Unha corentena de locais participarán no Santiago(é)tapas
A concelleira de Turismo de Santiago, Míriam Louzao, acompañada da presidenta da Asociación Hostalaría Compostela, Sara Santos, e de representantes de empresas e entidades patrocinadoras de Santiago(é)tapas; como Pedro López, Trade Marketing Horeca Hijos de Rivera, e Guillermo Fernández, delegado comercial de Hijos de Rivera; Bruno Hermida, promotor de vendas de Café Dromedario, e Miguel Sandá e Simón Quintela, xefe de zona e xerente de Cash Record Santiago, visitou na sede da Asociación o proceso de preselección das tapas da vindeira edición do concurso, que terá lugar do 15 de febreiro ao 3 de marzo. Os participantes na visita puideron ver a proposta de Cacao, un dos locais de hostalería que se estrean nesta edición de Santiago(é)Tapas.
Nesta edición, dende Turismo de Santiago tomouse a decisión de trasladar o concurso do mes de novembro ao mes de febreiro a petición da Asociación Hostalaría Compostela, debido a que o mes de novembro tense xa consolidado como un mes con moita actividade para o sector.
Segundo destacou Míriam Louzao, “nesta edición contamos con 41 locais participantes, tres máis que os que houbo na pasada edición de novembro do 2022. Este aumento de participación amosa que o cambio para febreiro foi unha decisión que permitirá darlle un novo pulo ao concurso e fomentar a desestacionalización neste mes de tempada baixa”.
A xerente de Turismo de Santiago, Flavia Ramil, apuntou que “dende a entidade municipal estamos facendo un esforzo moi importante para adaptarnos á petición da Asociación Hostalaría Compostela de cambiar de datas o concurso, pero confiamos que o cambio teña uns resultados positivos para o sector”.
Pola súa banda, Sara Santos, presidenta da Asociación Hostalería Compostela, agradeceu o apoio dos patrocinadores e mostrouse moi satisfeita por “volver atopar a moitos dos xa habituais do concurso, xunto a outros novos que se presentan este ano por primeira vez para demostrar a calidade da oferta hostaleira da cidade”.
Os patrocinadores, pola súa banda, coincidiron en destacar o valor da iniciativa que une as súas marcas á hostalería e mostráronse entusiasmados con esta nova edición que demostra “a consolidación e a evolución” do concurso.
Por outro lado, o profesor Xosé Quintáns, que forma parte do xurado desde hai anos, destacou que a hostalaría compostelá ten “un nivel moi bo” e que os establecementos que xa participaran noutras edicións “teñen máis dominio do que presentan e adáptanse máis ás normas do concurso no referido ao tamaño e presentación das tapas”. Estando preto o Entroido, Quintáns pensa ademais que pode ser que algunhas propostas se inspiren nos produtos propios da época.
Non o fixeron así en Cacao, o local que presentou a súa tapa durante a visita. Alberto Lareo, chef executivo, explicou que eles decidiron facer algo “moi de mar”. Trátase dun ravioli de boi con bechamel de algas. “Para nós, sendo un espazo novo, cremos que nos vai vir moi ben participar neste concurso. Penso que nos vai axudar a achegarnos máis á xente da cidade, que nos coñezan e vexan o que facemos”.
Cursos e agasallos para os participantes
Entre as novidades desta edición atópanse varios cursos de formación e sorteos de agasallos para os locais participantes no concurso. Así, o primeiro obradoiro, que se celebrará os días 29 e 30 de xaneiro, será un Curso de Iniciación Barista a cargo de Karen Quiroga, formadora de Café Dromedario, para o que xa está aberta a inscrición ata o 25 deste mes. O curso desenvolverase en quendas de dúas horas, entre as 09.30 e as 11.30 horas, e de 16.00 a 20.15 horas, estando limitado a 10 persoas por quenda, debendo formalizar as súas inscricións a través da web.
Tamén haberá en febreiro un curso sobre a evolución de cervexa e tiraxe perfecta a cargo de Carlos Ávila, técnico de Cultura de Cervexa en Hijos de Rivera, e outro sobre viños Ponte da Boga a cargo de persoal da devandita adega. Ademais, entre todos os locais inscritos, sortearase unha entrada dobre para visitar o Museo MEGA e unha noite para dúas persoas nun aloxamento de Alda Hotels.
Toda a información está dispoñible na web santiagoetapas.gal.
