fbpx

Axenda

Xul
14
Xov
Raniero Fernández. O arquivo
Xul 14 2022 – Feb 12 2023 all-day

O CGAC acolle desde o 14 de xullo unha nova proposta expositiva que revisa desde unha perspectiva contemporánea a obra dun dos fotógrafos galegos de referencia nos anos 50 e 60, o vigués Raniero Fernández. A exposición súmase ás outras dúas que mantén abertas o museo estes meses dentro da súa programación de verán, que se centran na performance, as artes vivas e a fotografía.

O director xeral de Cultura, Anxo M. Lorenzo, participou na presentación da mostra, na que estivo acompañado do director do CGAC, Santiago Olmo, e dos comisarios Manuel Sendón e Xosé Luís Suárez Canal.

O representante da Consellería de Cultura, FP e Universidades destacou a capacidade desta exposición para “achegar unha nova visión da prolífica obra do que foi un dos fotógrafos galegos de referencia da súa época, cuxo legado merece ser divulgado”, indicou. Neste sentido, recordou o papel de Raniero Fernández como presidente da Agrupación Fotográfica Gallega, cando se converteu, dixo, en dinamizador da actividade cultural da súa cidade natal, Vigo, e gran parte de Galicia “como tamén quedou reflectido na súa obra”.

Anxo M. Lorenzo valorou o traballo do fotógrafo vigués ao ser quen de retratar “parte da nosa historia cun estilo diferente para a súa época, con imaxes do porto de Vigo que hoxe en día son testemuña da pegada da emigración a América da década dos 50 ou coa súa visión particular de elementos etnográficos propiamente galegos”, engadiu.

Valor documental

A exposición Raniero Fernández. O arquivo divulga a obra do fotógrafo vigués desde unha perspectiva contemporánea. Inclúe pezas da década dos 50 e 60 nas que retrata a Galicia da emigración, o mundo rural desde unha perspectiva idealizante como é costume na fotografía non profesional. Tamén inclúe fotografías que adquiren un importante valor documental como imaxes de mulleres vendendo leña ou leite no centro de Pontevedra ou unha muller levando o leite en burro en Lugo xunto a fotografías da feira de Santiago de Compostela, un tema recorrente desde principios dos 40.

A mostra que pode visitarse ata o 12 de febreiro conta, ademais, con series de cruceiros e hórreos dos que ten catalogados máis de 400 negativos. Esa mesma procura arquivística empregouna tamén para abordar a temática da ourivaría relixiosa, xerando series que hoxe, á luz da fotografía contemporánea, adquiren un importante interese ao traer á mente a obra de artistas coetáneos. Co obxectivo de revisar a obra do fotógrafo vigués desde unha óptica actual, pero contextualizándoa na súa época inclúense tamén obras doutros fotógrafos como Ferrol, Losada, Rueda, Schimidt de las Heas, Terré, Veiga Roel e Zamora.

Tres exposicións

Raniero Fernández. O Arquivo súmase ás outras dúas exposicións que mantén abertas o CGAC durante todo este verán. Por unha banda, pode visitarse ata o 2 de outubro O museo como escenario, dedicada ás artes vivas, á performace e a fenómenos escénicos. A partir das propostas de Rosana Antolí, Marta Pazos e Berio Molina, os espazos do CGAC convértense nun lugar de produción e experimentación onde as instalacións creadas polos artistas funcionan de xeito autónomo, pero tamén poden ser activadas polo espectador.

Ademais, o CGAC tamén ten aberta a exposición Nalgures da australiana Narelle Jubelin, coa que se afonda na memoria da paisaxe. Entre outras obras, a artista inclúe por primeira vez nunha exposición outras creacións artísticas, como pezas descatalogadas de Cerámicas do Castro e de Sargadelos, algunhas pertencentes ao Laboratorio de Formas e poderá visitarse ata mediados de outubro.

Xul
22
Ven
Planazos MEGA
Xul 22 2022 – Xan 5 2023 all-day

MEGA Museo Estrela Galicia anuncia novos Planazos culturais e de lecer a partir do mes de xullo, que inclúen maridaxes, catas e concertos. Así, o segundo semestre de 2022 chega cargado de cultura cervexeira e novos plans a MEGA, un espazo museístico único en España, experiencial e divulgativo, deseñado para ver, cheirar, tocar e probar a cervexa, a súa historia e o seu estilo máis xenuíno.

