Feb
15
vie
Valor e mestría. Galicia como fútbol
Feb 15 – Sep 1 todo el día

Valor e mestría. Galicia como fútbol é a exposición máis ambiciosa sobre o fenómeno do fútbol na nosa comunidade, tanto en percorrido histórico como en número de pezas: 300, das cales 200 son orixinais.

A mostra arranca en 1876, ano no que se data a primeira referencia o xogo do foot-ball en Galicia —e que algúns historiadores consideran que tamén en España— ata o gol do celtista Iago Aspas no recente Mundial de Rusia.

Ao longo destes 143 anos o fútbol galego foi protagonista en numerosos momentos estelares. Así, a escolma de pezas desta exposición devólvenos as xestas de equipos como o Racing subcampión da Copa de España, o Pontevedra do Hai que roelo, o Súper Dépor ou do Celta que brillou en Europa; de adestradores como Moncho Encinas, Arsenio Iglesias ou Carriega; e de xogadores como os olímpicos galegos de 1920, Luis Suárez, Amancio, Marcelino, Fran, Borja Oubiña, Iago Aspas, Lucas Vázquez ou Lucas Pérez; ou da nosa futbolista máis internacional, Verónica Boquete, o nome máis representativo da explosión que está a vivir o fútbol feminino galego e que tivo á porteira Irene como pioneira a principios do século pasado.

Facerse eco de todos eles é o principal obxectivo de Valor e mestría. Galicia como fútbol, a exposición que se vai desenvolver o próximo ano no segundo andar da Cidade da Cultura, en Santiago de Compostela.

Organizada pola Xunta de Galicia —coa colaboración da Federación Galega de Fútbol e LaLiga Santader—, conta con dos expertos en fútbol galego Xosé Antón Castro Fernández e Rubén Ventureira Novo como comisarios da exposición.
A mostra reunirá trofeos, medallas, carteis, bandeirolas, bufandas, camisetas, botas, fotografías, vídeos e outro tipo de obxectos. As pezas que compoñerán a exposición serán achegadas por diferentes coleccionistas públicos (30) e privados (60). Así, requiriuse a colaboración dos principais clubs da comunidade –así como da federacións galega– e tamén dos xogadores máis relevantes da historia do noso fútbol ou ben dos seus herdeiros.
O papel dos galegos na selección española será destacado especialmente. Haberá tamén apartados específicos para as distintas etapas da selección galega e para os adestradores máis sobresalientes. Non se obviará neste percorrido histórico a relación do fútbol galego coa cultura, especialmente coa literatura ou a pintura. Precisamente, o nome do título da exposición vén da descrición que deste deporte fixo o intelectual e escritor ourensán Eduardo Blanco Amor, mentres que a imaxe gráfica principal da mostra tamén é autoría doutro artista ouresán Antón Pulido.
A ampla duración da exhibición obedece a que é a primeira vez se que celebra unha mostra destas características, o que obrigou a un inxente traballo de recompilación de datos, documentación e pezas, traballo que merece ser plasmado con xenerosidade temporal.
Abr
12
vie
‘Pensar coas mans’
Abr 12 – Sep 8 todo el día

A Cidade da Cultura acollerá desde o 12 de abril e ata o 8 de setembro a exposición, Pensar coas mans. Cestería, cerámica e xoiería de Galicia. 

Así, o Museo Centro Gaiás propón unha ambiciosa e completa viaxe no tempo pola artesanía de Galicia, da actualidade ás orixes, centrándose nas especialidades do ‘feito a man’ como a cestería, cerámica e xoiería. Para facer este percorrido, fíxose unha escolma de 250 pezas provenientes de 65 artesáns, (24 xoieiros, 17 ceramistas, 13 artistas de cerámica e 8 cesteiros),  14 museos e 10 coleccionistas privados, así como creacións do alumnado das escolas de Arte e Superior e Deseño ‘Mestre Mateo’ de Santiago de Compostela e a ‘Ramón Falcón’ de Lugo e contouse tamén coa colaboración da Fundación Pública Artesanía de Galicia, que pertence á Consellería de Economía, Emprego e Industria.

Artesáns e artesás de renome internacional

Sobre os artesáns e artesás participantes nesta escola,  Pensar coas mans permitirá admirar xuntas no Museo Centro Gaiás pezas de autores/a ou talleres de gran renome internacional como é Idoia Cuesta, cuxa innovación na cestería espertou o interese de firmas como Loewe, coa que colaborou; ou de Ojea Studio e Cerámica Suve, cuxas vaixelas son empregadas na alta cociña de chefs como Pepe Solla, Pepe Vieira ou Carme Ruscalleda; ou Madriguera Workshop, que vén de participar na Maison & Objet de París, feira internacional no eido da decoración.

Da mesma forma,  a arte e a cerámica terán unha especial presenza na mostra; xa que a escolma das e dos artistas cerámicos estará presidida polo galego Xabier Toubes, un dos seus máximos representantes, quen dirixiu durante anos o European Ceramic Work Centre de Holanda. Así  mesmo, fixo fincapé en que completarán este desfile recoñecidos xoieiros/as como Marta Armada, Susi Gesto ou Noroeste Obradoiro, entre outros.

Intervención de Izaskun Chinchilla

Débese destacar que a exhibición das pezas contemporáneas das tres artesanías estará presente nunha espectacular intervención da recoñecida arquitecta Izaskun Chinchilla, que estará baseada nas 7 lámpadas de arquitectura do teórico da arte e arquitectura John Ruskin. O traballo desta arquitecta, investigadora e docente en diversas universidades europeas, atopa moitos puntos de conexión coa filosofía do “feito artesán”, ao que se achega desde a súa preocupación pola sustentabilidade, a ecoloxía e a socioloxía, en canto a súa atención aos cambios nos modos de vida.

A intervención de Izaskun Chinchilla consiste en sete unidades espaciais de base circular con cúpula en altura, que acollerán ademais obradoiros, charlas-taller, demostracións artesanais, proxeccións audiovisuais, visitas didácticas…

Obradoiros todas as fins de semana

Deste xeito, Pensar coas mans ponse en marcha como unha mostra non só para ver, senón tamén para facer. Cada fin de semana, o Museo Centro Gaiás converterase nun grande obradoiro aberto ao público, onde ‘mestres’ e ‘mestras’ das diferentes especialidades realizarán talleres sobre cerámica, cestería e xoiería, organizados pola Fundación Pública Artesanía de Galicia. O obxectivo é estimular non só o gusto polos obxectos artesáns, senón tamén a práctica destas técnicas tradicionais. Algúns destes obradoiros requiren inscrición previa, xa dispoñibles na páxina web artesaniadegalicia.xunta.gal

Finalmente, a viaxe ao pasado destas tres artesanías chegará ata a Prehistoria, con achados e pezas nos que se amosarán tamén as creacións e tendencias desde a Idade Media ao Barroco, aínda que a atención máis especial desta exposición caerá nas creacións tradicionais en cestería, cerámica e xoiería, co obxectivo de amosar a súa rica e prolífica tipoloxía.