Festival Go!Go!Zo! Xacobeo 21-22

Monte do Gozo converterase este verán no lugar de referencia cultural e de lecer a través do festival Go! Go! Zo! Xacobeo 21-22. A súa completa programación cultural desenvolverase desde este mércores 14 de xullo ata o próximo 12 de setembro.

“Desde Go! Go! Zo! Xacobeo 21-22 ofreceremos durante os meses de verán unha completa programación cultural deseñada para todas as idades e gustos. Contaremos cunha media de entre 3 e 4 actividades por semana, en horarios tanto de tarde como de noite”, indican desde a organización. O programa divídese en tres temáticas: sesións DJ, música en directo e actividades infantís.

“Este festival chega non só para ampliar a oferta de lecer da que xa gozamos en Galicia, senón que será tamén un fervedoiro de talento galego”, engaden. Concertos de bandas consagradas -como Os Amigos dos Músicos e Alberto Montero- e de artistas -como Mounqup e Moura- combinaranse coas novas promesas que buscan facerse un oco na industria musical galega. Así, Go! Go! Zo! Xacobeo 21-22 actuará tamén como lanzadeira tanto para grupos como para escolas ou asociacións culturais.

Os atardeceres tamén contarán coa presenza de reputados pinchadiscos que deleitarán ás persoas asistentes coas súas mesturas de ritmos. Rapariga DJ será a encargada de estrear o calendario de propostas culturais e de lecer en Monte do Gozo este mércores 14 de xullo ás 17.00 horas, estendéndose a súa sesión ata as 20.00 horas. Continuará esta primeira semana con outras sesións DJ a cargo de La Gramola (xoves 15 e sábado 17, no mesmo horario) e DJ Schulz (venres 16 de xullo, de 16.00 a 19.00 horas), que coinciden coa celebración das primeiras actuacións de Son do Camiño- Perseidas.

Estas sesións musicais conformarán, pois, “o complemento perfecto para aquelas persoas que vaian asistir aos concertos de Son do Camiño- Perseidas. O noso festival será unha especie de escenario alternativo co que completar a experiencia en Monte do Gozo”, engaden.

As instalacións nas que se desenvolverá Go! Go! Zo! Xacobeo 21-22 dispoñen dun espazoso aparcamento e de fácil acceso rodado e están perfectamente conectadas a través do transporte público de Santiago. Ademais, o recinto conta con zona de restauración e terrazas, establecementos comerciais e unha área infantil de xogos. Uns servizos que, unidos á variada e completa oferta cultural, farán de Monte do Gozo o lugar de lecer de referencia deste verán.

Programa completo

Tras as sesións Djs desta semana, as propostas de Go! Go! Zo! Xacobeo 21-22 continuarán o martes 20 de xullo cos Combos de A Casa do Rock, que se ofrecerán novamente o martes 27. Alumnado e profesorado deste centro mostrarán o potencial artístico das futuras bandas da industria.

O xoves 22 de xullo, nova sesión Dj con Saya Mohamed (de 18.00 a 21.00 horas) e o sábado 24, con DJ Schulz (entre as 17.00 e as 20.00 horas), que repetirá os días 29 e 30, tamén no mesmo horario. Rapariga DJ estreará tamén o calendario do mes de agosto cunha sesión o domingo 1 entre as 18.00 e as 21.00 horas. Abelvision DJ e La Gramola DJ amenizarán o sábado 7 e o domingo 8 de agosto de 17.00 a 20.00 horas.

As actividades infantís serán tamén protagonistas no mes de agosto da man da Gramola Kids, que terán lugar os días 5, 17, 19, 24 e 26 de agosto en horario de tarde. As propostas para os máis pequenos continuarán os días 2, 7 e 9 de setembro. Tamén se complementarán cos concertos de Dani Barreiro & Friends Kids (10 e 12 de agosto).

Música en directo

Os concertos serán outro dos pratos fortes de agosto. No cartel estarán presentes grupos como Os Amigos dous músicos e Allova (13 de agosto); Habana Café Son (días 15 e 22, co complemento das exhibicións da Academia Sondanza e Ray Colectivo Danzón, respectivamente); Oh! Ayatollah! (20 de agosto, que compartirá cartel con DJ Rafa Morcego); Alberto Montero (o 21 de agosto, que se complementará con DJ Pop Voyage) e Moura (27 de agosto).

Xa para o 3 setembro se reserva a actuación de Mounqup, que se complementará coa sesión DJ de Saya Mohamed. Un completo calendario cultural para facer do verán unha experiencia inesquecible.

Toda a información actualizada poderase atopar na web www.gogozo.gal e nos perfís en redes sociais (Facebook, Instagram e Twitter). Go! Go! Zo! Xacobeo 21-22 conta co apoio da Xunta de Galicia e de Estrela Galicia.