‘Flat white’ e roliño de canela no Shot Me Coffee
Por Rebeca Munín
Que ás picheleiras e picheleiros nos gusta moito o café non é ningún segredo. E cada vez somos máis as que preferimos que este sexa de especialidade. Aínda que haxa que pagar un pouquechiño máis, primamos a calidade. Así que non debería sorprender a ninguén que na nosa cidade se atope a xa considerada mellor cafetería de España. Shot Me Coffee, na rúa dos Concheiros, obtivo o primeiro posto de Coffee Shop e o terceiro de mellor servizo nos BCN Coffee Awards que se celebraron hai unhas semanas con participantes de todo o país. Os seus responsables, Jacobo Abeijón e Beatriz Rial, non poden estar máis contentos!
Parabéns por estes galardóns! Está vindo máis xente a coñecervos grazas a este recoñecemento?
Jacobo: Moitas grazas! Si, a raíz do premio está vindo moita máis xente a botar unha ollada. Non o esperabamos. Sorprendeunos moito que non gañara algún local dunha gran cidade. E nós, encantados de poder dar a coñecer o que hai detrás deste produto.
E que é o que hai detrás do café de especialidade?
J.: Non é un café comercial e isto quere dicir un montón de cousas. Quen colleita o café é xente que dedica a súa vida a isto. Ao mellor teñen unha produción anual e, por tanto, buscan ter a mellor calidade posible. Recólleno a man e están adestrados para facer o proceso posterior, que é a fermentación dos grans de café, antes de que chegue a nós. Despois nós seleccionamos o mellor gran posible a través de importadores de café, probando diferentes lotes dos cafeais e escollemos o que queremos en cantidade. Unha vez que temos o saco, facémoslle o perfil de torradura que máis se axeite e pasamos a elaboralo aquí. En resumo, hai un traballo moi grande até que chega á cunca. Ao fin e ao cabo, isto é como ter alta gastronomía, a un prezo de diario.
Que se nota cando bebes ese café despois de todo ese traballo?
J.: Saben máis a froita. Nós buscamos que o sabor sexa o máis natural posible. Son ademais cafés que non saturan. Ti tómalo e vas quedar con bo recordo durante bastante tempo.
É un café que non necesita para nada azucre, non si?
Beatriz: Non, aínda que hai moita xente que non está acostumada a que cando lle sirvas o café non lle poñas o terrón de azucre ao lado. Cando preguntan, sempre recomendamos probar primeiro e a maioría sorpréndese e dáse de conta que non fai falla. De todas formas, temos dispoñible panela ou ágave para quen queira.
É certo que cada vez máis xente prefire este tipo de café de especialidade?
B.: Hai máis curiosidade, si. É un mundo que empezou aquí crecendo moi pouquiño a pouco, pero cada vez si que a xente se anima máis a ver que é o que ten de especial, cal é a diferencia co café de toda a vida.
Abristes o local en xullo de 2022. Por que aquí nun barrio como os Concheiros?
J.: Cando chegamos, a rúa estaba recentemente reformada. Perdera moita vida por tanto tempo de obras que houbo durante a pandemia e xusto despois dela. Tendo todo por facer, vimos un espazo perfecto para espallar unha novidade de negocio na cidade. No inicio foi complicado, pero unha vez que a xente empezou a probar o que facemos, sentimos un montón de cariño polo noso traballo.
B.: Temos moita clientela habitual, que sabe que imos rotando orixes e nos preguntan: “De onde vén o café que estou tomando hoxe?”, “Noto diferencia co anterior” ...
J.: Si, porque hai que subliñar que non gañariamos o premio, se a nosa clientela habitual non nos permitise ser quen somos. Quen pon realmente en valor o que facemos é o que vén aquí a consumir día a día.
Como chegastes vós a este mundo do café de especialidade?
J.: Eu estudiei hostalaría. Sempre busquei achegar a cultura gastronómica ao cliente final e isto só podía ocorrer sendo barman, que é o que fun a maior parte da miña carreira, ou barista. O primeiro café de especialidade que tomei na miña vida foi en Londres no 2012, porque en España case non se coñecía, e quixen entender o que había detrás.
B.: Eu empecei sendo consumidora de café de especialidade hai cousa de 10 anos, grazas a Jaco. Empezamos a ir a sitios moi guais, con perfís diferentes, a probar, experimentar...
Pero en Shot Me Coffee non hai só café. Que máis atopamos?
B.: Á parte do café que torramos nós mesmos, elaboramos a nosa propia repostería: dende o roliño de canela ata un biscoito de pistacho e espinacas. Temos tamén varias opcións veganas, somos local pet-friendly e temos bastante material á venda para xente á quen lle guste facer o seu propio café na casa.