Dentro desta nova programación de MEGA Museo Estrela Galicia destacan eventos singulares que aúnan cultura, música e gastronomía como unha Maridaxe Peregrina o venres 22 de xullo, ás 21.30h, onde a nosa orixe galega será o verdadeiro protagonista. A experiencia gastrocervecera correrá a cargo dun dos recoñecidos chefs de Coruña Cociña, onde non faltarán o acompañamento musical e algunhas das mellores variedades de Estrela Galicia: as cervexas do Camiño.

Do 5 ao 7 agosto chegaralle a súa quenda ao #BeerWeekend: unha fin de semana chea de sorpresas cervexeiras en MEGA para celebrar o Día Internacional da Cervexa. Así mesmo, xa en setembro, o público poderá descubrir no Museo de Estrela Galicia todos os segredos dun dos ingredientes basee da cervexa: o lúpulo, con novas vivencias exclusivas e interactivas ao redor da súa colleita.

Xa en outubro, o museo vestirase de longo para celebrar Sanmaín cunha experiencia que inclúe cervexas ancestrais e tapas festivas. En novembro regresarán os concertos en vivo, para gozar dun directo singular de música e cervexa ao máis puro estilo MEGA, como xa sucedeu este ano con bandas tan queridas como Fetén, Fetén ou Marlango. Finalmente, unha #NavidadNivelMEGA poñeralle a guinda á programación anual do Museo de Estrela Galicia do 17 de decembro ao 5 de xaneiro, con plans familiares do máis apetecibles en MEGA.

Out
21
Ven
Exposición ‘De lugares e cousas. Colección de arte Banco Sabadell’
Out 21 2022 – Abr 17 2023 all-day

Por definición, un lugar é espazo determinado capaz de acoller unha cousa calquera. O que nos permite caracterizar e distinguir un lugar de outro é precisamente a natureza do que contén (persoas, cousas, pensamentos) e os procesos e o tempo nos que foi constituído. Memoria, identidade, pertenza ou límite son algúns dos conceptos fundamentais que ligamos aos lugares e os dotan de sentido para nós.

De lugares e cousas é unha exposición que reflexiona, a través da arte contemporánea, sobre os símbolos, significados e sentidos cos que dotamos e construímos os lugares, e tamén sobre a relación da obra artística cos espazos que habita.

A través de 41 obras pertencentes aos fondos da Colección de Arte Banco Sabadell, De lugares e cousas trae ao Gaiás pezas dalgúns dos artistas contemporáneos e actuais máis relevantes de Galicia, España e tamén Portugal.

Referentes como Eduardo Chillida, Esther Ferrer, Antoni Tàpies, Isidoro Valcárcel Medina, José Pedro Croft ou Susana Solano, entre outros, están presentes canda pezas de Cristina Iglesias, Jaume Plensa, Dora García, Alicia Framis, Jordi Colomer ou David Bestué. Da parte galega, participan na mostra Manolo Paz, Ángela de la Cruz, Antón Patiño e Christian García Bello.

Tres xeracións de artistas

De lugares e cousas reúne tres xeracións de artistas, dos máis relevantes de Galicia, España e Portugal, cos que percorremos a evolución da arte contemporánea desde a segunda metade do século XX ata os nosos días.

Na mostra atopamos pezas de figuras fundamentais que abriron novos camiños na pintura, a escultura e a arte plástica. Pioneiros do informalismo e da abstracción, e tamén da arte conceptual: Antoni Tàpies, Jorge Oteiza, Isidoro Valcárcel-Medina, Eduardo Chillida, Esther Ferrer, Jorge Teixidor, Miquel Navarro, Ana Jotta, Antón Patiño e Sergi Aguilar.

A segunda xeración está composta por artistas nacidos maiormente entre finais dos 40 e dos 50. Atopamos aquí traballos que afondan na experimentación coa técnica e os materiais para crear propostas que reflexionan sobre a relación da arte coa literatura e a palabra, os medios de comunicación de masas, a natureza ou a arquitectura, realizadas por Txomin Badiola, Manolo Paz, Susana Solano, Jaume Plensa, Pedro Cabrita Reis, Cristina Iglesias, Juan Ulsé, Pep Durán, José Pedro Croft, Ignasi Aballí, Montserrat Soto e Lluis Hortalà.

