fbpx

Axenda

Feb
16
Mér
‘Creadores de conciencia’
Feb 16 – Mai 29 all-day

O mércores 16 de febreiro ás 20.00 h, inaugúrase no Auditorio de Galicia a exposición ‘Creadores de conciencia. 40 fotógrafos comprometidos’. No acto inaugural estarán presentes o alcalde de Santiago e Presidente do Consello Reitor do Auditorio de Galicia, Xosé Sánchez Bugallo; o director da sucursal DKV, Carlos López Cachaza; a concelleira de Acción Cultural, Mercedes Rosón; a subdirectora do Auditorio de Galicia, Silvia Modia; e o fotoxornalista José Cendón; así como de outros membros da corporación municipal. ‘Creadores de conciencia’ é un proxecto producido por DKV con motivo do XX aniversario das súas accións de Responsabilidade Social.

En palabras do comisario da mostra, Chema Conesa (Murcia, 1952), “o traballo das /dos corenta profesionais da fotografía exposto aquí conforma un mapa de feitos que resultan ao cabo un retrato veraz dos dilemas aos que se enfronta a comunidade mundial no seu presente e no seu futuro. Un debuxo trazado sobre unhas imaxes que falan de compromiso, testemuño persoal e excelencia profesional”

Unha exposición da que é imposible sair indiferente e que remove conciencias para que ninguén se desentenda das inxustizas, os abusos, ou a dor humana. Unha homenaxe a unha xeración de fotoxornalistas que veñen capturando cos seus obxectivos momentos transcendentais da historia recente, en non poucas ocasións enfrontando e asumindo riscos sobre a propia vida. Chema Conesa afirma: “practican un oficio voluntariamente silencioso, vocacional ás veces, e con grandes doses de risco e desprezo á comodidade persoal e á seguridade económica” e continua: “adoitan ser persoas solitarias, afeitas ao oficio de cazar, dotadas dun sentido da realidade extremo, hábiles na estratexia do achegamento e da máis diversa procedencia en intereses e formación. Ancoradas ao seu compromiso profesional, á decisión voluntaria que as levou até alí, a súa meta é a foto, e non lles preocupa a súa transcendencia nin repercusión. Non pretenden adoutrinar a ninguén e, con todo, a forza das súas imaxes provoca conciencia e torce vontades aínda ao seu pesar.”

Son un total de 120 fotografías, moitas publicadas nos medios de comunicación máis importantes do mundo, e polas que teñen recibido recoñecementos e premios. Capturadas en sitios como Siria, Colombia, Venezuela, Iraq, Exipto, Kabul, Haití, Croacia, Kosovo ou India até Melilla, España ou Marrocos. Imaxes necesarias, ás veces duras e incómodas, que poden ferir a quen as contempla.

FOTOXORNALISTAS
Samuel Aranda, Bernat Armangué, Walter Astrada, Sandra Balsells, Lurdes R. Basolí, Javier Bauluz, Clemente Bernard, Pep Bonet, Manu Brabo, Olmo Calvo, Sergi Cámara, José Cendón, José Colón, Javier Corso, Ricky Dávila, Juan Manuel Díaz Burgos, Ricardo García Vilanova, Antonio González Caro, Diego Ibarra Sánchez, Sebastián Liste, J.M López, Andoni Lubaki, Kim Manresa, Enric Folgosa Martí, Andrés Martínez Casares, Maysun, Fernando Moleres, Alfonso Moral, Emilio Morenatti, Daniel Ochoa de Olza, Ana Palacios, Santi Palacios, Judith Prat, Abel Ruiz de León, Rafael S. Fabrés, Gervasio Sánchez, Carlos Spottorno, Rafael Trobat, Guillem Valle e Mingo Venero.

A entrada é de balde e o horario da exposición é todos os días de 10.00 a 14.00h e de 16.00 a 20.00h. Os días de concerto a sala de exposicións pecha ás 19.00h.

