fbpx

Axenda

Feb
1
Mér
Xornadas Gastronómicas do Lacón con Grelos-Lacónicas
Feb 1 – Feb 26 all-day

O Concello da Coruña organiza a oitava edición das Xornadas Gastronómicas do Lacón con Grelos-Lacónicas, que terá lugar do 1 ao 26 de febreiro en 32 establecementos de hostalería da cidade. O concelleiro de Turismo, Juan Ignacio Borrego, expresou na presentación destas xornadas que se trata dunha oportunidade única “para gozar do bo produto e do bo facer dos chefs e dos locais de hostalería da cidade”, amosando unha edición máis “o nivel e a calidade” deste sector. “A nosa cidade é un referente en gastronomía, unha das apostas do Goberno de Inés Rey. A Coruña demóstrao en cada xornada gastronómica que realizamos ao longo do ano”, afirmou Borrego.

Lacónicas, que conta coa colaboración de Hostelería por el Clima, Asociación de Celíacos de Galicia e Adega Ponte da Boga, contribúe cada ano a celebrar a época do Entroido na nosa cidade, exaltando ao mesmo tempo a riqueza gastronómica. Os establecementos de hostalería elaboran os seus propios menús “con produtos galegos e quilómetro cero”. Cada menú componse de primeiro prato (sopa ou similar), prato principal (a lacoada), sobremesa tradicional (filloas e/ou orellas), bebida e café. Os prezos oscilan entre os 22 e os 35 euros.

Nesta edición de Lacónicas participan: A Fuego Lento, Ajetreo Taberna, Áncora, Asador Coruña, Attica21 Coruña, Bar Amsterdam Orzán, Bar Ciudad, Bodega Órdenes, Central Park, Chester Foodlove, Dos Raíces, El Local 20, El Rincón del Reino, Galiur, Hünico, La.Con.Fusión, Lois, Mahara Taberna Rock, Marea Baja, Mesón de Herves, Mesón Moncho, Mesón O’Bo, Parrillada Lembranzas, Portela, Restaurante Boavista, Restaurante Eira-Hotel Avenida, Restaurante La Marola-Hotel Zenit, Restaurante Morriña, Restaurante Noray, Taberna O Freixo, Vinoteca Cosecha 81 e Vermutería Chitín.

Na oferta gastronómica destas xornadas hai opcións para persoas celíacas e tamén hai posibilidade de pedir os menús para levar nos propios establecementos ou de entrega a domicilio. Os locais participantes tamén fan ofertas para grupos. Todas as opcións e menús poden consultarse no folleto das VIII Xornadas Gastronómicas do Lacón con Grelos, na web de Turismo (www.visitcoruna.com).

Borrego animou á participación nesta edición de Lacónicas. “Nos últimos anos Lacónicas converteuse nunha cita obrigada para as e os amantes da boa mesa: case un mes para degustar un dos pratos estrela da gastronomía galega”, expresou.

Feb
26
Dom
40ª Festa da Filloa de Lestedo
Feb 26 @ 11:00 a.m. – 8:00 p.m.

O alcalde de Boqueixón, Manuel Fernández Munín; o deputado autonómico e presidente da Comisión de Control da CRTVG, Ovidio Rodeiro Tato; e o presidente da Asociación Cultural da Filloa, José Manuel Canabal, presentaron no CIFP Compostela o programa da 40ª edición da Festa da Filloa de Lestedo, que terá lugar en Boqueixón o domingo 26 de febreiro.

O alcalde de Boqueixón agradeceu o traballo realizado tanto polos veciños e veciñas como pola Asociación Cultural da Filloa para “preparar un amplo programa de actividades vinculadas á 40ª Festa da Filloa de Lestedo e con moitas novidades como esa Festa da Filloíña, para os nenos e nenas que comezan a coller o relevo”.