Rematamos o noso percorrido coas creacións de artistas nacidos a partir da década dos 60 que continúan a exploración fóra dos límites, tanto da obra artística como da súa relación co espazo de exhibición: Mar Arza, Irma Álvarez-Laviada, Alicia Framis, José Dávila, Ángela de la Cruz, Alberto Peral, Dora García, Itziar Okariz, Oriol Vilapuig, Mateo Maté, Jordi Colomer, David Bestué, Christian García Bello e Teresa Solar Abboud.

Arte en relación

Nesta exploración da relación simbólica da arte en relación cos obxectos e cos lugares, a arquitectura, a natureza e a cidade están moi presentes ao longo de toda a mostra. Así, atopamos en De lugares e cousas obras que reflexionan sobre os espazos urbanos —Maravillas e Prototipos (2), de Jordi Colomer—, que empregan elementos arquitectónicos para dotalos dun novo sentido —La habitación de la arquitectura prohibida, de Alicia Framis—, e outras que traballan a partir de elementos naturais como materia prima ou obxecto de representación. Isto último vémolo, por exemplo, na estrutura de panal en madeira de Vértigo, de Manolo Paz ou en Phreatic Zones Studi IV, de Cristina Iglesias, onde o cobre recrea a idea dos acuíferos.

Outro elemento común en varios dos artistas que compoñen a mostra é o traballo en relación coa escrita, a literatura e a poesía. A modo de exemplo temos a escultura We, de Jaume Plensa, composta por letras realizadas con oito alfabetos distintos que permiten construír, a pesar da disparidade lingüística, unha figura única, reflexiva e transparente. Dora García, Ignasi Aballí e Mar Arza son outras dúas artistas que traballan con palabras, fragmentos de libros e referencias literarias para construír mundos poéticos e visuais.

Por último, hai en De lugares e cousas unha corrente adicional na que a obra fai evidente a construción dunha relación co propio feito artístico, ben con autoras, autores e movementos anteriores ben coa sociedade na que se inscribe e como esta percibe a arte contemporánea. David Bestué, Ana Jotta, Irma Álvarez-Laviada, José Dávila ou Isidoro Valcárcel Medina son algúns exemplos de creadores que traballan nesta liña. Pezas reflexivas, irónicas, humorísticas incluso, que revisan a modernidade da escultura e da pintura e o seu papel na sociedade actual.

Colección de Arte Banco Sabadell

A Colección de Arte Banco Sabadell foise ampliando ao ritmo do crecemento do banco. A maioría das obras son actuais e, como é habitual, foron adquiridas pola súa calidade artística, o seu valor innovador e o que poidan supoñer de investimento, ademais do seu valor decorativo. En tal sentido, cómpre lembrar que unha das cuestións que a singularizan é, precisamente, a función de decoración dos espazos de traballo e de relación cos clientes e os accionistas do banco. Daquela, valores e estética conxúganse para se converter nun elemento destacado da imaxe e da marca Banco Sabadell.

Out
26
Mér
Sexta edición do ‘Festigual’
Out 26 – Dec 3 all-day

A concelleira de Benestar Social, Medio Ambiente e Participación, Yoya Neira, presentou esta mañá a sexta edición do Festigual. O día 26 de outubro comezará unha programación expandida que rematará o día 3 de decembro, Día Internacional das Persoas con Discapacidade, coa actuación de El Langui no Centro Ágora.  

Neira destacou que o Festigual “aséntase como unha referencia estatal no apoio á creación cultural de persoas con algunha discapacidade”. “Este ano aumentamos a programación facendo máis actividades que nunca e chegando a máis espazos: a teatros, centros educativos, centros de atención, centros cívicos e lugares de ocio, empapando de diversidade toda a cidade durante máis dun mes de actividades”, agregou Neira. 

Na organización do Festigual colaboran o Concello da Coruña, a Fundación Emalcsa, a Deputación da Coruña, Vegalsa e a Fundación María José Jove. 

Este ano, como novidade, a programación tratará de achegarse a un público fundamental para a transformación social: a adolescencia. “Queremos que todos eses rapaces e rapazas que están formando a súa personalidade entendan que hai moitas formas de mirar, que se acheguen a outras realidades e que aprendan a valorar a diversidade”, dixo a concelleira. 

