Encantos en Compostela encherá de maxia a cidade e a súa contorna do 10 ao 12 de outubro
Santiago volverá encherse de ilusión coa segunda edición do festival de maxia ‘Encantos en Compostela’, que se celebrará do 10 ao 12 de outubro. O festival busca ofrecer unha experiencia para todos os públicos, combinando entretemento, participación e sorpresa.
A concelleira de Capital Cultural, Míriam Louzao, presentou na Casa do Concello a programación do festival, acompañada por Sara Rodríguez, Óscar Fernández e Eloy Fernández, por parte da organización.
Louzao lembrou que ‘Encantos en Compostela’ é unha das propostas beneficiarias das axudas que o Concello de Santiago concedeu este ano para a realización de actividades culturais do sector profesional, coa finalidade de diversificar a programación da cidade e estimular o tecido cultural local.
O festival medra en extensión, saíndo do centro histórico e espallándose cara aos barrios e parroquias de Compostela para crecer en accesibilidade. E faino tamén en inclusión e solidariedade, con actuacións no Hospital Clínico Universitario e nas residencias de maiores para achegar ilusión a residentes e visitantes.
Nesta segunda edición, o festival, dá o salto internacional traendo a prestixiosos e galardonados magos nacionais e estranxeiros como Gonzalo Albiñana, gañador do Gran Premio Extraordinario de Maxia 2023, e o recoñecido mago Axel Hecklau, cunha ampla traxectoria e varios premios mundiais no seu haber. Ademais reforza a súa aposta polo talento galego, contando coa participación de destacados magos e magas como Samuel Moreno, Eloy Fernández e Iago Saavedra ademais de Óscar Fernández e Sara Rodríguez, creadores do proxecto. Estes artistas traerán ao público espectáculos variados, desde a maxia familiar e participativa ata a maxia de cerca, coa que o ilusionismo se experimenta a poucos centímetros.
“Encantos en Compostela preséntase como unha celebración de creatividade, talento, e compromiso; unha mostra máis de que a cultura, alén de entretemento, pode e debe ser motor de cohesión social, participación e comunidade nesta capital cultural orgullosa de si”, afirmou a portavoz do goberno local.
Sara Rodríguez, que é a única maga presente na programación desta edición, sinalou que “por sorte, cada vez son máis as mulleres” que se dedican á maxia, pero aínda así, resulta difícil atopar profesionais para participar en festivais coma este.
No mesmo senso, Eloy Fernández, da asociación Compostela Máxica, explicou que o sector está a traballar na perspectiva de xénero e, aínda que seguen a ser maioría de homes, pouco a pouco vanse unindo máis mulleres. “Por iso é importante que se atopen un ambiente acolledor e referentes ás que seguir. Debemos poñer o foco na igualdade”, opinou.
Descentralización
Pola noite, a maxia transforma o centro urbano en espazo de ilusión e sorpresa coa celebración de sesións de maxia de cerca, que forman parte do programa local “Habelas Hainas” e se realizan en colaboración coa asociación Compostela Máxica. Estas funcións, de acceso con entrada simbólica, permiten experimentar o ilusionismo a poucos centímetros, nun ambiente íntimo e envolvente, achegando o público a unha das expresións máis puras e fascinantes da maxia contemporánea.
Un ano máis, a maxia solidaria segue sendo un dos eixes centrais do festival. Nesta edición, levarase ilusión a tres residencias de maiores de Santiago e ao Hospital Clínico Universitario, garantindo que a maxia chegue a quen máis o precisa.
Encantos en Compostela é unha iniciativa da compañía Magia en la Manga, que conta co apoio do Concello de Santiago de Compostela. Desde a súa primeira edición en 2024, o festival consolidouse como un referente cultural na cidade, promovendo a maxia como unha arte escénica accesible, inclusiva e familiar, e facendo de Santiago un espazo de encontro e descubrimento para artistas e público de todas as idades.
Toda a información sobre a programación, horarios e reservas para as sesións de maxia de cerca está dispoñible na web oficial: encantosencompostela.com.
MAGOS
Axel Hecklau
Con máis de 30 anos de experiencia, Axel Hecklau consolidouse como un dos magos máis creativos e recoñecidos de Alemaña. A súa paixón pola maxia de cerca levouno a desenvolver efectos innovadores e a perfeccionar cada detalle das súas actuacións, ofrecendo ao público experiencias máxicas inesquecibles.
Gonzalo Albiñana
Especialista en teatro de sombras, diseña e presenta maxia para eventos, artistas e compañías; asesora e colabora en producións, desenvolve efectos e transforma ideas en experiencias escénicas memorables, integrando sempre técnica, narrativa e estética. Todo cun estilo propio, marcado pola creatividade… e cun inconfundible toque de absurdo.