Mar
4
Ven
‘Cruzamentos na arte galega da Colección CGAC’
Mar 4 – Xuñ 19 all-day

A Xunta convida a percorrer a historia da arte recente a través da mostra Cruzamentos na arte galega da Colección CGAC, con obras incorporadas aos fondos do museo nas dúas últimas décadas. O secretario xeral de Cultura, Anxo M. Lorenzo, presentou o día 4 de marzo a exposición que se abre en Compostela ata o 19 de xuño como colofón dun proxecto que tamén achegou pezas da colección a outros espazos expositivos, como o Museo do Mar de Galicia, en Vigo, e o Centro Cultural Marcos Valcárcel de Ourense.

Comisariada polo director do CGAC, Santiago Olmo, e Sara Donoso, doutora en Historia da Arte pola Universidade de Santiago de Compostela e graduada en Belas Artes pola Universidade de Vigo, a iniciativa volve situar a colección do CGAC como un eixe imprescindible e central do seu traballo e misión. A exposición caracterízase pola súa diversidade e riqueza plástica, xa que conviven artistas de longa traxectoria con outros de media carreira e máis novos, así  como creadores que traballan desde Galicia cos que o fan desde diferentes lugares do mundo, coma Nova York, Londres ou Berlín.

Memoria visual do panorama artístico galego

“Trátase dunha mirada, particular pero colectiva, que logra entrelazar determinadas afinidades creativas sen ocultar as disonancias, co fin de debuxar unha cartografía desde a que se asomar á creación contemporánea galega”, sinalou o representante da Consellería de Cultura, Educación e Universidade. Deste xeito, a selección de pezas “mostra algúns dos enfoques narrativos, así como abordaxes plásticas, que foron construíndo parte da memoria visual do noso panorama artístico”, engadiu.

Así, pódense ver traballos de Pablo Barreiro, Jacobo Bugarín, Salvador e Juan Cidrás, Andrea Costas, Ángela de la Cruz, Eva Díez, Patricia Dopico, Amaya González Reyes, Rubén Grilo, Juan López e Loreto Martínez Troncoso. Completan a listaxe Chelo Matesanz, Vítor Mejuto, Antonio Murado, Álvaro Negro, Carme Nogueira, Ana Pérez Ventura, Isaac Pérez Vicente, Montse Rego, Rodríguez-Méndez, Xavier Toubes, Mauro Trastoy e Damián Ucieda.

Segundo sinalou Anxo M. Lorenzo, Cruzamentos na arte galega da Colección CGAC conxuga “varias pezas presentes nas anteriores mostras, en Vigo e Ourense, con novas incorporacións a prol de expandir o relato”. Ademais, algunhas obras que teñen o formato de series moi extensas e que non puideron mostrarse na súa totalidade, así como algunha instalación, preséntanse agora completas aproveitando as amplas salas do CGAC.

Abr
7
Xov
‘OBXECTOS DE DESEXO. SURREALISMO E DESEÑO’
Abr 7 – Ago 28 all-day

A Xunta e a Fundación ”la Caixa” inauguran no Museo Centro Gaiás a exposición Obxectos de desexo. Surrealismo e deseño, 1924 – 2020, que explora o intercambio e diálogo entre arte surrealista e deseño contemporáneo ao longo dos últimos 100 anos. A mostra, que abrirá as súas portas ao público ao día seguinte (venres 8 de abril), está organizada pola Fundación “la Caixa” e o Vitra Design Museum, un dos museos máis importantes do mundo no eido do deseño, coa colaboración da Xunta de Galicia a través da Cidade da Cultura e no marco do Xacobeo 21-22. Conta co patrocinio de Hugo Boss e o apoio de Art Mentor Foundation Lucerne.

Obxectos de desexo. Surrealismo e deseño, 1924 – 2020 trae a Compostela icónicas obras de artistas como Man Ray, Salvador Dalí, Giorgio de Chirico ou Le Corbusier, e tamén de grandes nomes do deseño contemporáneo: desde Ray Eames a Ingo Maurer, Gae Aulenti ou Frederick Kiesler, entre outros moitos. As obras exhibidas proceden na súa meirande parte dos fondos do Vitra Design Museum (na localidade alemá de Weil am Rheim), pero tamén doutras coleccións internacionais como as da Fondation Le Corbusier de París, a Fondazione Giorgio e Isa De Chirico de Roma, o Design Museum Den Bosch de Holanda ou a Fundación Gala-Salvador Dalí, entre outras moitas.

