Néboa na Ría: A madeira como medio de expresión na restauración

6 Maio, 2025 Ruth Rios

Inés Fernández e Marcelo Aldunce, parella e equipo creativo detrás de Néboa na Ría, son exemplo da nova xeración de artesáns galegos que combinan deseño e tradición para crear pezas únicas en madeira. O seu traballo, recoñecido dentro e fóra de Galicia, está moi vinculado á restauración, con produtos pensados para dar resposta ás necesidades específicas dos cociñeiros. A súa traxectoria está tamén marcada pola colaboración coa Fundación Artesanía de Galicia, entidade que ten un papel clave na promoción e profesionalización do sector artesán galego.

Inés, moitas grazas por recibirme. Para comezar, cóntanos como empezaches no mundo da artesanía.

Pois foi unha evolución natural. Somos dúas persoas, Marcelo e máis eu, parella e compañeiros de traballo desde hai moitos anos. Comezamos como deseñadores industriais cun estudo de deseño centrado no produto. Sempre tivemos en mente crear os nosos propios obxectos. Escollemos a cociña como temática e así comezamos a facer os primeiros prototipos, mesmo nós mesmos, con ferramentas sinxelas.

E en que momento decidides dar o paso a producir directamente?

Mentres deseñabamos, colaborabamos con artesáns da madeira que nos axudaban a materializar os nosos deseños. Así fomos coñecendo o proceso artesanal de primeira man. Cando sentimos que queriamos controlar máis partes dese proceso e experimentar libremente, decidimos abrir o noso propio obradoiro no 2021, ao que chamamos Néboa na Ría. A partir dese momento, todas as pezas saen integramente das nosas mans.

Como definirías as vosas pezas?

Son pezas en madeira, atemporais, sinxelas, pero con personalidade. Buscamos exaltar a beleza esencial dos obxectos, combinando texturas e pintura para crear emocións. Temos coleccións propias e tamén facemos pezas personalizadas para clientes, sobre todo no sector da restauración.

Que tipo de produtos facedes para restaurantes?

Creamos desde táboas para servir ata soportes para códigos QR ou tapóns de botella. Non nos centramos só na cociña como tal, senón en todo o espazo de interacción co cliente. A madeira dálle calidez e personalidade a eses detalles.

Como empezou a vosa relación co mundo da restauración?

Xa no estudo de deseño traballamos con restaurantes e sempre nos sentimos cómodos nese ámbito. Hai unha afinidade natural: tanto os cociñeiros como os artesáns buscamos excelencia e beleza nos procesos. Compartimos esa paixón polo detalle.

E como empezou a vosa relación coa Fundación Artesanía de Galicia?

Levamos arredor dun ano colaborando con ela. Son un gran soporte para os artesáns. Fan un labor de divulgación enorme e posicionan a artesanía galega como un referente de calidade. Participamos en iniciativas como Artesanía no Prato, onde cociñeiros e artesáns colaboramos para crear experiencias gastronómicas completas.

Onde podemos atopar os vosos produtos?

Na nosa web neboa.es, que intentamos manter actualizada, e tamén no noso Instagram @neboanaria, onde compartimos os últimos proxectos. Este ano participaremos en feiras, e tamén recibimos visitas no noso taller en Sada (A Coruña) se alguén quere coñecernos de preto

Néboa na Ría preséntase ao mundo como un obradoiro que crea desde Galicia obxectos con alma, feitos con calma, a pequena escala e con materiais reais.

Inés explica que deseñan produtos “para aqueles que adoptan un estilo de vida sinxelo e pausado, que valoran a autenticidade e o traballo feito desde o corazón. Creo que se pode gozar máis da experiencia diaria con deseños simples, fermosos e funcionais”.

En canto ás súas técnicas de fabricación, mestura as tradicionais coas modernas, fusionándoas para crear pezas auténticas que non deixan indiferente. “Fascíname o proceso de elaboración e como este deixa a súa pegada no produto final. Encántame traballar con calquera material que estea ao meu alcance, pero a miña experiencia principal é con madeira e pintura. Poño moito agarimo en cada un dos obxectos que conforman Néboa na Ría e creo que ese amor ao detalle queda presente no meu traballo”, asegura.

O seu é un deseño consciente, con creacións minimalistas que irradian calidez e equilibran a estética coa funcionalidade, e se inspiran na cultura atlántica e na natureza. Algunhas destas pezas podemos velas en restaurantes como Silabario (Vigo), LABe (País Vasco), A'De Lino Alta Taberna (Moaña) e Millo Orzán (A Coruña).

Néboa na Ría é unha das novas incorporacións na listaxe de obradoiros que forman parte da reedición do libro ‘Artesanía no Prato’, unha publicación que recolle as bases do proxecto homónimo impulsado pola Xunta desde 2013 co obxectivo de incorporar as pezas de Artesanía de Galicia como soporte dos menús de chefs galegos, promovendo así as sinerxías co deseño e a gastronomía.