Lecer coas nosas mascotas

Por Ruth Ríos

Os gatos e cans xa son parte das nosas familias. Hai quen lles considera como un fillo máis, así que participan das nosas saídas a bares, restaurantes e mesmo hoteis. Eles tamén teñen dereito a vacacións! Por esta razón, en Pincha queremos facer un percorrido por esta tendencia na hostalaría e nos preguntamos pola situación en Coruña de locais ‘pet friendly’. Hai suficientes? Compren con todas as normas para o benestar das nosas mascotas e a boa convivencia entre peludos e humanos?

Para pescudalo, preguntamos primeiro á especialista Mónica Cubeiro, quen baixo a marca Monicán exerce dende fai 15 anos como consultora ‘pet friendly’, aconsellando ao sector de hostalaría e turismo sobre creación de convivencia respectuosa.

Recordemos que só en Galicia hai 720.000 cans rexistrados e mesmo hai xa máis cans que menores de 30 anos. Os cans son as novas crianzas! Por iso Monicán ofrece consultoría para o sector turístico e hostaleiro, propoñendo experiencias que faciliten a convivencia con cans, adaptadas ás necesidades das familias e ás esixencias legais e ambientais. O obxectivo é lograr unha estadía harmoniosa entre amantes dos animais e aqueles que non o son tanto, asegurando que as actividades sexan axeitadas para todos.

Sobre a saúde de locais ‘pet friendly’ en Coruña, Mónica di que o sector privado realiza grandes esforzos para ser máis acolledor cos animais, incluíndo aloxamentos e establecementos de hostalería. A experiencia entre usuarios e mascotas é, en xeral, positiva, pero depende do comportamento dos propietarios e da súa consideración co entorno. Mónica destaca ademais a diferenza entre «aceptar mascotas» e «permitir o acceso de animais», subliñando que aceptar implica unha benvida activa, mentres que permitir pode ser visto como unha obriga.

Para aqueles que buscan lugares amigables coas mascotas en Coruña, a especialista sinala, entre outros, Bido (rúa Marcial de Adalid, 2), do recoñecido chef Xoán Crujeiras.

E como ese, contamos na cidade, por sorte, con moitos bares e restaurantes que exemplifican como o sector privado está adaptándose para ofrecer un ambiente máis inclusivo para as mascotas, mellorando a experiencia para os propietarios de animais. Falamos, por exemplo, de Bordello Parlour (en rúa Varela Silvari 2). O seu responsable, Miguel Arbe, tivo claro desde o principio que o seu establecemento ía ser ‘pet friendly’: “Sempre me gustaron os animais e nunca tiven ningún problema con eles. Pórtanse mellor que as persoas!”. O cocteleiro asegura ter moita clientela que acode cos seus cans, aos que recibe con auga nun bebedoiro que ten na porta e cun “premio” en forma de petisco para animais.

Miguel Arbe, de Bordello Parlour: “Sempre me gustaron os animais e nunca tiven ningún problema con eles. Pórtanse mellor que as persoas!”

Hoteis felinos

Para os que buscan un lugar onde deixar en boas mans aos seus gatos durante as súas vacacións, temos en Coruña o hotel felino Surfer Pets (Rúa Voluntariado,3).

Surfer Pets naceu a finais de 2022  como un pequeno comercio especializado no coidado de mascotas, que ademais ofrece a posibilidade de aloxar aos nosos amigos ‘gatunos’ durante as nosas estancias fóra de Coruña.

Yessihe Velasco, veterinaria e responsable do centro, cóntanos que o segredo do seu éxito reside no trato próximo e atento ao cliente, así como na calidade dos produtos e servizos que ofrecen. Durante a estancia dos animais en ‘Villa Gatitos’, as coidadoras (Yessihe xunto a Sara Dans e Valeria Pérez) asegúranse de que os gatos se sintan coma en casa, proporcionando xogos, mimos, comida de calidade (incluíndo comida húmida) e chuches adaptadas ás preferencias de cada “residente”. Tamén realizan coidados como cepillado e corte de unllas, e utilizan diversos métodos para axudar á adaptación ao novo ambiente.

A clientela é diversa, abarcando idades entre 25 e 65 anos e incluíndo homes, mulleres e familias, principalmente da zona céntrica e do casco antigo da cidade, que coñecen o local polo boca a boca, resolvendo ademais a principal preocupación dos donos e donas cando confían ao seu felino: que estea ben tratado. Para dar tranquilidade aos seus clientes, Yessihe e o seu equipo ofrecen facer un seguimento a través de vídeos, fotos e videochamadas. Así os ”pais” e “nais” están atentos ao día a día do seu gato e gata como se estiveran na súa propia casa. Desta maneira todos teñen a seguridade dunhas vacacións felices.

Cafés felinos

Continuando a nosa viaxe pola hostalaría ‘pet friendly’ galega, marchamos da Coruña para visitar en Vigo un local moi especial: o Ailuro Cat Café, un proxecto innovador de dúas rapazas emprendedoras (Carla Monzón e Yaiza Alén), que uniron a súa paixón polos gatos e o amor polo café.

Ailuro Cat Café é o primeiro da súa especie en Galicia -este concepto de local naceu en Tai wan alá polo 1998- e tamén funciona como centro de adopción. As súas fundadoras cóntanos que, inspiradas nas súas viaxes a Australia e Lisboa, ofrecen un espazo acolledor onde os visitantes poden interactuar cos felinos e, se o desexan, adoptar un dos gatos alí acollidos. O café colabora con «Gatiños da Rúa», funcionando como intermediarios para a adopción.

Ailuro destaca pola súa atención ao detalle no proceso de adopción, que inclúe entrevistas e visitas para asegurar que cada gato atope a familia adecuada. O ambiente do café está tematizado en torno aos gatos, con cuncas decoradas, libros sobre felinos e un espazo que crea unha atmosfera relaxada e caseira. Desde a súa inauguración en xaneiro de 2024, Ailuro recibiu unha acollida moi positiva entre os vigueses e viguesas, que atopan un lugar onde adoptar ou simplemente tomarse un café ou teletraballar en compañía felina, por algo a palabra “ailuros” significa gato en grego.