Cogombros e cabaciña

Na primavera, a horta galega énchese de vida e cor grazas á chegada de numerosas verduras  e froitos de tempada. Consumir produtos propios desta estación non só garante mellor sabor e frescura, senón tamén un maior respecto polos ciclos naturais e polo medio ambiente. Ademais, é unha boa oportunidade para coñecer e empregar o léxico galego relacionado coa alimentación.

Entre as verduras representativas desta época atopamos a cabaciña, unha hortaliza moi versátil na cociña. En galego, cabaciña refírese ao que en castelán se coñece como ‘calabacín’. Pode empregarse en cremas, salteados ou mesmo rechea, e destaca polo seu sabor suave e textura tenra. A Real Academia Galega recolle como sinónimo a palabra subiote, que tamén é o instrumento que serve para asubiar.

Outra verdura típica da primavera é o cogombro, coñecido en castelán como ‘pepino’. Este froito da planta do mesmo nome é ideal para consumir en cru, en ensaladas ou como ingrediente refrescante en pratos fríos, moi apropiados cando comezan a subir as temperaturas.

É importante non confundilo co ‘cogombro do demo’ ou ‘cogombro explosivo’, que é unha planta silvestre non comestible, que se arrastra polo chan sen arraigar nel, dá flores amarelas e un froito que, ao madurar, bota as sementes a varios metros de distancia, coma se estoupase.

E sabes como se chaman aqueles cogombros que son de pequeno tamaño e adoitan comercializarse en vinagre? Non, non é necesario que digas ‘pepinillos’. O Dicionario de alimentación e restauración da Xunta de Galicia sinala dúas opcións: cogombro curto ou cogombriño.

ONDE PROBALO?

Unha boa maneira de incorporar estas verduras de tempada á nosa vida é a través da restauración local. Galicia conta cunha oferta cada vez máis ampla de locais vexetarianos e veganos que demostran que estes produtos, como a cabaciña ou o cogombro, poden ser protagonistas de pratos creativos, saborosos e modernos.

En Santiago de Compostela destaca A Porta Verde, un restaurante especializado en cociña vexetal que aposta por pratos saborosos e saudables elaborados con ingredientes de calidade. A súa proposta inclúe versións vexetarianas e veganas de receitas internacionais, pensadas tanto para persoas que seguen este tipo de dieta como para quen quere descubrir novos sabores.

Na Coruña, un dos locais máis emblemáticos é A Cuchara Veggie, un restaurante 100 % vegano que acadou este ano un premio a nivel estatal pola súa capacidade de reinventar pratos tradicionais galegos en versión vexetal. Un recoñecemento que chega tras máis dunha década de traballo impulsando a cociña vexetal na cidade herculina.

E se o que queres é preparalas na túa casa, os mercados municipais seguen sendo unha das mellores opcións para atopar verduras frescas de tempada, chegadas directamente das hortas da contorna.