fbpx
CompostelaNovas

Catro estreas, tres eixos temáticos e actividades de balde co Club C! na nova programación de Artes Escénicas de Santiago

Este 2019 poderemos gozar de máis de 25 espectáculos dentro da programa de Artes Escénicas do Concello de Santiago, que se completará con máis eventos no segundo semestre do ano. En total, pasarán polo Teatro Principal ou o Auditorio de Galicia 28 compañías diferentes.

Esta programación está elaborada en colaboración con diferentes circuítos: a Rede Galega de Teatros e Auditorios de AGADIC, da Xunta de Galicia; e PLATEA e Danza a Escena, de La Red de Teatros y Auditorios, Circuitos y Festivales, ambas do INAEM. Por iso onte asistiron á súa presentación a concelleira de Acción Cultural, Branca Novoneyra; a vicepresidenta da Deputación da Coruña, Goretti Sanmartín; o director xeral de Políticas Culturais da Xunta de Galicia, Anxo Lorenzo; e o director-xerente do Auditorio de Galicia, Xaquín López. Ademais, participaron tamén representantes das catro compañías que estrean obra dentro deste ciclo: Víctor Mosqueira de Producións Teatrais Excéntricas; Marta Pazos de Voadora; Guillermo Carbajo de Redrum Teatro e Isabel Rei de Os Monicreques de Kukas.

Tres eixos temáticos: Escena GZ, Territorio das Mulleres e Memoria Presente
A programación escénica de 2019 de Compostela Cultura está vertebrada en tres eixos temáticos, liñas que se entrecruzan e deseñan itinerarios que se complementan, que mesturan xéneros e discursos escénicos, que nos mostran diferentes puntos de vista e dan boa conta da poliédrica creación escénica de hoxe en día. Son EscenaGZ, que aglutina discursos e compañías consolidadas e proxectos novos e singulares, que teñen cabida nos escenarios compostelás abertos sempre ás/aos creadoras/es do país; Territorio das Mulleres, coas voces femininas da escena actual, un abano de creadoras e intérpretes destacadas; e Memoria Presente, proxectos que afondan no pasado para reconstruír o presente, chamadas de atención para (re)ver a historia con outros puntos vista, para relembrar e reescribir con outra mirada dende un presente máis crítico.

Así, dentro de EscenaGZ poderá verse o traballo de compañías consolidadas e proxectos novos e singulares do noso país: Teatro do Noroeste, Pistacatro, A Berberecheira de Chévere, Matarile Teatro… e a estrea das últimas obras de Voadora, Producións Teatrais Excéntricas, Redrum Teatro e Os Monicreques de Kukas. Ademais, e xa dentro do Compostela Cultura En Familia, estarán as propostas de Xoán Curiel e A Banda do Verán, Caramuxo Teatro ou Elefante Elegante. Nesta sección tamén haberá espectáculos chegados de fóra do país como o Ulises de Gorakada e o Distans de Vol’e Temps.

En canto á programación de danza, o ciclo recolle espectáculos dos catro últimos Premios Nacionais de Danza: Manuel Liñán, Sol Picó, La Intrusa e Daniel Abreu. Tamén estarán La Macana, Fran Sieira, Elahood, Pistacatro, Duelirium e Traspediante con propostas para todos os gustos, partindo dende o tradicional ata chegar ao contemporáneo, pasando polo flamenco ou a danza urbana, así como o primeiro espectáculo de danza vertical de Galicia.

O segundo dos eixos temáticos, Territorio das Mulleres, compila traballos das voces femininas da escena creadoras e interpretes das que podemos citar, entre outras, a Iria Pinheiro, que presenta Anatomía dunha serea no Principal, ou a Lola Herrera, que trae ao Auditorio de Galicia o seu Cinco horas con Mario.

E o último dos eixos é Memoria Presente, que selecciona proxectos que afondan no pasado para reconstruír o presente como La Zanja, de Titzina Teatro; Mundo obrero, de Teatro del Barrio; Cinco horas con Mario, de Pentación, ou Donde el bosque se espesa, de Micomicón.

Club C!
O Club C! é unha novidade da programación que busca afondar na experiencia cultural de Compostela. Trátase dunha proposta de actividades para se achegar de xeito diverso aos contidos das actividades culturais compostelás. Comprende actividades que buscan coñecer mellor as propostas artísticas que nos ofrece a programación cultural municipal e deste xeito afondar na experiencia como espectadores culturais:

TRAS DO PANO: Visitas guiadas polos espazos escénicos municipais de Compostela.

POÑER O CORPO: Actividades arredor da programación de danza e artes do movemento.

PASEA: Pasear e falar, camiñar e compartir. Aprender nunha camiñada.

– CONVERSANDO: Programa de encontros, manifestacións orais e faladoiros arredor dos contidos e liñas temáticas que conflúen nos espectáculos desta programación.

POSFUNCIÓN: Unha vez cae o pano, os/as convidados/as, persoas con relación coas temáticas tratadas nas pezas, ofrecerán o punto de vista práctico, serán quen contraste o que a obra conta, o que “quere dicir” con como se vive desde a realidade do presente esas mesmas situacións. A partir de aí, o debate estará aberto ao público asistente e aos elencos artísticos.

– OBRADOIROS MULTIPLICA: Batería de obradoiros participativos para expandir as posibilidades temáticas, relacionais e de contextualización dos espectáculos aos que se adscriben.

Venda de entradas e prezos
As actividades do Club C! son todas de balde, algunhas delas con entrada libre ata completar a capacidade da sala e outras previa inscrición en comunicacion@auditoriodegalicia.org. A asignación de prazas farase por estrito orde de chegada da solicitude.

En canto aos espectáculos, os prezos son de 4 euros os familiares e 10, 12 e 14 € o resto. Ademais, hai unha serie de descontos e bonificacións. Existe a posibilidade de mercar o bono familiar (mercando tres entradas, a cuarta sería de balde) e para os espectáculos xerais, hai un 50% de desconto para diversos colectivos (persoas desempregadas, estudantes, menores de 25 anos, xubiladas, maiores de 65 anos, perceptoras de rendas sociais, e para familias numerosas ou monoparentais).

Poden mercarse as entradas en compostelacultura.gal e no despacho de billetes do Teatro Principal (aberto de martes a sábado, máis días de evento, de 18:00 a 21:00 h). Para os espectáculos que se celebran no Auditorio de Galicia, tamén no propio Auditorio os días de evento desde unha hora e media antes de que comece.