Bocadillo Riquela no Riquela Bar
Por @JuanEAT_o
O que máis me gusta do meu traballo na Revista Pincha é ter a sorte de poder degustar as marabillas gastronómicas que temos na nosa cidade e sempre nun sitio diferente. Hai quen di que as miñas humildes opinións son case sempre boas. Certo. Será porque son de bo dente ou porque ninguén pode negar que en Compostela se come moi ben. E o Bocadillo Riquela non ía ser unha excepción.
O primeiro que chamou a miña atención deste bocadillo foi o seu acompañamento, xa que un podería esperar unhas patacas ou algunha guarnición máis potente, pero non. Gustoume que apostaran por un toque verde e máis saudable, como é a eiruga.
Outro punto a destacar é que a carne de tenreira vén en tiras, no seu punto e tenra. Ademais, a cebola violeta xunto co pemento verde e os champiñóns cunha cama de queixo fundido dan como resultado un sabor único e interesante. Un queixo, por certo, que non enzoufa, o que se agradece moito. Para min, tanto este detalle, como a elección do pan son os que marcan a diferencia entre un bo ou un mal bocadillo. Ás veces, sobre todo neste tipo de pratos ou nas hamburguesas, aínda que o pan estea bo resulta pequeno para o contido que lle botan e, claro, faise toda unha aventura comelo sen que se desfaga. No Riquela apostan por unha peza de Pan da Moa que aguanta moi ben e permite gozar do bocadillo do principio ate o final.
En resumo, unha delicia para eses momentos nos que queres comer algo rápido sen que sexa moi pesado, con bo produto e un sabor único.