Pola súa banda, José Manuel Canabal confirmou que o Alto dos Xenerais da Ulla, Festa de Interese Turístico de Galicia, volverá a celebrarse en horario de mañá e que “na degustación das filloas volveremos á normalidade, cunha degustación gratuíta ao mediodía e despois, ao longo de todo o día, todas as persoas que se acheguen poderán mercar e probar todo tipo de elaboracións: filloas doces, á pedra, recheas…”. Finalmente, Ovidio Rodeiro destacou unha vez máis o traballo dos veciños e veciñas de Lestedo  “que lograron situar este pobo e esta parroquia como unha das festas gastronómicas máis importantes de Galicia”.

O programa da 40 Festa da Filloa dará comezo ás 11:00 horas do 26 de febreiro coa actuación de grupos musicais e a tradicional parranda de entroido. Ás 12:00 horas terá lugar o Desfile dos Xenerais da Ulla ata o campo da Festa darán, onde darán paso ao pregón e entrega de distincións. Ás 13:45 horas será o momento do Gran Alto dos Xenerais da Ulla que, mediante estrofas rimadas e con moita ironía e humor, falarán de política e temas de actualidade. O acto será presentado pola actriz María Mera.

A Festa recupera a normalidade en canto á degustación das filloas, polo que ao mediodía haberá unha degustación gratuíta no campo da feira. E, ao longo de todo o día, as persoas que se acheguen por Lestedo poderán mercar e degustar todo tipo de elaboracións: filloas doces, á pedra, recheas, salgadas, as da máquina filloeira…

A música de Luz do Ilicino e do Grupo Ibiza porá o broche final a unha intensa mañá de actividades. Pola tarde, o grupo Coleguitas e a orquestra París de Noia protagonizarán a verbena a partir das 18:00 horas.

Programación paralela 

Unha das novidades desta edición é a “Festa da Filloíña”, “na que os protagonistas sexan os nenos e nenas que empezan a coller o relevo en Lestedo porque, para nós, é un orgullo ver como estas tradicións pasan dunha xeración a outra”, apunto Manuel Fernández Munín. A “Festa da Filloíña” dará comezo ás 17:30 horas do sábado 18 de febreiro no campo da feira de Lestedo coa actuación de grupos musicais (Lucerniñas, Luceiro e Luarada da Asociación Cultural Meste Manuel Gacio, As Travesas de Codeso e Os Campiños de Sarandón), que darán paso ao pregón infantil.

Ás 18:30 horas terán lugar os Atranques de Xenerais e Xeneraliños, que rematarán cunha degustación gratuíta de filloas e un concurso de disfraces, culminado cunha festa infantil. Xa pola noite, quenda dos pais e nais co “Entroido da Filloa”, cun concurso de disfraces e unha verbena coas orquestras Finisterre e o grupo Origen.

Finalmente, nos días previos á gran festa terá lugar o showcooking “Lestedo sen gluten”. O venres 24 de febreiro presentaranse distintas elaboracións aptas para estas persoas. Unha iniciativa organizada en colaboración coa Asociación de Celíacos de Galicia. E o sábado 25 de febreiro, ás 18:00 horas, novo evento gastronómico, denominado “Terra e mar” no que un prestixioso chef elaborará receitas de filloas con diferentes recheos, doces e salgados, incorporando unicamente produtos locais e de temporada. A xornada rematará con música, coa primeira edición do “Filloa Folk” que este ano reunirá no campo da feira de Lestedo aos grupos Raeira e Raiola (Asociación Cultural Mestre Manuel Gacio), Xabier Díaz e Adufeiras de Salitre e a Requinta da Laxeira.

Mar
17
Ven
Galicia en Copas
Mar 17 – Mar 31 all-day
Presentación do II Encontro do Viño Galego Revera Vinum. 

Unha das súas accións especiais enmarcadas no II Encontro do Viño Galego Revera Vinum é Galicia en Copas, no que participarán máis dunha vintena de establecementos hostaleiros, e as Catas e Ceas Maridaxe, ambas previstas do 17 ao 31 de marzo.

