Jun
5
Vie
Xirarei: Deseño de cubertas no disco galego 1955/1995
Jun 5 – Jul 26 todo el día

A exposición Xirarei: Deseño de cubertas no disco galego 1955/1995volverá abrir este venres, 5 de xuño, no Auditorio de Galicia. Interrompida por mor do cese das actividades culturais durante o confinamento, esta mostra comisariada por Fausto Isorna ve agora ampliado o seu período de exhibición na sala Isaac Díaz Pardo ata o 26 de xullo.

O espazo mantén os días e horarios de visitas habituais, de martes a domingo, das 10:00 ás 14:00 horas e das 16:00 ás 20:00 horas. Non será preciso solicitar cita previa para a visita, pero controlaranse os accesos coa fin de garantir o cumprimento das medidas de seguridade. Tamén se incorporaron sinalizacións gráficas ao longo do percorrido para lembrar ás persoas visitantes manteren as distancias recomendadas. A entrada é de balde.

En palabras de Fausto Isorna, a exposición procura render homenaxe ao vinilo e ao estoxo a través dun percorrido que nos permite relacionar as súas portadas e analizar a presenza de temas recorrentes como a Catedral, Sargadelos, os gaiteiros ou o traxe galego, a paisaxe, a bandeira, reparar nos deseños máis modernos ou minimalistas, nas portadas con fotografías ou naquelas que recollen obras de pintores como Luis Seoane, Laxeiro, Joán Miró ou Picasso.

A mostra –de case 600 discos (entre LPs e sinxelos)– iníciase co disco de Joselín do ano 1955 e enceta unha viaxe por 40 anos de música que levará as e os visitantes pola evolución do noso deseño dende as primeiras portadas xenéricas ata o momento no que adquire verdadeira presenza co agromar de figuras como Pepe Barro, Xoán Piñón ou Victor Aparicio.

O comisario da mostra sitúanos tamén ante da portada do disco como elemento de arte pop pensado dende o punto de vista comercial, como obxecto para vender e chegar ao maior número de lugares. Andrés Dobarro (número un das listas do pop en España), Ana Kiro ou, en menor medida, os Tamara, ilustran a enorme difusión que se acadaba naquela altura.

A escolma non esquece referencias aos selos especializados en música galega como Xistral ou Abrente ou Ruada, a primeira discográfica totalmente galega, que representa un dos máis importantes pasos a prol dunha industria musical no noso país.

Faise tamén un percorrido polo single, ese pequeno formato que coa selección dun tema deu lugar ao que denominamos lista de éxitos, que son o máis representativo da cultura mass media. Artigos, portadas de revista dedicadas as figuras do pop, dous documentais, carteis e unha mostra de pickups portátiles completan a mostra.

A exposición conta con fondos do arquivo da Biblioteca de Galicia e do Consello da Cultura Galega, xunto aos da Casa Museo Manuel María e as cesións de coleccionistas privados e con colaboracións puntuais da Fundación SGAE e Galicia Calidade.

Jun
19
Vie
Wonder Women
Jun 19 – Sep 6 todo el día

O Centro Galego de Arte Contemporánea (CGAC) acolle Wonder Women, a primeira exposición que bota a andar nesta instalación e en toda a cidade de Santiago de Compostela tras a crise da covid-19. A mostra, comisariada polo director do centro, Santiago Olmo, repasa os cambios producidos ao longo das últimas décadas no mundo da arte contemporánea a través de obras da colección do centro realizadas por artistas mulleres. Permanecerá aberta ata o próximo 6 de setembro.

En concreto, forman parte da colección pezas de Esther Ferrer, Fernanda Fragaterio, Isabel Garay, Dora García, Menchu Lamas, Jac Leiner, Luz Lizarazo, Eva Lootz, Alicia Martín, Susan Philipsz ou da prestixiosa artista norteamericana Dana Birnbaum. De feito, o título da mostra fai referencia a unha obra de Birnbaum que se inspira nunha superheroína concibida orixinalmente para os cómics pero que chegou a protagonizar unha serie de televisión de éxito nos 70.