Estes días estanse a ultimar no Museo Centro Gaiás os traballos de montaxe desta exposición que vai poder visitarse na Cidade da Cultura ata o vindeiro 28 de agosto, con entrada de balde, de martes a domingo e de 10,00 a 20,00 horas. Antes do seu paso polo Gaiás, foi exhibida no propio Vitra Design Museum e nos centros de Caixaforum en Barcelona, Madrid, Sevilla e Girona. Ademais, está previsto que tras a súa estadía en Compostela, se expoña no Design Museum de Londres.

Trátase da terceira grande exposición que chega ao Gaiás froito da colaboración entre a Xunta de Galicia e a Fundación ”la Caixa”, tras Cine e emocións. Unha viaxe á infancia –con fondos da Cinémathèque française– e Faraón. Rei de Exipto –con obras do British Museum–.

Mai
19
Xov
GOLFA
Mai 19 @ 8:30 p.m. – 9:40 p.m.

Unha mañá aparece fronte á porta dun instituto unha pintada que di “GOLFA”, un insulto anónimo que destapa a historia que o precede.

Amanda e Fran foron parella hai uns meses, adolescentes cuxa experiencia é a de tantos, unha relación que se viu truncada. Este feito non tería relevancia algunha se inmediatamente despois desta ruptura Amanda non sufrise un terrible acoso virtual que leva aos seus pais a denunciar a posible autoría de Fran. Ata que non se aclaren os feitos a dirección do instituto decide apartar a Fran das súas clases.

Ante uns feitos cada vez máis confusos, a xuíza encargada do caso propón unha opción co ánimo de que a escalada de sucesos non vaia a máis: un acordo cordial consistente nun encontro online co sexólogo Jordán Gómez, unha sesión de sexoloxía á que han de asistir Fran, Amanda e a nai de Fran coa particularidade de que estes encontros serán de libre acceso online pedindo lista e identificándose. Todos/as seremos testemuñas desta sesión de sexoloxía.

Mai
20
Ven
DeMENTE
Mai 20 @ 8:30 p.m. – 9:30 p.m.

DeMente é unha obra de baile e música tradicional galega para público adulto de 60 minutos de duración, cun elenco artístico de 8 bailadores/as en gran formato. As escenas desenvólvense ao son da música do compositor e músico multidisciplinar Cristian Silva Bóveda. Todo isto atópase dentro dun marco escénico e vestiario ideado por Carlos Alonso Alonso xunto cun deseño de iluminación de Fidel Vázquez Díaz. A fisicalidade e a estética contemporánea, dentro do baile e a música tradicional galega, preséntase a través dos ollos da bailarina e coreógrafa catalana Carla Diego Luque como directora artística.

DeMente plasma unha realidade, un estigma, unhas patoloxías que segundo a Organización Mundial da Saúde (OMS) sufriron, sofren ou sufrirán nalgún momento da súa vida unha de cada catro persoas. A reclusión practicamente carceraria das persoas “dementes” en tempos pasados, os amoreamentos de persoas enfermas, as contencións mecánicas totais e parciais, así como as contencións químicas (antipsicóticos e outros medicamentos), os suicidios (“Ao tolo cando entraba no manicomio só lle quedaba esperar a morte.”), a explotación da enferma, “os almacéns de carne humana”…

CONCERTO DE NÉBOA
Mai 20 @ 9:00 p.m.

Co furabolos moi limpo, Néboa xa pasou a xema polas marxes que semellaban delimitar a distancia entre a indietrónica, a música tradicional galega, a poesía elíptica, o jazz de vodevil, o pop alternativo, a extimidade da canción de autor e a idea dun pop internacionalista; e con todo o po que ficou apegado ó dedo, construíron un castelo sonoro que é, ó tempo, unha pequena casiña en metade dunha aldea e un rañaceos infinito.

Mai
22
Dom
“LEVANTARSE E CAER” Xira de Xabier Díaz
Mai 22 @ 7:00 p.m.

