O MelonaFest V aprázase a outubro e o Museo do Pobo Galego pon en marcha o MICE en liña

Fotograma de Grab and run, de Roser Corella (2017).

Esta semana, a segunda de confinamento pola crise sanitaria do coronavirus, sería a da celebración da décimo quinta edición da Mostra Internacional de Cinema Etnográfico. No extraordinario desta situación, o Museo do Pobo Galego e a dirección da MICE decidiron poñer en marcha este evento dun xeito diferente, non haberá seccións competitivas senón que o que se realizará será unha selección reducida de contidos audiovisuais e formativos que se ofrecerán en liña. Así, todas as persoas que o queirán poderán acceder dende as súas casas a todos estes materiais.

A partir de mañá, martes 24 de marzo, habilitaráse na conta de Vimeo do Museo do Pobo Galego, unha canle na que se irán publicando cada dous días, algunhas das películas que pasaron en anteriores edicións pola MICE. Nesta primeira xornada poderánse ver Grab and run, de Roser Corella, un filme que aborda o rapto de noivas en Kirguizistán e que foi premio á Mellor Película Etnográfica na 13 edición da mostra. Tamén se poderá ver Hora silenciosa de Noelia María Muiño, unha curtametraxe documental que nos achega á forma de vida da comunidade de relixiosas de clausura que viven no convento de San Paio de Antealtares e que o xurado da edición da MICE de 2019 decidiu premiar como a Mellor Película Galega.

Nas seguintes xornadas, habilitarase o visionado doutras películas premiadas na MICE como Nimble Fingers de Parsifal Reparato, un retrato de dúas traballadoras dunha das moita multinacionais que se asentan en Hanoi (Vietnam); Os fillos da vide de Ana Domínguez, unha viaxe fílmica que vai do persoal ao ancestral a través dos ciclos da vida e das estacións na súa terra natal; Belén, de Adriana Vila Guevara, no que mediante un traballo de campo esencial e a través da música, o público poderá coñecer a Belén María Palacios, a “reina del quitiplá”. Tamén se poderá visualizar O tesouro de Corcoesto, de Cora Peña, un documental que se centra na problemática do proceso extractivo da mina de ouro de Corcoesto (Bergantiños) e L’eau sacrée de Olivier Jourdain, unha película que nos mergulla na sociedade ruandesa, explorando a sexualidade da comunidade con humor e espontaneidade.

A programación desta MICE en liña completárase compartindo co público un par de lecturas de interese para o cinema etnográfico, e de cara á fin de semana, estarán dispoñibles contidos para o público familiar, cunha selección de curtas de animación elaborada por Marcos Nine e un video-obradoiro de xoguetes ópticos a cargo de Espacio Rojo.

MelonaFest V

A quinta edición do MelonaFest, festival previsto para a primeira semana de abril en Compostela, acaba de anunciar o seu aprazamento. «A actual situación sanitaria provocada pola expansión do COVID-19 e as decisións adoptadas polos gobernos central e autonómico provocan que a suspensión sexa tanto unha obrigación como un compromiso. Desde o colectivo A Melona queremos ser rigorosos e por tanto debemos asumir a nosa responsabilidade individual e colectiva para coa saúde de asistentes, artistas e organización», sinalan nun comunicado.

Entre o 28 de outubro e o 1 de novembro, a fin de semana de Halloween, o festival volverá á nosa cidade cun 80% do cartel xa confirmado, mentres continúan traballando para que ese 80 sexa un 100%. En breve Wegow poñerase en contacto con todas as persoas que xa tiñan a súa entrada comprada para aclarar calquera dúbida ou consulta. Quen decida devolver o seu abono ou entrada de día poderá facelo ata o vindeiro xoves 2 de abril, ambos incluídos, escribindo a info@wegow.com ou entradas@wegow.com. Os abonos ou entradas de día que se devolvan sairán de novo á venda a un prezo único de 30€ (abono) e 20€ (entrada de día).