Sara Rodríguez
A maxia de Sara pódese definir como profesional, coidada e impactante, chea auténticos imposibles que deixarán abraiado a calquera público. Sen dúbida a maxia é a súa gran paixón, e lévaa a outro nivel grazas á súa meticulosidade e atención ao detalle, como pode testemuñar calquera que a teña visto coa baralla nas mans. A pesares da súa aparencia formal e profesional, Sara sempre garda un as na manga. Sabe aderezar as súas actuacións cun humor cáustico e intelixente e coa súa singular retranca.
Óscar Fernández
Gusta de encher a súa maxia de significado e ten un estilo que se pode describir como vangardista, pero cunha marcada influencia dos grandes mestres da maxia clásicos e modernos. Nas sesións familiares preséntase como un mago moderno e pillabán. Mais cando fai maxia de cerca para grupos reducidos deixa ceiba a súa face máis artística, contemporánea e subversiva, buscando provocar o pensamento do seu público.
Samuel Moreno
Con un estilo único e unha presenza carismática, Samuel Moreno transforma cada actuación nunha experiencia inesquecible. Os seus espectáculos combinan ilusión, humor e narrativa, atrapando ao público dende o primeiro momento.
Samuel converte a maxia nun viaxe de asombro e diversión que deixa pegada en todos os espectadores.
Eloy Fernández
Eloy Fernández é un ilusionista e xestor artístico compostelán, especializado en cartomaxia e maxia de cerca. Nas súas creacións conflúen a súa visión artística, vencellada á corrente construtivista galega, co seu afán divulgativo, concebindo os seus efectos como unha vía para achegar ó público ao fascinante mundo do ilusionismo.
Iago Saavedra
Iago Saavedra mestura ilusión, creatividade e talento escénico para crear espectáculos que captan a atención dende o primeiro instante. Cada truco é unha historia, cada actuación unha experiencia que combina emoción e diversión. Ideal para todos os públicos, Iago transforma calquera evento nun recordo inesquecible.
PROGRAMACIÓN
Venres 10 de outubro
11:00 h | Óscar Fernández | MAXIA SOLIDARIA NAS RESIDENCIAS | Para público do centro
Residencia Volta do Castro
11:30 h | Iago Saavedra | MAXIA SOLIDARIA NAS RESIDENCIAS | Para público do centro
Residencia de maiores Fundación Amancio Ortega
12:00 h | Samuel Moreno | MAXIA SOLIDARIA NAS RESIDENCIAS | Para público do centro
Residencia DomusVi (San Lázaro)
12:00 h | Eloy Fernández | MAXIA DE CERCA | Para todos os públicos
Ratiños Coffee Shop | Entrada libre ata completar aforo
18:00 h | Sara Rodríguez | MAXIA FAMILIAR | Para todos os públicos
CSC O Romaño | Entrada libre ata completar aforo
18:30 h | Samuel Moreno | MAXIA FAMILIAR | Para todos os públicos
CSC José Saramago de Vite | Entrada libre ata completar aforo
19:00 h | Samuel Moreno | MAXIA DE CERCA | Para todos os públicos
Academia FlyingFun | Reservas na páxina web
19:00 h |Eloy Fernández | MAXIA DE CERCA | +12 anos
Meiga Backpackers Hostel | Entrada libre ata completar aforo
20:30 h | Axel Hecklau | MAXIA DE CERCA | +12 anos
Museo de maxia | Entradas na páxina web
22:30 h | Eloy Fernández | MAXIA DE CERCA | +12 anos
Bar Entreportas | Entradas na páxina web
Sábado 11 de outubro
12:00 h | Gonzalo Albiñana | MAXIA FAMILIAR | Para todos os públicos
CSC de Fontiñas | Entrada libre ata completar aforo
12:00 h | Eloy Fernández | MAXIA DE CERCA | Para todos os públicos
A Medusa Pub | Entrada libre ata completar aforo
18:00 h | Iago Saavedra | MAXIA FAMILIAR | Para todos os públicos
CSC Vidán | Entrada libre ata completar aforo
18:00 h | Gonzalo Albiñana | MAXIA FAMILIAR | Para todos os públicos
CSC de Laraño | Entrada libre ata completar aforo
19:00 h | Eloy Fernández | MAXIA DE CERCA | Para todos os públicos
Casa das Crechas | Entradas na páxina web
Domingo 12 de outubro
11:00 h | Gonzalo Albiñana | MAXIA SOLIDARIA | Para público do centro
Sala Andrea H. Clínico
12:30 h | Iago Saavedra | MAXIA FAMILIAR | Para todos os públicos
CSC Casa Agraria | Entrada libre ata completar aforo
12:30 h | Samuel Moreno | MAXIA FAMILIAR | Para todos os públicos
Pavillón Multiusos de Lavacolla | Entrada libre ata completar aforo
18:00 h | Samuel Moreno | MAXIA FAMILIAR | Para todos os públicos
CSC Aurelio Aguirre de Conxo | Entrada libre ata completar aforo
