta rápida e coordinada é esencial. Para iso, debemos ter un plan estratéxico que responda a “que é o peor que pode pasar? E se sucede: quen responde? Como se xestionaría?”. Dedicar algo de tempo en formar ao noso equipo completo para que poidan responder con calma, seguridade e eficacia en situacións delicadas ou estar pendentes dos comentarios e críticas que recibamos e contestalos con cabeza (aínda que moitas veces sexa necesario pararse a respirar...), axudará a transmitir unha mesma mensaxe de compromiso coa calidade, pase o que pase.

Xera confianza a longo prazo
Construír e manter a confianza do cliente non é cousa dun día. A transparencia na comunicación debe ser constante, e non só cando se fagan as cousas ben. Os clientes valoran aquelas marcas que se esforzan por mellorar e crecer, buscando asesoramento cando o necesitan.

En definitiva, a reputación de marca é como unha relación de parella: pode empezar moi ben por un golpe de sorte, pero sen esforzo, empatía, constancia e dedicación... moi rapidamente poden bloquearte do seu corazón (ou moito peor, de favoritos en Just Eat).