A sexta edición do Festigual mantén a convivencia de espectáculos e artistas consagrados con proxectos de calidade da cidade. Ademais de nomes tan coñecidos como El Langui ou a obra teatral “Campeones de la Comedia”, de Yllana, con algúns dos protagonistas da premiada película de Guillermo Fesser, haberá espectáculos de Experimentadanza, un concerto da Orquestra de Cámara galega, a gala de Música Baixo as Estrelas con Sophie Simonds ou Sisters in the House ou a presenza de Teatro Valacar da ONCE ou Náufragos Teatro. 

Ademais, Festigual mantén o seu concurso de artes pola diversidade mudando este ano a fotografía pola escritura cun concurso de relatos breves sobre a inclusión que serán emitidos polo programa “Convivir en igualdade” da Radio Galega. Tamén haberá graffitis, exposicións fotográficas e de filatelia, actividades museísticas e moito máis. O programa completo do Festigual está dispoñible a través da web do Concello, na da Fundación Emalcsa e na web www.festigual.com.

Nov
2
Mér
Festival 23 aniversario Sala Mardi Gras
Nov 2 – Dec 6 all-day

A Sala Mardi Gras cumple 23 anos e van a celebralo por todo o alto. 23 actuacións para conmemorar o seu 23 aniversario ao longo dos meses de novembro e decembro.

Bandas e artistas desde Estados Unidos como Jive Mother Mary, Bart Davenport ou o bluesman JC Smith, do Reino Unido como Quireboys ou Booze & Glory (con varios polacos nas súas filas), desde Australia chegan The Meanies, teloneiros na última xira de Foo Fighters polo seu país, e de Nirvana nos 90 (levan máis de 30 anos de carreira) ou os fantásticos canadenses The Commoners, moi na onda Black Crowes.

Haberá tempo para eventos benéficos como os días 2 e 3 de decembro, o primeiro no ciclo ACCIÓN POR TODOS que coordina Edu Albo no que actuarán Rockers Go To Hell e Los Mecánicos. O sábado 3 a recadación será íntegra para CASCO, o comité Antisida da Cidade.

Tamén vivirán concertos do ciclo Kilómetro C de Estrella Galicia con La Paloma, banda madrileña que está a chamar a atención da crítica nacional.

Presentarán disco os fantásticos The Soul Jacket nun concerto organizado pola República Musical Mardi Gras. E veremos a The Exploding Boys, considerados o mellor tributo a The Cure en España e que nesta xira incorporan temas de Depeche Mode, Joy Division e New Order.

Máis información sobre cada un dos concertos en: salamardigras.com

Outono Códax 2022
Nov 2 – Nov 30 all-day

A procura de excitantes descubertas sonoras, achegar artistas e grupos de contrastada calidade que rara vez ou nunca actuaron en Galicia nin en España e enriquecelo todo cunha programación paralela de actividades en torno a cultura da música e do viño, son algúns dos sinais de identidade que veñen singularizando ao festival Outono Códax dende a súa primeira edición. E xa van unha ducia.

Un ano máis, e baixo o patrocinio de Bodegas Martín Códax, o festival impulsado por Raiña Pro e A Reixa representa fielmente ese espírito, cunha ecléctica combinación de propostas musicais que representan o variado abano e as múltiples vertentes da música negra. Doce concertos nos que terán cabida a elegancia do soul contemporáneo, o desparrame festivo do rock garaxeiro, a xenuína autenticidade das raíces de Nova Orleans, o R&B hipervitaminado, o soul de nova escola e mesmo o intimismo poético vencellado ao pop barroco doutras épocas. 

A de Big Chief Monk Boudreaux é unha das figuras estelares desta edición do Outono Códax. Non en van, é a primeira vez que o xefe indio de Mardi Gras, o «Ancián dos Anciáns», pisa territorio galego. Monk Boudreaux foi nomeado este ano ao premio Grammy na categoría Raíces Rexionais.

Tamén é sobresaínte a presenza de Carlton Jumel Smith, que chega acompañado por The Harrycane Orchestra. O elegante soulman norteamericano, que interpretou ao seu ídolo musical, James Brown, na película de Barry Levinson Liberty Heights, é o autor do aclamado disco 1634 Lexington Avenue. O soul contemporáneo, con influencias do rock dos 60 e 70, tamén estará representado na figura de Jesper Lindell Band.

Da vertente máis frenética do festival encárganse MFC Chicken, un dos grupos cun directo máis excitante da escena do garaxe-rock do Reino Unido. Nesa mesma órbita, pero neste caso influenciada polo espírito das raíces do blues, sitúase tamén a banda de Brooklyn Daddy Long Less, que será a encargada de abrir esta edición do festival.