O artista galego lanza novo traballo en solitario, paralelo ao seu traballo xunto a Adufeiras de Salitre, no que profunda nos conceptos de resiliencia, os impactos sociais que recibimos como individuos na infancia e a súa importancia na posterior construción individual e colectiva. Reflexiona sobre o paradigma do éxito, etc. Todo desde unha perspectiva intimista e personalísima, mirando á infancia sen perder de vista o presente.

O disco, que contén 10 temas que teñen a canción como elemento vertebrador do álbum, conta cunha edición limitada cunha caixiña de música na que pode escoitarse un dos arrolos.

Que Xabier Díaz é un dos grandes músicos do panorama actual en Galicia é indiscutible, pero á súa impecable traxectoria xunto Adufeiras de Salitre únese agora un novo traballo en solitario, “Levantarse e Caer”, un disco no que o artista reflexiona sobre a necesidade de cambiar o paradigma do éxito e a construción dunha sociedade individual e colectivamente máis xusta e solidaria.

O proxecto discográfico, recolle 10 temas que navegan entre o son tradicional galego, a música melódica e os arrolos. O primeiro single do disco, “Levantarse e Caer”, vía a luz o pasado mes de marzo e pasaba inmediatamente a coarse entre os temas en galego máis escoitados en todas as plataformas. Tras el chegaba “María e a Curuxa”, un arrolo de patrón suave e doce, que permitía atisbar un pouco máis o particular universo de Díaz.

“Levantarse e Caer” é un traballo honesto no que Xabier Díaz explora os recordos da infancia, a perspectiva adulta do éxito e a necesidade de querer e querernos máis e mellor como unha forma de sandar as feridas e construír unha realidade máis amable.

MUYERES – “HUMANES”
Mai 22 @ 7:30 p.m.

Historias que nacen doutras; algunhas reais e outras ficcionadas, de mulleres que puideron existir ou non, pero que nos permiten vernos e ver a outras, desde un prisma distinto, mergullando na contradición, imperfección e vulnerabilidade de calquera ser humano. Humanes, sen máis.

Desde historias de mulleres que alternan con Lorca, a chigreras que se deixan querer, desde ermitás rodeadas de lobos (e lobas) a extravagantes solitarias nun pequeno pobo ou pasando por aquelas que vingan a morte dun ser querido con outra morte máis.

Mujeres sen medo e imperfectas, pero que na súa marabillosa e imperfecta esencia, tamén son humanes e mulleres. Como nosotres, como tantes otres.

Un espectáculo de « Muyeres»

Mai
26
Xov
SILENCIO
Mai 26 @ 8:30 p.m. – 10:00 p.m.

Vestido cun traxe de etiqueta dentro do que non acaba de sentirse cómodo, cumprindo co preceptivo protocolo, o dramaturgo, ou seica unha actriz amiga a quen pediu que o represente no solemne acto, vai ingresar na Academia pronunciando un discurso titulado Silencio. Os seus oíntes son os outros académicos, cos que comparte estrado, e as persoas -familiares, amigos, colegas, autoridades, descoñecidos…- que viñeron a acompañalo esta tarde. Vai falar sobre o silencio na vida e no teatro, quizais tamén sobre o silencio na súa vida e no seu teatro.

Igual que aos espectadores, eses silencios poden enfrontar, a quen escribiu o discurso e a quen agora o pronuncia, cos silencios das súas propias vidas. Quizais quen pronuncia o discurso e quen o escribiu teñan, en cada momento, a tentación de calar. Quizais o silencio, que soporta o discurso e sobre o que o discurso indaga, poña o discurso en perigo. E quizá o máis valioso sexa finalmente, por encima e por baixo das palabras, poder escoitar xuntos o silencio.

CONCERTO DE TRAVIS BIRDS
Mai 26 @ 9:30 p.m.

O ciclo de concertos Momentos Alhambra celébrase este mes de maio en Galicia con cinco directos protagonizados por diferentes artistas recoñecidos a nivel nacional, e que terán lugar nalgunhas das salas máis emblemáticas da rexión.

Travis Birds chegará a Santiago de Compostela o xoves 26 de maio. A sala eMe Music Club inundarase cunha das voces máis características do panorama musical actual interpretando cancións do seu segundo álbum “La costa de los mosquitos”.