Conuco, experiencia e paixón polo café de calidade

^Por Patricia Dopazo de Gente que cuenta

Todo comeza cun café… E cun sorriso, a combinación perfecta para un bo día.

Cando pasas moito tempo na rúa por motivos laborais, aprecias os lugares que ofrecen boas ofertas gastronómicas e, sobre todo, onde te fan sentir coma na casa. Recunchos con personalidade, soños, ilusións e paixón. Lugares onde te acollen con agarimo e un bo saber facer. Propostas marcadas por unha agradable e única sensación caseira onde gozar do día a día. Espazos que concentran diferentes realidades vitais persoais baixo un mesmo propósito, a pausa nunha rutina, o goce dun momento, o poder compartir unha charla, o desfrute do día… O máis parecido a estar na casa fóra de ela. Oasis urbanos onde poder relaxarnos e desconectar uns minutos da rutina.

Pero que pasa se sumamos un café de calidade e especialidade, atención profesional, decoración, ambiente, música agradable e unha deliciosa carta de opcións caseiras doces e salgadas con que acompañar o momento. O resultado é Conuco. Curioso nome… Sabedes que é Conuco? Un sistema agroforestal de policultivo propio das illas antillanas e das rexións do Caribe de América do Centro, que consiste en pequenas parcelas de terra con diversas plantas que son utilizadas polo ser humano, e que apenas precisan rego ou laboreo.

Pero tamén… Un local situado na calle Orzán número 178 no que Delvis Marte, Mauro Ezequiel Reigada e Santiago Traba ofrecen toda a súa profesionalidade e amor polo seu traballo en crear un verdadeiro templo do café de especialidade na nosa cidade. Unha opción para crear un momento gratificante e positivo saboreando un magnifico e delicioso café.

Contan que Voltaire tomaba unhas cincuenta cuncas de café o día. O café inspira, activa e motiva. A que esperades? Un café?

Por que CONUCO?

A idea de CONUCO naceu hai case 10 anos nunha viaxe á miña terra natal, República Dominicana. Dende aquela viaxe quixen montar a miña propia cafetería, onde poder conectar coas orixes caribeñas do café e con rexións máis tropicais e traelos a España.

CONUCO é unha palabra de orixe taíno, os orixinarios habitantes do Caribe, onde se plantaban cacao, café e outros froitos.

Levades só medio ano na Coruña, que ofrecedes neste local?

Si, vimos de Londres e Madrid. Encántannos as bicicletas, o pan de masa fermentada, as cervexas e o bo café. Servimos un excelente café, torrado con cariño e coidadosamente seleccionado. O noso menú inclúe bocadillos, torradas e repostería. É pequeno porque cremos que menos é mellor, polo que a nosa selección cambiará segundo a estación e os teus gustos. O noso obxectivo é atopar a combinación perfecta para o teu café.

Unha frase que vos defina?

Do Conuco á túa casa é a esencia dos nosos valores. Levar do campo á túa casa produtos cultivados por pequenos artesáns, persoas con paixón e amor polo que fan, onde prima a calidade e o trato humano.

Que vos diferencia?

A experiencia e a paixón polo café de calidade, querer tostar o noso propio café no lugar, dar a mellor calidade do que servimos, tanto o café como o resto do menú; e conectar coas empresas locais para promover o traballo e os esforzos de persoas coma nós.

Que fai un bo café e  que fai  a un bo barista ?

Un bo café faise polo produto: o gran, a orixe, a colleita. Tamén o coñecemento e uso do produto, comprender como potenciar esa orixe (gran de café). Un bo barista está formado pola experiencia, a paixón, a cafeteira empregada e o resto do equipamento (muíño, auga, apisoadoras, etc.). En xeral, o que fai é desenvolver receitas ideais para cada método de extracción, dende máquinas de café expreso ata sistemas de filtración.

Pode un gran profesional mellorar o café de mala calidade?

Si, sempre. Cambiar a máquina, cambiar o método de extracción, facer unha cata previa para comprender a acidez e o amargor do café para buscar o mellor punto e método para ese café.

A mellor e a peor experiencia tomando café.

A mellor experiencia é nas granxas de café. Entendemos a terra, o medio ambiente, como plantan o café os produtores e os métodos que usan. É unha experiencia completa, auténtica e moi enriquecedora.

O peor foi non poder tomar un café na rúa cando cheguei a España.

Café favorito, orixe e por que?

Costa Rica e República Dominicana, polas miñas raíces centroamericanas, aínda menos coñecidas, que me gustaría potenciar.