A participación galega nos concertos do Outono Códax concrétase nas figuras de Nastasia Zürcher, que esta mesma semana ven de ser proclamada Artista do Ano nos Premios Martín Códax da Música, nos que tamén obtivo o premio ao mellor proxecto na categoría de Blues, Funk e Soul polo seu disco But life is beauty full, e por Moura, banda que mestura a neopsicodelia, o rock progresivo e o kraut-rock coa tradición musical galega.

O cartel do Outono Códax 2022 complétase con nomes como o do cantautor Bart Davenport, o representante da cultura festiva de Nova Orleans John “Papa” Gros, o blues de vella escola de JC Smith Band, o excitante trío da rockabilly gaditana La Perra Blanco ou a banda asturiana de rockabilly e blues primitivo Honky Tonk Heels.

A programación do Outono Códax 2021 completarase con dúas presentacións de libros a cargo de Xavier Valiño e Fernando Navarro, un ciclo de proxeccións adicado á música no cinema, unha noite de monólogos a cargo de Marta Doviro, Ledicia Sola e Carmen Méndez, sesións de Dj’s, catas de viño con maridaxe e ceas musicais con maridaxe de Martín Códax.

O festival dará comezo o mércores 2 de novembro e prolongarase ata o día 30 dese mesmo mes. Os concertos terán lugar na sala Capitol e no Riquela Club. Os abonos e as entradas estarán a venda a partir do sábado 8 de outubro en A Reixa-Matrioska (Compostela); Bonus Track (Ourense); Rock Box (A Coruña); Elepé e Honky Tonk (Vigo) y Carnaby (Pontevedra), así como a través de ataquilla.com.

Nov
3
Xov
‘Tres mulleres Magnum: Eve Arnold, Inge Morath e Cristina García Rodero’
Nov 3 2022 – Xan 15 2023 all-day

A Fundación Luis Seoane abrirá as súas portas o vindeiro xoves 3 de novembro á mostra ‘Tres mulleres Magnum: Eve Arnold, Inge Morath e Cristina García Rodero’, que lle achegará á cidadanía o percorrido e traxectoria de tres destacadas pioneiras da fotografía na historia da axencia Magnum, fundada no ano 1947 por prestixiosos profesionais do gremio como Robert Capa, Henri Cartier-Bresson, Maria Eisner e Rita Vandivert, entre outros. 

A exposición, producida polo Centro Niemeyer de Avilés en colaboración coa propia axencia e Contacto Grupo Europa Press, conta co apoio do Concello da Coruña e, en paralelo, do Instituto Asturiano de la Mujer, Fundación EDP, Ariexca e Universidade de Oviedo, e a Deputación de Valencia. 

Desta forma e ata o día 15 de xaneiro de 2023, o público asistente poderá achegarse polo miúdo á historia da primeira muller que ingresou na axencia Magnum. Foi a norteamericana Eve Arnold (Filadelfia, Estados Unidos; 1912), que desde o ano 1951 e a través do seu obxectivo amosou os cambios sociais experimentados pola sociedade dos Estados Unidos da época, así como unha ollada nova sobre o mundo do cinema, máis afastada da perspectiva hollywoodense e próxima á vida diaria de figuras da sétima arte como Marilyn Monroe, Paul Newman e Marlene Dietrich. 

Tras Arnold, incorporouse á axencia Magnum a austríaca-estadounidense Inge Morath (Graz, Austria; 1923), discípula de Cartier-Bresson e que, ao igual que Arnold, mantivo unha especial relación co cinema e un dramaturgo como Arthur Miller. A súa obra recolle, ademais, persoeiros como Yves Saint Laurent ou Ingrid Bergman, pero tamén amosa a súa sensibilidade a pé de rúa, con persoas anónimas das rúas en cidades como Londres e Teherán, que enchen de vida as súas imaxes. 

A exposición ‘Tres mulleres Magnum: Eve Arnold, Inge Morath e Cristina García Rodero’ achega, ademais, o traballo da primeira fotógrafa española na axencia Magnum. Cristina García Rodero (Puertollano, Ciudad Real; 1949), comezou a percorrer o país na década dos setenta co obxectivo de recoller, en imaxes, as súas festas, costumes populares, ritos e supersticións. Condensou este traballo na obra ‘La España oculta’, e deulle continuidade a este concepto, a escala global, viaxando por Europa do Leste, Haití, A India ou Etiopía, plasmando tamén en fotografías as tradicións e rituais locais. 