Neste senso cabe destacar que a idea é reforzar a relación entre as adegas participantes e os establecementos de hostalaría, repartidos tanto polo Casco Histórico como polo Ensanche compostelán. Cada cliente dispoñerá dunha tarxeta na que poderá ir selando a visita ao local no que consuma, e entrar no sorteo de diferentes agasallos, entre eles cinco noites con almorzo en locais de turismo rural, 25 visitas a adegas de Galicia e varios lotes de viños.

E precisamente será nalgúns destes mesmos locais onde se celebren tamén catas e ceas maridaxe co fin de promover a gastronomía e a riqueza dos seus produtos.

Mar
27
Lun
Revera Vinum
Mar 27 – Mar 28 all-day
Presentación do II Encontro Revera Vinum.

A Asociación Hostelería Compostela promove por segundo ano consecutivo o Encontro do Viño Galego Revera Vinum, organizado por Escenoset co patrocinio da Xunta de Galicia, o Concello de Santiago e a colaboración de diversas entidades, como o Cluster Turismo de Galicia, o CIFP Compostela ou o CPR O Raio Verde. O evento pretende dar a coñecer e promover os viños galegos entre os profesionais do sector, así como a veciñanza e os turistas que visiten Compostela. Celebrarase os días 27 e 28 de marzo, no San Francisco Hotel Monumento, en horario ininterrumpido de 10.00 a 20.30 horas.

Así o sinalou o presidente da Asociación Hostalaría Compostela, Thor Rodríguez, nunha rolda de prensa celebrada no Pazo de Raxoi, na que participaron o concelleiro de Turismo, Sindo Guinarte, e a directora de Turismo de Galicia, Nava Castro, recordando que este encontro “busca repetir o éxito da primeira edición, que reuniu a máis de 180 adegas galegas, e polo que pasaron cerca de 5.000 visitantes”.

O evento servirá tamén para “potenciar o turismo gastronómico e recoñecer tanto a calidade dos nosos viños como o peso do sector na economía galega, ademais de axudar a dinamizar a propia hostalaría da cidade”.

Para Nava Castro, “Galicia sen o viño, as súas D.O. e as súas IXP non se entendería”. A directora de Turismo de Galicia afirmou que é unha rexión que se “pode desfrutar os 365 días do ano”, sendo Compostela “un escaparate perfecto para atopar todas estas referencias”, dando a oportunidade de “catar a nosa esencia” e coñecendo a cultura do viño “da man de grandes sumilleres e relatores”.

Todas as variedades de uva

Serán máis de 500 referencias dunhas 200 adegas, entre a área expositiva e o Túnel do Viño (aberto de 11.00 a 20.30 horas), que dará a oportunidade aos visitantes de que se coñezan todas as variedades de uva implantadas en Galicia.

Ademais, Castro destacou o “amplo programa de actividades” do Revera Vinum, que incluirá catas históricas, obradoiros, degustacións, mesas de debate e relatorios con sumilleres, enólogos e xornalistas especializados, durante os dous días que dura o evento. Tamén se fará entrega da Distinción Revera Vinum, para recoñecer o esforzo dos profesionais para pór en valor os nosos viños.

Neste sentido, Castro fixo especial fincapé no alto nivel dos relatores, coma Luis Paadin, Iria Otero, Juan Chamorro, David Rial, Pablo Vidal, Jose Luis Bouzón, Andrea Obenza, David Pascual ou Cecilia Fernández, entre outros.

As actividades terán un custo de entre 35 e 45 euros, se ben moitas delas serán gratuítas.

Entradas

O presidente da Asociación Hostelería Compostela lembrou que o programa “todavía está aberto” e engadirá algunha sorpresa, ademais de adiantar que as entradas, ó prezo de 10 euros, sairán á venda a mediados de febreiro, podendo adquirirse na propia sede da asociación e nalgúns locais colaboradores, así como a través da páxina web (www.reveravinum.gal), á que remitiu para estar informado “xa que é alí onde se irá colgando puntualmente toda a información relativa ao encontro”.