‘Galicia Escena PRO’ comparte co público os seus 21 espectáculos en cartel
Ademais dun mercado profesional focalizado na contratación de espectáculos, Galicia Escena PRO é tamén unha gran festa cultural, que se abre ao público xeral para compartirlle unha nutrida escolma de propostas de teatro, danza e circo.
A Xunta de Galicia e a asociación Escena Galega organizan esta 12ª edición da feira, que do 2 ao 5 de xuño congregará uns 200 profesionais da programación, distribución e produción escénica arredor dun intenso programa de exhibición de espectáculos, presentacións de proxectos, reunións personalizadas e mesas de debate.
Ademais e como en anos anteriores, as persoas non acreditadas teñen tamén a oportunidade de gozar deste evento, que pon á súa disposición a asistencia de balde ás 21 montaxes seleccionadas para a súa representación no Auditorio Abanca, Igrexa da Universidade, Salón Teatro e Teatro Principal, así como noutros espazos ao aire libre.
Deste total de propostas, 18 son de produción galega, mentres que as tres restantes chegarán desde a Comunidade Valenciana e Madrid grazas ao acordo de intercambio que Galicia Escena PRO mantén con Dansa València e MADFeria.
A selección que ofrece esta 12ª feira combina compañías de longa traxectoria no panorama teatral galego con formacións de máis recente creación, así como distintas disciplinas e unha ampla variedade de tendencias escénicas. Así, na escolma galega figuran 12 espectáculos teatrais, dos que catro están pensados para o público familiar, cinco de danza e un de circo.
O público xeral pode acceder de balde aos espectáculos, previa retirada dos convites no Museo das Peregrinacións, sede da Zona Pro, de 9,00 a 14,00 h. e de 16,00 a 19,00 h. durante a celebración da feira.