Nov
4
Ven
Exposición ‘Arte e memoria democrática’
Nov 4 2022 – Xan 8 2023 all-day

O concelleiro de Educación, Memoria Histórica, Innovación, Industria e Emprego, Jesús Celemín, presentou esta mañá a mostra ‘Arte e memoria democrática: a guerra e o seu relato na arte contemporánea en Galicia’, unha exposición organizada polo Concello que, a través da expresión artística, convida a unha reflexión sobre o impacto dos conflitos armados sobre as persoas, tamén sobre as súas consecuencias e a dor que as guerras deixan tras de si. 

A exposición permanecerá aberta ata o vindeiro 8 de xaneiro na Casa Museo Casares Quiroga. Inclúe gravados como os ‘Desastres da Guerra’, onde Francisco de Goya reflicte, cunha visión moderna e comprometida, a violencia, a crueldade e a morte; tamén o traballo de Pablo Picasso, cos seus gravados de ‘Soño e mentira de Franco’, a través dos cales denunciou o levantamento militar que provocou a Guerra Civil. 

A exposición reúne, ademais, obras de recoñecidos artistas como Castelao, Luís Seoane, Arturo Souto, Isaac Díaz Pardo, Manuel Colmeiro, Xosé Conde Corbal e Xaime Quessada, que tamén se situaron en contra da violencia, a represión e a guerra. Todos eles canalizaron, por medio da arte, o seu compromiso e denuncia contra o sufrimento. 

O concelleiro Jesús Celemín subliñou que “as institucións públicas temos o deber de traballar pola divulgación histórica e contribuír a esclarecer o pasado, especialmente o que ficou silenciado”. Para isto, continuou Celemín, “a arte ten a capacidade de transmitir realidades á cidadanía, tamén a memoria, e o Goberno de Inés Rey está firmemente comprometido con esta causa”. 

Ademais, o catálogo da mostra ‘Arte e memoria democrática: a guerra e o seu relato na arte contemporánea en Galicia’ pode descargarse, de forma gratuíta, aquí. 

O Concello e a UNED colaboran nun ciclo de conferencias paralelo á mostra 

Este venres, ás 17.00 horas, o Centro Asociado da UNED na Coruña abre as súas portas á presentación do ciclo de conferencias ‘Arte e memoria democrática’, unha actividade promovida polas áreas de Educación e Memoria Histórica, en colaboración coa UNED, e que se leva a cabo en paralelo á mostra da Casa Museo Casares Quiroga. 

Este ciclo, dirixido por Rosario Sarmiento e que terá continuidade ata mediados de decembro, abrangue cinco sesións, en formato mesa redonda, nas que historiadores e historiadoras e especialistas deste ámbito abordarán temas como a violencia e a guerra e o seu reflexo na arte contemporánea en Galicia, o exilio como vía de expresión intelectual e artística e o compromiso dos creadores plásticos fronte á realidade que lles tocou vivir. 

Á primeira das conferencias, ‘Arte e guerra, e o seu relato na arte contemporánea en Galicia’, que se impartirá esta tarde na UNED (17.00), seguirán outras catro sesións. Os días, horarios e localizacións previas son os seguintes: 

  • 8 de novembro (18.30 horas), na Casa Museo Casares Quiroga: ‘O exilio e a súa memoria como creación intelectual e artística’, coa participación de Abdón Mateos, catedrático de Historia Contemporánea da UNED.
  • 24 de novembro (18.30 horas), na Casa Museo Casares Quiroga: Mesa redonda ‘Creación plástica e compromiso’, coa participación de José Mª Luna director da Agencia Pública para la Gestión de la Casa Natal de Pablo Picasso; Miguel Anxo Seixas, vicepresidente da Fundación Castelao; e José Gómez Alén, da Fundación Xaime Quesada Blanco.
  • 13 de decembro (17.00 horas), no Centro Asociado da UNED na Coruña: Mesa redonda ‘Os artistas da vangarda histórica española: Guerra e exilio’, coa participación de Mónica Alonso, do departamento de Historia da Arte da UNED); Inmaculada Real, do departamento de Historia da Arte da Universidade Complutense de Madrid) e María Vitoria Carballo-Calero, do departamento de Historia, Arte e Xeografía da Universidade de Vigo e Real Academia Galega de Belas Artes.
  • 15 de decembro (18.30 horas), na Casa Museo Casares Quiroga: Percorrido guiado pola mostra ‘Arte e memoria democrática’, con Rosario Sarmiento, directora do ciclo de conferencias e comisaria da exposición artística.