Así pois, cada unha das pezas de Wonder Women mostra os cambios profundos rexistrados no mundo da arte contemporánea a través dunha escolma representativa de artistas mulleres que non só abordan temas como o feminismo ou cuestións vinculadas con debates de xénero, senón que tamén analizan problemas estéticos ou construtivos. A colección está concibida  como un instrumento en constante crecemento e un instrumento de debate sobre a necesidade de establecer novas narrativas máis plurais e inclusivas, poñendo de relevo o papel das mulleres na historia.

Medidas contra a covid-19

A exposición Wonder Woman é a primeira que bota a andar no Centro Galego de Arte Contemporánea e na cidade de Santiago tras a crise sanitaria. A exposición poderá visitarse con todas as garantías de seguridade contra a covid-19. Neste sentido, a capacidade do centro estará limitada ao 75%, haberá dispensadores de xel hidroalcólico a disposición dos visitantes e só se permitirán visitas de grupos de ata 15 persoas, sen cita previa.

Oct
1
Jue
Exposición Galicia, de Nós a nós
Oct 1 – Oct 31 todo el día

O Museo Centro Gaiás acollerá o próximo mes de outubro Galicia, de Nós a nós, a segunda exposición do Xacobeo 2021 centrada no centenario da publicación da revista Nós e no legado do grupo de intelectuais galeguistas que contribuíron co seu labor, nas primeiras décadas do século XX, ao desenvolvemento, renovación e internacionalización da literatura e da cultura galega.

A mostra, que sucederá á exposición Galicia, un relato no mundo, estaba prevista inicialmente para finais de maio, pero tivo que ser reprogramada polos efectos da crise sanitaria da covid-19.

Trátase dunha exposición realizada pola Xunta en colaboración coa Deputación de Ourense que está comisariada polo investigador e académico da Real Academia Galega (RAG) Afonso Vázquez Monxardín e a profesora e investigadora da Universidade de Vigo Ana Acuña. Agárdase que, tras o seu paso pola Cidade da Cultura, teña unha itinerancia completa na cidade de Ourense en febreiro de 2021.

Aspira a ser a mostra máis completa realizada ata agora sobre a Xeración Nós, co obxectivo comunicar á sociedade a transcendencia do que, xunto ao Rexurdimento, é probablemente o momento histórico máis relevante de conformación da cultura e identidade galega. A exposición reflectirá o compromiso coa memoria e o legado dunha xeración que agrupa aos considerados “pais do galeguismo contemporáneo”. Coa ollada posta no público xeral e nas xeracións más novas, actualizarase a relevancia das figuras que formaron parte dela.

O proxecto reivindicará a vixencia de principios defendidos pola Xeración Nós, como a dimensión universal da cultura galega, a necesidade de ter unha voz propia no mundo e o carácter aberto e integrador de Galicia.

 

Oct
2
Vie
Galicia, de Nós a nós
Oct 2 2020 – Ene 17 2021 todo el día

A exposición Galicia, de Nós a nós reunirá en outubro na Cidade da Cultura máis de 300 pezas na que aspira a ser a mostra máis completa e ambiciosa realizada ata o de agora sobre a Xeración Nós e unha das citas culturais imprescindibles deste outono, no que conmemoramos o centenario da publicación da revista Nós. Chegarán a Galicia –para seren exhibidas no Museo Centro Gaiás– obras procedentes de Francia, Alemaña e Portugal que porán o foco nas conexións internacionais da revista Nós e dos seus impulsores, abrindo unha vía para subliñar a dimensión de universalidade e apertura da cultura galega. Tamén para destacar o legado do grupo de intelectuais galeguistas que contribuíron decididamente, nas primeiras décadas do século XX, ao desenvolvemento, renovación e internacionalización da literatura e da cultura galega.

Ademais, Galicia, de Nós a nós, tralo seu paso pola Cidade da Cultura –onde se poderá visitar entre o 2 de outubro de 2020 e o 17 de xaneiro de 2021–, poderá verse no Centro Cultural Marcos Valcárcel (Ourense), entre febreiro e abril de 2021, e no Museo de Pontevedra entre maio e xullo de 2021.