As conferencias tamén poderán seguirse por vía telemática, a través da canle das áreas municipais de Educación e Memoria Histórica en YouTube.

Dec
1
Xov
Noites Alternas
Dec 1 @ 8:30 p.m.

O concelleiro de Mocidade, Rubén Prol, presentou o programa Noites Alternas, unha iniciativa de lecer nocturno alternativo destinada á mocidade que ten como obxectivos establecer relacións persoais saudables e construtivas, apoiar a prevención de hábitos de consumo de alcol e drogas e xerar dinámicas críticas, participativas e creativas que poidan reverte en beneficios da xuventude e da sociedade en xeral.

O programa, que se desenvolverá todas as noites dos xoves e venres, entre o 22 de setembro e o 2 de decembro, inclúe unha gran variedade de actividades espalladas pola cidade nas noites dos xoves e venres, sempre en horario nocturno, que abarca das oito da tarde, ata as doce da madrugada. Explicounas máis polo miúdo Nerea Couselo, da asociación cultural e xuvenil, Itaca, que organiza as distintas accións xunto ao Concello de Santiago, a través do departamento de Mocidade; coa colaboración de Xandobela.

Dinámicas de grupo, xogos, roteiros, obradoiros ou teatro configuran unha programación que comezará mañá xoves, 22 de setembro, con dous obradoiros, un de iniciación á percusión afrobrasileira, no Centro Xove da Almáciga, e outro de tinxido de plantas e pigmentos naturais no local de Itaca, así como a representación da obra “#consentido” de Oístes?Teatro na Biblioteca Ánxel Casal. Todas estas actividades comezarán ás 20:30 h. Toda a información sobre Noites Alternas, así como as actividades programadas, pódense consultar na páxina de Itaca.

Todas as accións programadas son de balde. As inscricións faranse semanalmente enchendo o formulario en liña dispoñible en itaca.gal e nas redes sociais, desde o luns anterior, ás 09:00 h. Como as prazas son reducidas, asignaranse por orde de inscrición.

Para que os contidos ofrecidos por Noites Alternas se adecuasen a demanda da xuventude, convocouse un convite para que as persoas e entidades interesadas puidesen presentar as súas propostas de actividades. Presentáronse máis de 100 por parte de 40 colectivos, segundo informou Nerea Couselo. Tanto a representante de Itaca, como o concelleiro Rubén Prol, esperan que esta edición teña tan boa acollida como as anteriores, e convidan a toda a xuventude a participar neste programa de lecer nocturno.

Dec
2
Ven
Butaca de jazz
Dec 2 @ 8:30 p.m.

Afundación presenta a terceira edición de «Butaca de jazz» na súa Sede da Coruña. Enmarcado no programa solidario da Obra Social de ABANCA, «Cultura por alimentos», este ciclo musical presenta o mellor jazz galego con poxección internacional para o público que, reconvertendo a súa entrada tradicional polo equivalente en alimentos non perecedoiros acuda aos tres recitais previstos ata o mes de decembro. A reserva de entradas pode realizarse xa en Ataquilla.com.

Esta nova edición está encadrada no programa de «Cultura por alimentos», mediante o cal Afundación muda a entrada ordinaria aos eventos culturais por unha entrega solidaria de alimentos non perecedoiros que se poderán depositar nos colectores habilitados ao efecto e que logo serán distribuídos polos bancos de alimentos locais. 

Esta terceira edición de «Butaca de jazz» segue mantendo o foco no jazz galego máis internacional, combinándoo con outras propostas de fóra de Galicia. Un ciclo de propostas persoais, no que o número tres devén no protagonista absoluto. Nesta terceira edición, preséntanse tres concertos de tres tríos de piano, contrabaixo e batería, poñendo de relevo as inmensas posibilidades alén da coincidencia instrumental. Tres proxectos con tres sons completamente diferenciados. 

Nesta ocasión «Butaca de jazz» presentará os recitais de Paco Charlín (venres 18 de novembro, 20.30 h), Lucia Fumero (venres 25 de novembro, 20.30 h) e Nani García (venres 2 de decembro, 20.30 h), e da pianista Lucia Fumero (venres 25 de novembro, 20.30 h).